ULEVI 13
13
1Yehova yamba kuli Mose ni Arone ngwenyi, 2Muze mutu mapwa ni chijimbo, hanji kachilonda, hanji chipeka ha kowa lia mujimba wenyi, mba muchalumuka musongo ngwe wa mbumba mu kowa lia mujimba wenyi, akamunehe kuli sasendote Arone, hanji kuli umwe hakachi ka anenyi asasendote. 3Mwe sasendote matala kanawa musongo mu kowa lia mujimba wenyi, nyi wona wa ha musongo hiwalumuka utoma mba musongo wasoloka ngwe wanjila kushi lia kowa lia mujimba wenyi, hi musongo wa mbumba. Mwe sasendote mamutala mamuvuluka ngwenyi, Wa luchisa. 4Alioze nyi chipeka chapwa chitoma mu kowa lia mujimba wenyi, hindu ngwe kuchanjilile kushi lia kowa, ni we wona kuwalumukine utoma, mba sasendote makájilila mukwa musongo mu zuwo matangwa shimbiali. 5Mba ha tangwa liamuchishimbiali sasendote mamutala nawa, nyi kanamono ngwe musongo kuwatanjile mu kowa nawa, wapwa chizechene, mba sasendote mamwajilila mu zuwo matangwa akwo shimbiali nawa. 6Sasendote mamutala nawa ha tangwa liamuchishimbiali. Nyi musongo hiwafwilila kuwatanjile nawa mu kowa, mba mwe sasendote mamuvuluka ngwenyi, Kanapeme, musongo wapwa chilonda chamokomoko. Makosa mazalo jenyi mba hapema. 7Alioze nyi musongo muutanda mu kowa muze te hanalilweza kuli sasendote ha kulipemesa, akasoloke nawa kuli sasendote. 8Sasendote makamutala nawa, mba nyi musongo hiwatanda mu kowa sasendote makamuvuluka ngwenyi, Wa luchisa, wapwa musongo wa mbumba.
9Muze umwe mapwa ni chilonda ngwe cha mbumba mamuneha kuli sasendote. 10Sasendote mamutala mba nyi kwapwa chijimbo chitoma mu kowa, ni we wona hiwalumuka utoma, ni ye yifwo yachila ngé mu chijimbo, 11wapwa musongo ukulu wa mbumba mu kowa lia mujimba wenyi. Mwe sasendote mamuvuluka ngwenyi, Wa luchisa, mba kechi kumwajilila mu zuwo mumu hapwa wa luchisa. 12Alioze nyi mbumba muyitanjila chikolo mu kowa, ndo kowa lieswe lia mukwa chilonda hiliatakana chize ku mutwe wenyi ndo ku chiliato chenyi kweswako meso ja sasendote matala, 13sasendote matala, mba musongo hiwazuka mujimba wenyi weswe, kashika mavuluka mukwa chilonda ngwenyi, Kanapeme. Mweswe hatoma, hapema. 14Alioze tangwa lize yifwo yichila ngé muyisoloka muli iye makapwa wa luchisa. 15Mwe sasendote matala yifwo yichila ngé, mamuvuluka ngwenyi, Wa luchisa. Yifwo yichila yapwa ya luchisa, yapwa ya mbumba. 16Alioze nyi yifwo yichila muyalumuka nawa yikapwe yitoma, akeze kuli sasendote. 17Mwe sasendote mamutala. Mba nyi chilonda hichalumuka chitoma, hohene sasendote mavuluka mukwa chitenda ngwenyi, Kanapeme—se hapema.
18Nyi umwe hapwa ni hute mu kowa lia mujimba wenyi mba hute hiliaya, 19alioze haze hapwile hute hihapwa chijimbo chitoma, chipeka kanda chichita kanda chitoma, mba akachilweze kuli sasendote. 20Sasendote machitala, mba nyi kanamono ngwe hichanjila kushi lia kowa ni we wona waho hiwalumuka utoma, henaho sasendote mamuvuluka ngwenyi, Wa luchisa. We musongo wa mbumba hiwaputuka mu hute. 21Alioze nyi sasendote hatala, kumanyi wona waho hi utoma ko, we musongo kuwanjilile kushi lia kowa, ngwe hiwatepuluka, henaho sasendote mamwajilila mu zuwo matangwa shimbiali. 22Nyi musongo muutanjila mu kowa mba sasendote mamuvuluka ngwenyi, Wa luchisa, wapwa we musongo. 23Alioze nyi chipeka chasala chizechene, kuchatanjile, mba chapwa chimbandwa cha hute, sasendote mamuvuluka ngwenyi, Kanapeme.
24Chipwe kowa ha mujimba liawema mba yifwo yize yichila hakachi ka chitenda muyisoloka kanda ngwe chipeka chichila chitoma kanda ngwe chitoma, 25sasendote machitala, mba nyi wona mu chipeka hiwalumuka utoma, chikwo nawa kachi kanachimono ngwe hichanjila kushi lia kowa hichapwa mbumba. Ye mbumba hiyaputuka mu chitenda cha kahia, kashika sasendote mamuvuluka ngwenyi, Wa luchisa, mumu musongo wa mbumba. 26Alioze muze sasendote hamutala nyi wona ha chipeka hi utoma ko, chipwe we musongo kuwanjilile kushi lia kowa ngwe hiwatepuluka, mba sasendote mamwajilila mu zuwo matangwa shimbiali. 27Ha tangwa liamuchishimbiali sasendote mamutala. Nyi musongo hiwatanjila mu kowa mba sasendote mamuvuluka ngwenyi, Wa luchisa. Wapwa musongo wa mbumba. 28Alioze nyi chipeka chapwa chizechene, kuchatanjile mu kowa, ngwe hichatepuluka, chapwa chijimbo cha chitenda cha kahia. Kashika sasendote mamuvuluka ngwenyi, Kanapeme, mumu chapwa chimbandwa cha chitenda cha kahia.
29Muze lunga hanji pwo mapwa ni musongo mu mutwe hanji mu wevu, 30sasendote matala we musongo, nyi kanamono ngwe hiwanjila kushi lia kowa, ni kambu hijayewuluka, mba sasendote mamuvuluka ngwenyi, Wa luchisa, wapwa musongo wa kuzwa, wa mbumba mu mutwe hanji mu wevu. 31Nyi muze sasendote matala musongo wa kuzwa, kanamono ngwe kuwanjilile kushi lia kowa, kambu jilá kujishiho, mba sasendote májilila mukwa musongo wa kuzwa mu zuwo matangwa shimbiali. 32Muze sasendote matala musongo ha tangwa liamuchishimbiali nyi kuwatanjile, kukushi kambu jichila, ni musongo wa kuzwa kanaumono ngwe kuwanjilile kushi lia kowa, 33mukwa musongo malitewula ahoze kanda atewula ha musongo wa kuzwa, mba sasendote májilila mukwa musongo chisuho chamuchiali ha matangwa shimbiali. 34Sasendote matala musongo ha tangwa liamuchishimbiali, nyi musongo wa kuzwa kuwatanjile mu kowa, kuutala ngwe kuwanjilile kushi lia kowa, mba sasendote mamuvuluka ngwenyi, Kanapeme. Makosa mazalo jenyi, kanapeme. 35Alioze nyi musongo wa kuzwa hiwatanda mu kowa muze te hamupemesa, 36mba sasendote mamutala. Nyi musongo wa kuzwa hiwatanjila mu kowa, sasendote kanda afupa nawa kambu jichila. Wapwa wa luchisa. 37Ahoze nyi musongo wa kuzwa kutala ngwe wapwa chizechene, kambu jilá hijasokaho, musongo hiwaya, mutu hanapeme, mba sasendote mamuvuluka ngwenyi, Kanapeme.
38Nyi lunga hanji pwo mapwa ni yipeka yitoma mu kowa ha mujimba, 39sasendote mamutala. Nyi mu kowa lia mujimba mwapwa yipeka yitoma kuyatemukine, kumanyi lwota wasoloka mu kowa. Mutu kanapeme.
40Nyi kambu ja mutu hijamuhuluka ku mutwe, acho lwole, mwene kanapeme. 41Nyi kambu hijakatuka ha mutwe ngwe kutwala ku huma acho lwole ku huma. Mwene kanapeme. 42Ahoze nyi mu lwole wa ha mbanda-mutwe, chipwe wa ha huma, chitenda chasoloka kanda ngwe chitoma kanda chichila, musongo wa mbumba hiwasoloka ha lwole wa ha mbanda-mutwe chipwe lwole wa ha huma. 43Sasendote matala. Mba nyi kujimba cha chitenda chapwa kanda ngwe chitoma, kanda ngwe chichila, mu lwole wa ha mbanda-mutwe, hanji wa ha huma, ngwe musongo wa mbumba mu kowa ha mujimba; 44mba wapwa mukwa mbumba, wapwa wa luchisa. Sasendote mamuvuluka ngwenyi, Wa luchisa liakulu. Musongo wenyi wapwa mu mutwe wenyi.
45Mba mukwa mbumba mweswe mapwa ni we musongo, masonya mazalo jenyi, mafukula mutwe wenyi, mafuka muvumbo wenyi wa helu, makololoka ngwenyi, Luchisa! Luchisa! 46Kumakapwa wa luchisa matangwa eswe ali ni we musongo, iye wa luchisa. Kumakatwama zuwo ha ukawenyi haze ha chilombo.
47Nyi musongo wa mbumba mwapwa mu uzalo, chipwe uzalo wa wona wa panga, chipwe wa hina lipema litoma, 48hanji mu mutwalo, hanji mu mbandwola ya hina lipema litoma, hanji hina lia wona wa panga, hanji mu kupu, hanji chuma cheswacho cha kutonga ni kupu; 49nyi musongo wasoloka ngwe mbundu hanji uchila mu uzalo, chipwe mu mutwalo, hanji mu mbandwola, hanji mu kupu, hanji mu chuma cha kutonga ni kupu, wapwa musongo wa mbumba. Akaulweze kuli sasendote. 50Sasendote matala musongo, mba chuma chize Chikwete musongo machájilila mu zuwo matangwa shimbiali. 51Ha tangwa liamuchishimbiali matala musongo. Nyi musongo hiwatanda mu uzalo, mu mutwalo, hanji mu mbandwola, hanji mu kupu, yeswayo muyipwa milimo ya kupu, hi musongo wa mbumba ya mbongola, wapwa wa luchisa. 52Mba uzalo wa wona wa panga hanji wa hina lipema litoma, mawocha, chipwe musongo wapwa mu mutwalo chipwe mu mbandwola, chipwe cheswacho cha kupu, mumu musongo wa mbumba ya mbongola, kashika achoche ni kahia.
53Alioze nyi sasendote matala, kumanyi musongo kuwatanjile mu uzalo chipwe mu mutwalo, hanji mu mbandwola, hanji mu chuma cha kupu, 54mba sasendote matuma akakose chuma Chikwete musongo, akachájilile mu zuwo matangwa akwo shimbiali nawa. 55Sasendote matala chuma Chikwete musongo muze hachikosa. Chipwe musongo kuwatanjile nyi chipeka kuchisolo kwalumuka mu ulombo, wa luchisa. Akachoche mu kahia chipwe chipeka chapwa kulutwe, chipwe kunyima.
56Alioze nyi sasendote matala mba chipeka hichatepuluka ha kukosa, akapapulule chipeka mu uzalo, hanji mu kupu chipwe mu mutwalo, chipwe mu mbandwola. 57Nyi kulutwe muusoloka cheka nawa mu uzalo, chipwe mu mutwalo, hanji mu mbandwola, hanji mu chuma cheswacho cha kupu, mba wapwa musongo wa kutanda. Ukoche mu kahia chuma chize Chikwete musongo. 58Alioze nyi muze hakosa uzalo hanji chuma cha kupu musongo hiwakatuka mu mutwalo ni mu mbandwola, nukaukose chisuho chamuchiali mba hiwapema.
59Yino ye shimbi ya kutwala ku musongo wa mbumba mu uzalo wa wona wa panga, hanji wa hina lipema litoma, chipwe mu mutwalo, chipwe mu mbandwola, hanji wa chuma cha kupu kunyingika nyi wapwa upema nyi wa luchisa.
Currently Selected:
ULEVI 13: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
