ULEVI 11
11
1Yehova yamba kuli Mose ni Arone ngwenyi, 2Ambenu kuli A-Izalele ngwenu, Wano e akwa mwono munuhasa kulia hakachi ka tushitu eswe ali hashi. 3Waze eswe hakachi ka tushitu ali ni sende ja kupula, mba kakusekula, munuhasa kwalia. 4Hindu hakachi ka waze akusekula hanji kali ni sende ja kupula kunuchi kulia wano: kamelu, mumu kakusekula alioze keshi sende ja kupula. Akapwe wa luchisa kuli yenu. 5Ni sele, mumu kakusekula alioze keshi sende ja kupula. Akapwe wa luchisa kuli yenu. 6Ni mbalu, mumu kakusekula alioze keshi sende ja kupula. Akapwe wa luchisa kuli yenu. 7Ni ngulu, mumu kali ni sende ja kupula ahoze keshi kusekula. Akapwe wa luchisa kuli yenu. 8Yifwo yo kunuchi kuyilia, chipwe mijimba yo ya kufwa kunuchi kuyikwata. Akapwe a luchisa kuli yenu.
9Hakachi ka waze atwama mu meya munukalia waze ali ni yihehe ni mahalo wika. Wano wika munukaalia mu meya, hanji mu kalunga-lwiji hanji mu njiji. 10Waze eswe keshi ni yihehe ni mahalo, hanji mu kalunga-lwiji hanji mu njiji, hakachi ka waze eswe akwenda mu meya, ni akwa mwono eswe atwama mu meya akapwe a kuvwisa lwaji kuli yenu. 11Kumakapwa a kuvwisa lwaji kuli yenu. Kanda nulia yifwo yo, mba mijimba yo ya kufwa muyipwa ya kuvwisa lwaji kuli yenu. 12Kashitu mweswe keshi ni yihehe ni mahalo mu meya, akapwe wa kuvwisa lwaji kuli yenu.
13Hakachi ka tujita wano makapwa a kuvwisa lwaji kuli yenu. Kanda nwalia, mumu akuvwisa lwaji; ni pupa, ni chihungu, ni chiselele; 14ni hula-yula, ni kambuya nikulita ni vungu lienyi, 15ni chikwakwalo nikulita ni vungu lienyi, 16ni kakulu, ni chambamba, ni ngavota, ni chikoji nikulita ni vungu lienyi, 17ni chikulu, ni katovwi, ni chikungulu, 18ni chozo, ni toji, ni kuyu, 19ni chitwanjimbu, ni chitokola nikulita ni vungu lienyi, ni kolokokwe, ni kafukufuku.
20Waze eswe akwete mapulwa alioze kakukalala hashi ha molu awana akapwe a kuvwisa lwaji kuli yenu. 21Ahoze hakachi ka akwa mapulwa akukalala ha molu awana munuhasa kulia waze ali ni malinja a kutumbuka no hashi helu lia yiliato nawa. 22Te wano munuhasa kulia, ngwami, Makumbi nikulita ni vungu lio, ni mapasu nikulita ni vungu lio, ni tuzombweta nikulita ni vungu lio, ni tuzeze nikulita ni vungu lio. 23Ahoze akwa kukalala eswe akwete mapulwa, akwenda ni molu awana akapwe a kuvwisa lwaji kuli yenu.
24Yuma yino muyikanuchisa, ngwami, Mweswawo makakwata ku mijimba yo ya kufwa makapwa wa luchisa ndo chingoloshi. 25Mweswawo makambata chimwe cha ku mijimba yo ya kufwa makakosa mazalo jenyi, mba makapwa wa luchisa ndo chingoloshi. 26Kashitu mweswe kali ni chiliato cha kupula ahoze keshi sende, chikwo nawa keshi kusekula, akapwe wa luchisa kuli yenu. Mweswawo maakwata malichisa. 27Hakachi ka tushitu akwenda ha molu awana waze ali ni kata makapwa a luchisa kuli yenu. Mweswe makwata ku mijimba yo ya kufwa makapwa wa luchisa ndo chingoloshi. 28Yoze makambata mijimba yo ya kufwa makosa mazalo jenyi mba iye makapwa wa luchisa ndo chingoloshi, mumu o akwa luchisa kuli yenu.
29Hakachi ka akwa kukalala hashi akapwe wa luchisa kuli yenu wano: ni mutondo, ni tumbi, ni chitombwe nikulita ni vungu lienyi, 30ni kasulu, ni chiku, ni kasengelekwekwe, ni musevu, ni nongwena. 31Wano te makapwa a luchisa kuli yenu hakachi ka akwa kukalala. Mweswe makaakwata muze te hafwa makapwa a luchisa ndo chingoloshi. 32Kweswako makaholokela muze te hafwa muchipwa cha luchisa, chipwe chikwachilo cha mutondo chipwe uzalo, chipwe kupu, chipwe njeke, chuma cheswacho cha milimo yeswayo, chatamba kuchisa mu meya, muchipwa cha luchisa ndo chingoloshi mba muchipema. 33Nyi umwe wayo maholokela mu chikwachilo cha uma, cheswacho chilimo muchikapwa cha luchisa ni che chikwachilo munuchishiha. 34Ya kulia yeswe haze meya ano hanaholokela muyikapwa ya luchisa, mba ya kunwa yeswe muyikapwa mu chikwachilo cheswacho cha luchisa muyikapwa ya luchisa. 35Chuma cheswacho haze chihanda chimwe cha mijimba yo ya kufwa muyikaholokela muchikapwa cha luchisa, chipwe forno hanji jiko akayishihe tuyipinji mumu yapwa ya luchisa mba kuli yenu muyikapwa ya luchisa. 36Alioze fuji lia meya hanji shima lia meya anji o makapema, alioze mweswawo makakwata ku mijimba yo ya kufwa halichisa. 37Nyi kachi chimwe cha ku mijimba yo ya kufwa muchikaholokela ha mbuto yize nunambe kukuwa muyikapema. 38Alioze nyi hasa meya ha mbuto mba chimwe cha ku mijimba yo ya kulwa muyikaholokelaho, muyikapwa ya luchisa kuli yenu.
39Nyi umwe kashitu mafwa yoze te wa kulia kuli yenu, mweswe makwata ku mujimba wenyi wa kufwa mapwa wa luchisa ndo chingoloshi. 40Ni yoze makalia mujimba wenyi wa kufwa makakosa mazalo jenyi mba makapwa wa luchisa ndo chingoloshi. Mweswe makambata mujimba wenyi wa kufwa makakosa mazalo jenyi mba makapwa wa luchisa ndo chingoloshi.
41Mba kashitu mweswe wa kukalala ha mavu akapwe wa kuvwisa lwaji kuli yenu. Kanda nukamulia. 42Mweswawo kakulikoka ha jimo lienyi, ni yoze wakwenda ha molu awana, ni waze ali ni molu anji anji—te a ku mavungu eswe akulikoka ha mavu, kanda nukaalia, akapwe a kuvwisa lwaji kuli yenu. 43Kanda nukalipwisa yenwene a lwaji kuli kashitu mweswawo wa kulikoka, chipwe kulichisa no hanga nukalipihise no, ka. 44Mumu yami Yehova Zambi yenu, kashika munukalihandununa nukalisele ku usandu, se ni yami nguli musandu. Kanda nukalichisa ni kashitu niumwe mukwa kulikoka ha mavu. 45Mumu yami Yehova nanuchijile ku chifuchi cha Engitu ngukapwe Zambi yenu. Kashika munukapwa asandu, se ni yami nguli musandu.
46Yino ye shimbi ya tushitu, ni ya tujila, ni ya akwa mwono eswe akwenda mu meya, ni ya tushitu eswe akukalala hashi. 47Nukahandunune hakachi ka akwa luchisa ni apema; hakachi ka mukwa mwono yoze munuhasa kumulia ni mukwa mwono yoze kunuchi kuhasa kumulia.
Currently Selected:
ULEVI 11: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
