HOZEA 5
5
1Enu asasendote, ivwenu chino!
Enu munyachi wa Izalele, panjikenu!
Enu munyachi wa mwanangana, halakanenu!
Upatwilo unatwala kuli yenu,
mumu hinwapwa kambwila ku Mizepa,
hinwapwa wanda wa kuta ku Tabore.
2Akwa kukolema hatwala kusuku ni yitapo,
alioze mungukaakanjisa eswe.
3Ngunanyingika Eframe,
Izalele kahashile kunguswamina,
mumu, yena Eframe, hiwalinga ukoi;
ena Izalele hiwalichisa.
4Yitanga yo kuyaatayijile kuhiluka kuli Zambi yo.
Mumu mbunge ja ukoi ali najo,
chikwo nawa Yehova kamunyingikine.
5Kulengumuka cha Izalele chakumushindakenya kumeso jenyi;
Eframe matalinga ni uhie wenyi;
Yunda nawa matalinga hamwe no.
6Makaya kufupa Yehova
ni mapanga jo ni ngombe jo,
alioze kechi kamuwana;
mumu hanakatuka kuli ayo.
7Halinga ni mafwefwe kuli Yehova,
mumu hasema ana ja yilambala.
Haliapwila makahwa ni kakweji mwaha hamwe ni minda yo.
8Humuna njalamina mu Ngibia;
humuna chitavwi mu Rama.
Sunga utoweze atu ku Mbete-Avene;
ena Mbenjamine, chikima!
9Eframe muyalumuka ya hululu
ha tangwa lia kastigu.
Ngunatoweza chuma chize chinakolo
hakachi ka minyachi ya Izalele.
10Alemu ja A-Yunda hanalumuka
ngwe akwa kututulula njiza.
Munguzukula ufwatulo wami hali ayo ngwe meya.
11Eframe kanamupinjisa, kanamufwenye mu upatwilo
mumu wasele mbunge yenyi kukaula yuma yamokomoko.
12Kashika napwa kuli Eframe ngwe ndulu,
ku munyachi wa Yunda napwa ngwe kafulefule.
13Muze Eframe hamona musongo wenyi;
muze Yunda hamona mbandu yenyi,
mba Eframe wayile ku Asuria;
yatuma kuli mwanangana wa kulitachika.
Alioze aye kahashile kukuwuka
chipwe kuwuka mbandu ye.
14Mumu mungupwa ngwe ndumba kuli Eframe
mungupwa ngwe mwevu wa ndumba ku munyachi wa Yunda.
Yami, yami mwene mungupapulula ni kukatukako.
Mungumbata mba niumwe malamwina.
15Munguhiluka nawa kuma kwami,
ndo matayiza uhie wo ni kufupa meso jami.
Mu luyinda wo mangufupa ni mbunge yeswe, ngwo,
Currently Selected:
HOZEA 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
