ULEVI 14
14
1Yehova yamba kuli Mose ngwenyi, 2Shimbi ya mukwa mbumba ha tangwa lia kumupemesa yino. Akamunehe kuli sasendote. 3Sasendote matuhuka mu chilombo. Sasendote matala. Nyi musongo wa mbumba hiwakatuka kuli mukwa mbumba, 4sasendote matumina akande tujila aali a mwono, apema, hali yoze anambe kumupemesa, hamwe ni mutondo wa sedru, ni hina lia ngengu ni hisope. 5Sasendote matumina ashihe kajila umuwika mu chikwachilo cha uma helu lia meya aze anende. 6Akande mwe kajila wa mwono hamwe ni mutondo wa sedru ni hina lia ngengu ni hisope, akayichupike hamwe ni kajila wa mwono mu manyinga a kajila yoze hamushiha helu lia meya aze anende. 7Akaasapwile yisuho shimbiali hali yoze anambe kumupemesa ku mbumba, akamuvuluke ngwo, Kanapeme. Mba akatusule kajila wa mwono mu chifuchi cha woya. 8Mba yoze anambe kumupemesa akakose mazalo jenyi, akatewule kambu jenyi jeswe, akasane meya, mba mapema. Muze halinga chino manjila mu chilombo ahoze kechi kunjila mu mbalaka yenyi ndo matangwa shimbiali hahwa. 9Ha tangwa liamuchishimbiali akatewule kambu jenyi jeswe ja ha mutwe, akatewule ni wevu wenyi ni yikenyikenyi, kambu jenyi jeswe lume. Mba makosa mazalo jenyi, masana meya, mba hapwa mupema.
10Ha tangwa liamuchinake akande ana-mapanga aali a kuji keshi chipa, ni chihwo cha panga umuwika wa mwaka umuwika, keshi chipa, ni mulambu wa wunga wa yihanda yitatu ya ku kumi ha yihanda ya wunga wafufunuka wa kuchinga ni maji, ni njongo#14.10 Njongo—chihanda cha muchima cha litro ya maji. 11Mba sasendote mukwa kupemesa matumbika yoze mamupemesa hamuwika ni yuma yino kumeso ja Yehova ku chikolo cha mbalaka ya chikungulwila. 12Sasendote akande kuji ya panga umuwika akamutambule mulambu wa uhie hamuwika ni njongo#14.12 Njongo—chihanda cha muchima cha litro ya maji, akayihungise yikapwe mulambu wa kuhungisa kumeso ja Yehova. 13Akashihe mwe mwana-panga kuze akushihila mulambu ha shili ni mulambu wa kulumba kuma kusandu. Mumu mulambu wa uhie wapwa ngwe mulambu ha shili wa mbala wa sasendote. Musandu Wahiana. 14Sasendote akande amwe manyinga a ku mulambu wa uhie akaakomone ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume. 15Sasendote akande nawa amwe a ku njongo#14.15 Njongo—chihanda cha muchima cha litro ya maji akazujile mu kwoko lienyi mwene lia chimeso. 16Akachupike songo lia munwe wenyi wa chindume mu maji ali mu kwoko lienyi lia chimeso, akasapwile amwe maji ni munwe wenyi yisuho shimbiali kumeso ja Yehova. 17Amwe maji aze asala mu kwoko lienyi sasendote makomona ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume ha manyinga a mulambu wa uhie. 18Maji aze asala mu kwoko lia sasendote akakomone ha mutwe wa yoze anambe kumupemesa. Mba sasendote mamufukila shili yenyi kumeso ja Yehova. 19Sasendote akalambule mulambu ha shili kufuka yoze anambe kumupemesa ku luchisa wenyi. Mba kulutwe akashihe mulambu wa kulumba. 20Sasendote akalambule mulambu wa kulumba ni mulambu wa wunga ha chilumbilo. Chocho sasendote mamufuka, mba mapwa mupema.
21Alioze nyi iye chiswale, kahashile kuwana yuma yipwa haha, akande kuji ya panga umuwika ha mulambu wa uhie akamuhungise akamufukile shili yenyi. Akanehe nawa chihanda chimuwika cha ku kumi lia yihanda ya wunga wafufunuka wa kuchinga ni maji ha mulambu wa wunga, ni njongo#14.21 Njongo—chihanda cha muchima cha litro ya maji. 22Akanehe tutele aali hanji ana-a-membe aali aze mahasa kuwana, umwe mulambu ha shili, mukwo mulambu wa kulumba. 23Ha tangwa liamuchinake makaaneha kuli sasendote a kumupemesa no, kwe ku chikolo cha mbalaka ya chikungulwila kumeso ja Yehova. 24Sasendote manda mwana-panga wa mulambu wa uhie, ni njongo#14.24 Njongo—chihanda cha muchima cha litro ya maji. Sasendote mayihungisa yikapwe mulambu wa kuhungisa kumeso ja Yehova. 25Mashiha mwana-panga wa mulambu wa uhie, mba sasendote manda amwe manyinga a mulambu wa uhie, maakomona ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume. 26Sasendote mazujila amwe maji mu kwoko lienyi mwene lia chimeso. 27Akasapwile amwe maji a mu kwoko lienyi lia chimeso kumeso ja Yehova yisuho shimbiali ni munwe wenyi wa chindume. 28Maji aze ali mu kwoko lienyi sasendote maakomona ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume, haze asele manyinga a mulambu wa uhie. 29Maji aze asala mu kwoko lia sasendote akaase ha mutwe wa yoze anambe kumupemesa akamufuke kumeso ja Yehova. 30Mba akalambule mwana-liembe hanji katele aze hahasa kwawana. 31Umwe akapwe mulambu ha shili, mukwo mulambu wa kulumba hamuwika ni mulambu wa wunga. Mba hali yoze anambe kumupemesa sasendote mamufukila shili yenyi kumeso ja Yehova. 32Yino muyipwa shimbi ya yoze kali ni musongo wa mbumba alioze kahashile kuwana milambu ya kumupemesa nayo.
33Yehova yamba kuli Mose ni Arone ngwenyi, 34Muze munuheta ku chifuchi cha Kanana ngunanwehecho nukachizuke, nyi mungusa musongo wa mbumba mu zuwo limwe mu chifuchi chize munuzuka, 35mba mwenya zuwo maheta kuli sasendote akamulumbunwine ngwenyi, Ngunamono ngwe musongo umwe wanjila mu zuwo liami. 36Mwe sasendote matuma kuchiza yuma yeswe yilimo shimbu kanda anjila kutala musongo. Nyi ka, hanji yeswe yili mu zuwo mayivuluka ngwenyi, Ya luchisa. Mba kulutwe mwe sasendote manjila kutala lie zuwo. 37Matala we musongo. Nyi musongo muupwa mu yishimi ya zuwo ngwe yipeka yilá ngwe mbundu hanji yichila, chikwo nawa wanjila muchima, 38mba sasendote matuhuka ku chikolo, májila lie zuwo matangwa shimbiali. 39Mwe sasendote mayako nawa ha tangwa liamuchishimbiali ataleko. Nyi musongo hiwatanda mu yishimi ya zuwo, 40mba sasendote matumina akachize mawe aze akwete musongo akaambile kuma kumwe kwa luchisa haze lia chihunda. 41Makatumina kukwata muchima lia zuwo kweswe kwa kujingilika mba mavu aze makwalako akaazukwile kuma kumwe kwa luchisa haze lia chihunda. 42Mba makanda mawe akwo akasalakane mawe aze. Makashingula nawa ni mavu a kusalakana mavu aze hambila.
43Nyi musongo muukasangumuka nawa mu zuwo muze te hachiza mawe aze, hakwala muchima lia zuwo nikulishingula nawa, 44mwe sasendote manjila kutala. Nyi musongo hiwatanda mu zuwo, mba wapwa mbumba ya mbongola mu zuwo, liapwa lia luchisa. 45Chocho makapuzula lie zuwo, ni mawe jalio, ni mitondo yalio ni mavu a kushingula no lie zuwo, akayitute haze lia chihunda kuma kwa luchisa. 46Chikwo nawa mweswe manjila mu zuwo shimbu lichili lia kwájila mapwa wa luchisa ndo chingoloshi. 47Mweswe mapombamo makosa mazalo jenyi. Mweswe malilamo makosa mazalo jenyi.
48Alioze nyi sasendote maya nikutala zuwo, kumanyi musongo kuwatanjile mu zuwo muze te halishingula, mba sasendote mavuluka zuwo ngwenyi, Linapeme, mumu musongo hiwaya. 49Mba ha kupemesa lie zuwo manda tulujila twali hamwe ni mutondo wa sedru ni hina lia ngengu ni hisope. 50Akashihe kajila umuwika mu chikwachilo cha uma helu lia meya aze anende. 51Mba akande mutondo wa sedru, ni hisope, ni hina lia ngengu, hamwe ni kajila wa mwono akayichupike mu manyinga a kajila yoze hashiha, ni mu meya aze anende, akasapwile lie zuwo yisuho shimbiali. 52Chocho makapemesa zuwo ni manyinga a kajila, ni meya aze anende, ni kajila wa mwono, ni mutondo wa sedru, ni hisope, ni hina lia ngengu. 53Makatusula kajila wa mwono akatuke ku chihunda ahumuke mu chifuchi cha woya. Chocho mafuka mulonga wa zuwo, likapeme.
54Yino yapwa ye shimbi ya kutwala ku musongo weswawo wa mbumba hanji wa kuzwa, 55ya mbumba mu mazalo hanji mu zuwo, 56ya chijimbo, hanji chilonda cha kulijila, hanji chipeka, 57kulweza muze kwapwa luchisa, hanji hi luchisa ko. Ye shimbi ya mbumba yino yene.
Currently Selected:
ULEVI 14: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
