MATEU 19

1Muze te Yesu hamanununa maliji ano, wakatukile ku Ngalileya, wahetele ku manjiza ja Yundeya kuze-kanda lia Yordau; 2mbunga jinene amukawile; iye waawukileko.

3A-Fwariseu ejile kuli iye, akamweseke, ngwo, Muchilita ni shimbi hali mutu kulakula mukwo-pwo ha chikuma cheswacho, nyi? 4Waakumbulwile ngwenyi, Kunwatungile nyi, ngwe yoze waatangile chize ku uputukilo waatangile lunga ni pwo, 5ngwenyi, Ha chikuma chino mutu akahichike tato ni naye, akalinunge ni mukwo-pwo; e aali kumakapwa musunya umuwika? 6Chocho hi aali nawa ko, alioze musunya umuwika. Chize kashika Zambi hananungu, atu kanda akachihandununa. 7O yamba kuli iye ngwo, Kuchi te kevwe Mose ayulile ngwenyi, Akahane mukanda wa kulakula, mba akamutwale?, 8Iye yamba kuli ayo ngwenyi, Ha kukala cha mbunge jenu Mose wanutayijile kulakula akwenu-mapwo: alioze chize ku uputukilo kuchapwile chocho. 9Alioze ngunambe kuli yenu ngwami, Mweswawo malakula mukwo-pwo shina ha upangala, mba hitunamambata mukwo, malinga utanji: ni yoze mambata yoze hanamulakula, malinga utanji.

10Tumbaji twenyi yamba kuli iye ngwo, Kachi chikuma cha mutu muchipwa chocho ni mukwo-pwo, kachi hi chipema ko kumbata. 11Alioze wambile kuli ayo ngwenyi, Eswe kahashile kutambula liji lino, ndo waze aahelelio. 12Mumu kwali aunuku, waze asemukine chocho ku jimo lia anaye; kwali aunuku, waze aapwishile aunuku kuli atu: kwali aunuku, waze alipwishile aunuku mumu ha wanangana wa malilu. Yoze mahasa kulitambula, akalitambule.

13Mba anehene kuli iye ana akepe, hanga asayike moko jenyi hali ayo, alembe; alioze tumbaji aakanjishile. 14Alioze Yesu wambile ngwenyi, Tayizenu ana akepe, kanda nwakanjisa kwiza kuli yami: mumu wanangana wa malilu wa wano ene. 15Wasayikile moko jenyi hali ayo, mba wakatukile kuze.

16Mba umwe wejile kuli iye, ngwenyi, Longeshi mupema, chuma chipema chika mungulinga hanga ngukapwe ni mwono wa mutolo? 17Yesu wambile kuli iye ngwenyi, Kuchi te unanguhula ha kutwala ku chipema? Kwali umuwika mupema: alioze kachi unazange kunjila mu mwono, funga maliji a shimbi. 18Aye yamba kuli iye ngwenyi, Maliji aka? Yesu ngwenyi, Kanda ushiha, Kanda ulinga utanji, Kanda wiya, Kanda ushindakenya mahuza. 19Lemesa tatenu ni noko, uzange mwenyembo we chizechene ngwe wakulizanga yena mwene. 20Mukweze yamba kuli iye ngwenyi, Wano eswe hingunaafungu chize ku ukweze wami; hindu kuchi ngunahono? 21Yesu ngwenyi, Kachi unazange kupwa mungunu, yako, ulanjise yize uli nayo, Ukahane kuli yiswale, mba kumuopwa ni upite mwilu; wize, ungukaule. 22Alioze muze mukweze evwile liji lize wakatukile ni chinyengo; mumu wapwile ni upite wunji.

23Yesu wambile kuli tumbaji twenyi, ngwenyi, Pundu ngwami, Chikalu hali pichi kunjila mu wanangana wa malilu. 24Cheka nawa ngwami, Chashi hali kamelu kupalika ndusu mu liso lia ndongo, chikalu hali pichi kunjila mu wanangana wa Zambi. 25Muze tumbaji achivwile, alishimwokene chikolo ngwo, Iya kevwe mahasa kulilamwina? 26Yesu nikutala meso kuli ayo, wambile ngwenyi, Kuli atu kuchishi kuhasa; alioze kuli Zambi yuma yeswe muyihasa kupwa. 27Hohene Petulu wamukumbulwile, ngwenyi, Mba ni yetu hitunahichika yuma yeswe, kukaula; yika, kevwe, mutukapwa nayo? 28Yesu ngwenyi, Pundu ngwami, Yenu hinunangukaula, ha kupwisa chaha cha yuma yeswe, muze mwe Mwana Mutu makatwama ha ngunja yenyi ya uhenya, ni venu nawa kumunukatwama ha kumi lia ngunja ni ngunja jiali, nikupatwila kumi lia mavungu ni mavungu aali a Izalele. 29Ni mweswe hanahichika mazuwo, hanji ana-akwo, hanji mandumbu, hanji tato, hanji naye, hanji mukwo-pwo, hanji ana, hanji minda, mumu ha jina liami, kumakatambula kulakaji lia yisuho, mba makahinga mwono wa mutolo. 30Alioze anji atangu kumakapwa akwa kusula; ni akwa kusula kumakapwa atangu.

Currently Selected:

MATEU 19: Csa

Highlight

Copy