MUKANDA Asonekene TIANGU 2
2
1Mandumbu jami, kanda nukapwa ni katonde hamwe ni Ufulielo wa Mwene Yesu Kristu, mwe Mwene wa uhenya. 2Mumu kachi umwe lunga manjila mu sunangonga yenu kanazala kazeya ka oru, ni hina lia mukambo lia kutemuka, ni chiswale manjila nawa kanazala mazalo api, 3nyi munutala kuli yoze unazala hina lia mukambo wa kutemuka, munwamba ngwenu, Twama yena hano hapema; munwamba kuli chiswale ngwenu, Yena mana aku, hanji ngwenu, Twama kushi lia chitwamo cha yiliato yami; 4kunwasele katonde hakachi ka yenwene, nyi? Kunwalipwishile sopi ni manyonga ja ungulungulu, nyi? 5Ivwenu, mandumbu jami a zango, ngwami, Zambi te katongwele yiswale a hashi pichi ni Ufulielo, ni maswana ja wanangana, uze walakenyene kuli waze akumuzanga nyi? 6Alioze yenu hinunasaula chiswale. Pichi keshi kunumwesa lamba, nyi? Keshi kunukoka ku usopelo, nyi? 7Keshi kushililika jina lize lilemu ananuluku nalio, nyi?
8Alioze kachi nwakulinga shimbi ya ku wanangana nikulita ni Chisoneko ngwo, Ukazange mwenyembo we ngwe wakulizanga yena mwene, kachi nwakulinga kanawa. 9Alioze kachi munupwa ni katonde, kachi munuvulumuna, makukumika ku shimbi ngwe yitanguke. 10Mumu mweswe mafunga shimbi jeswe lukombo, hindu matangula chihanda chimuwika, hahia ha jeswe. 11Mumu yoze wambile ngwenyi, Kanda ulinga utanji, wambile nawa ngwenyi, Kanda ushiha. Achi, kachi yena kushi kulinga utanji, aiioze mushiha, hiwapwa chitanguke cha shimbi. 12Chocho hanjikenu, chocho lingenu, nikulita ngwe waze makaapatwila ku shimbi ya utuswilo. 13Yoze kalwezele keke kumakatambula upatwilo uze kuushi keke: keke kuyakukumba upatwilo.
14Kufumbuka chika, mandumbu jami, kachi umwe mamba ngwenyi, Ufulielo nguli nawo, aiioze keshi yitanga? Ufulielo muuhasa kumulamwina, nyi? 15Achi, kachi ndumbu hanji pangi mapwa ni uvu, mahona kulia cha tangwa ha tangwa, 16mba umwe wa kuli yenu mamba kuli ayo ngwenyi, Nuye kanawa, nuvume, nukute; aiioze keshi kuhana yuma yize chatamba mujimba kupwa nayo; kufumbuka chika? 17Chizechene nawa Ufulielo, kachi kuushi yitanga, kachi kuunafu ukawawo.
18Alioze umwe mamba ngwenyi, Yena Ufulielo uli nawo, ni yami yitanga nguli nayo; ngulweze Ufulielo we kuushi yitanga, ni yami ku yitanga yami mungukulweza Ufulielo wami. 19Yena Unafuliela ngwe Zambi kapwa umuwika; unalingi kanawa: andemoniu nawa kakufuliela nikuchikima. 20Alioze unazange kunyingika, yena mutu wamokomoko, ngwe Ufulielo kuushi yitanga kuunafu, nyi? 21Te kasambishile kulwetu Apalahama ku yitanga muze alambwile mwanenyi Izake ha chilumbilo, nyi? 22Unamono ngwe Ufulielo wenyi walingile hamwe ni yitanga yenyi, ngwe ku yitanga apwishile Ufulielo wenyi ungunu. 23Chisoneko chamanunukine chize chinambe ngwo, Apalahama wafulielele Zambi, mba achalwile kuli iye ha ululi; iye amulukile ngwo, Kasendo ka Zambi. 24Nunamono ngwe masambisa mutu ku yitanga, ni hi ku Ufulielo wika ko. 25Chizechene nawa kasambishile chikoi Rahape ku yitanga, muze azekele tunganda, aakatwishile ku jila yeka, nyi? 26Mumu chizechene ngwe mujimba kuushi Spiritu kuunafu, chocho nawa Ufulielo kuushi yitanga kuunafu.
Currently Selected:
MUKANDA Asonekene TIANGU 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
