ULEVI 21
21
1Yehova yamba kuli Mose ngwenyi, Hanjika ni asasendote, ana ja Arone, ukambe kuli ayo ngwe, Niumwe hakachi ko makalichisa mumu hali afu hakachi ka atu jenyi. 2Ndo mapwa usoko wenyi wa ha muchima lume, hanji naye, hanji tato, hanji mwanenyi wa lunga, hanji mwanenyi wa pwo, hanji mwanakwo, hanji yayo, 3hanji ndumbwenyi yoze kanda alimona ni lunga (iye hapwa usoko wenyi wa hakamwihi mumu keshi lunga. Hali iye mahasa kulichisa). 4Kanda akalichisa mumu hali pwo hakachi ka atu jenyi nikulijilula. 5Kanda alitewula kawewe, hanji kuteta chihanda cha wevu, hanji kulitetateta ha mujimba wenyi. 6Akapwe asandu kuli Zambi yo. Kanda akajilula jina lia Zambi yo. Mumu o kakulambula milambu ya kahia kuli Yehova, che kulia cha Zambi yo. Kashika akapwe asandu. 7Kanda ambata chikoi hanji pwo yoze hamulumbula. Kanda ambata pwo wa kulakula, mumu sasendote iye musandu kuli Zambi yenyi. 8Nukamusele ku usasendote mumu kakulambula kulia cha Zambi yenu. Akapwe musandu kuli yenu mumu yami Yehova mukwa kunusela ku usandu nguli musandu. 9Nyi mwana wa pwo wa umwe sasendote malijilula ha kulinga ukoi, hajilula tato, akamwoche ni kahia.
10Sasendote wa lutwe hakachi ka akwo, yoze te hamuwayisa ni maji ha mutwe, hamutumbikila kuzala e mazalo, kanda akasulula kambu jenyi, kanda asonya mazalo jenyi. 11Kanda akundama ku mujimba wa mufu. Kanda alichisa chipwe hali tato hanji naye. 12Kanda akatuka kuma kusandu. Kanda ajilula kuma kusandu kwa Zambi yenyi mumu maji a Zambi yenyi a kumusela ku usandu hapwa hali iye. Yami Yehova. 13Iye mambata pwo yoze kanda alimona ni lunga. 14Kanda ambata yoze wafwisa lunga, hanji wa kulakula, hanji yoze hamulumbula, hanji chikoi. Akambate pwo wa kuli atu jenyi mwene yoze kanda alimona ni lunga, 15kuchina majilula ana jenyi hakachi ka atu jenyi. Mumu yami Yehova mukwa kumusela ku usandu.
16Yehova yamba kuli Mose ngwenyi, 17Ambila Arone ngwe, Niumwe chilema hakachi ka ana je, ndusu yisemuko yo, kanda akundama kulambula kulia cha Zambi yenyi. 18Mumu niumwe chilema kanda akundama, yoze wapwa kapuputa, hanji chitonji, hanji yoze halumbuka ku meso, hanji yoze uli ni kulu lisuku, 19hanji kulu liawondeka, hanji kwoko liawondeka; 20hanji mukwa kunda, hanji chimbinda, hanji yoze kamwene kanawa, hanji kali ni musongo wa kuzwa, hanji yilonda, hanji mbili ja kuwonda. 21Niumwe chilema hakachi ka ana ja Arone mwe sasendote kanda akundama akalambule milambu ya Yehova ni kahia. Se iye chilema kanda akundama mukulambula kulia cha Zambi yenyi. 22Mahasa kulia ya kulia ya Zambi yenyi, chipwe yisandu yahiana chipwe ye yisandu. 23Alioze kanda akundama ku chikalakala, hanji chilumbilo, mumu iye chilema, kuchina majilula zuwo liami lisandu. Mumu yami Yehova mukwa kuyisela ku usandu. 24Chocho Mose yalumbununa kuli Arone, ni kuli anenyi a malunga, ni kuli A-Izalele eswe.
Currently Selected:
ULEVI 21: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
