MUKANDA Asonekene TIANGU 1
1
1Yami Tiangu, ndungo ya Zambi kanda ya Mwene Yesu Kristu,
Ku mavungu kumi ni aali aze anamwangashana kweswe:
Ngunanumeneka.
2Mandumbu jami, muze yeseko yeka ni yeka muyinuwana, chinyongenu kupwa uwahililo weswe; 3se nunanyingika kweseka cha Ufulielo wenu kuchakulinga kunyongonona. 4Alioze kunyongonona chikapwe ni chitanga chacho chingunu, hanga nukapwe angunu, a muwundu, nikuhona nichimwe.
5Alioze kachi umwe wa kuli yenu mahona mana, akete kuli Zambi, yoze wakuhana kuli eswe ni kuvungumuna, keshi kuchoka; mba kumakamwaho. 6Alioze akete ni Ufulielo, kanda ayambashana; mumu yoze mayambashana mapwa ngwe mukanya wa ku kalunga-lwiji, wa kuhehuka ni fuji ni wa kufuza. 7Mumu yoze mutu kanda akashinginyeka ngwe makatambula chuma chimwe kuli mwe Mwene. 8Mutu wa mbunge jiali, wakukokoloka mu majila jenyi eswe.
9Alioze ndumbu mukehe akalisambe muze mamulemesa: 10ni pichi akalisambe muze mamulelesa: mumu ngwe yitemo ya mwambu, kumakahwa. 11Mumu tangwa mulivumbuka ni chivukuminya chalio, mulilelesa mwambu; ni chitemo chawo muchiholoka, ni upeme wacho muuhwa: chocho pichi nawa makajimuka mu mawende jenyi.
12Kawaha mutu yoze manyongonona mu cheseko; mumu muze hamusela Shindakenyo yipema, makatambula chipangula cha mwono, chize Mwene hanalakenya kuli waze akumuzanga. 13Mutu niumwe muze mamweseka kanda aamba ngwenyi, Kanangweseka kuli Zambi; mumu Zambi kechi kuhasa kumweseka ni yuma yipi, iye mwene keshi kweseka niumwe. 14Alioze mutu ni mutu mamweseka, muze mamutwala ku usolo wenyi mwene, muze mamusongojola. 15Mba usolo muze muuseseka, muusema shili: ni shili muze muyikola, muyisema kufwa.
16Kanda nulionga, mandumbu jami a zango. 17Kuhana cheswe chipema ni yawana yeswe yingunu kuyakuhulumuka kwilu, kuli mwe Tato ya pangu, muli iye kumushi kwalumuka, chipwe Chizulie cha kutewuluka. 18Nikulita ni upale wenyi mwene watusemene ku liji lia umwenemwene; hanga tukapwe mulali umwe wa mihuko yitangu ya ku yitanga yenyi.
19Nunanyingika chino, mandumbu jami a zango. Alioze mutu ni mutu alipupwise kwivwa, aiioze apwe makoke kuhanjika, makoke kutenuka; 20mumu utenu wa mutu kuushi kulinga ululi wa Zambi. 21Kashika, mbilenu majilo eswe ni kulumbama cha uhuka, tambulenu ni kushimbika liji lize alitumbile muli yenu, lienalio kuliakuhasa kulamwina mbunge jenu.
22Alioze pwenu akwa kulinga lie liji, hi akwa kwivwa wika ko, ngwe nunaliongo yenwene. 23Mumu kachi umwe mapwa mukwa kwivwa lie liji, hi mukwa kulinga ko, kachi malifwa ni mutu yoze matala meso jenyi mu katalilo: 24mumu malitala, maya, haze hene mavulama chize apwa ku meso. 25Alioze yoze matala kanawa mu shimbi yingunu ya utuswilo, mba manyongononamo, se iye kapwile mukwa kwivwa ni kuvulama, aiioze mukwa kulinga chitanga, yono kumakawaha ha kulinga chenyi.
26Kachi umwe malishinginyeka kupwa mukwa kuwayila, shimbu keshi kuhombola limi lienyi, aiioze kakwonga mbunge yenyi mwene, uwayilo wa yono wamokomoko. 27Uwayilo upema kuushi luchisa kumeso ja Zambi kanda ja mwe Tata, uno, Kunangisa ana-ashiwa ni twamishi ja mapwo mu luyinda wo, ni kulitunga mwene keshi chipeka ku yuma ya hano hashi.
Currently Selected:
MUKANDA Asonekene TIANGU 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
