HOZEA 10
10
1Izalele kapwa ngwe mutondo wa uva wa tachi
uze wakwima mihuko yawo.
Ha kwoka mihuko yenyi
yokesa yilumbilo yenyi.
Ha kuwaha chifuchi chenyi
chocho yapemesa manguji jenyi.
2Mbunge jo ja mafwefwe
kashika chaatamba kumbata uhie wo.
Yehova makapuzula yilumbilo yo
nikwonwona manguji jo.
3Mumu haliapwila mamba ngwo,
Kutushi mwanangana niumwe
mumu kutwevwilile woma Yehova,
kashika mwanangana atulingile yika?
4Kakuhanjika maliji amokomoko;
kakukolesa usendo ni mashingo keshi tachi,
kashika upatwilo kuwakusoloka ngwe yiputa ya utende
mu mihanga ya mu minda.
5Akwa Samaria kakuchikimina
mwana-ngombe wa ku Mbete-Avene.
Atu jenyi makamulilila
ni asasendote jenyi a mahamba mamuhula mbimbi
mumu ha uhenya wenyi uze hiwamukatuka.
6Ewa che chuma chene makachimbata ku Asuria
akachitenge mulambu kuli mwanangana wa kulitachika.
Makakolesa Eframe sonyi;
Izalele makevwa sonyi ha punga yenyi.
7Mwanangana wa Samaria makanonga,
ngwe chipa cha mutondo ha lwiji.
8Manangamo a Avene, we mutenga wa Izalele,
makaonwona.
Mingonga ni mikalale muyikasoka ha yilumbilo,
mba makamba ku milundu ngwo, Tufukenu.
Makamba ku mindundena ngwo, Holokenu hali yetu.
9Enu A-Izalele, chize ku matangwa a Ngibia hinwavulumuna.
Kwenako halikoleza nacho.
Jita kuyichi kaawana te mu Ngibia?
10Mungukeza kulimika ni wano akwa kupiya nikwalamba kastigu;
mba mavungu makakunguluka kulimika no
muze makaalamba kastigu ha milonga yo yiali.
11Eframe wapwile te chimbembe cha ngombe wa kulongesa.
Wazangile chikolo kuzungula mbuto
kashika chapinjishile kota yenyi yipema.
Alioze mungulema Eframe ye kanga.
Chatamba Yunda kukoka sharua;
chatamba Yakomba kulipupila mavu mwene.
12Likuwilenu mbuto ya ululi;
helenu mihuko ya utu wa zango;
chipenu mavu aze helila;
mumu mwaka wa kufupa Yehova hiweza
hanga akeze nikununokesa ulamwino.
13Enu hinwalima uhenge;
hinwacha upatwilo upi;
hinwalia mihuko ya mahuza.
Se hinwafuliela matemba jenu a jita
ni wunji wa tujita twenu,
14kashika Chizungozungo cha jita muchisoloka
hakachi ka atu jenu.
Yihunda yenu yeswe ya kukolesa mayonwona,
chizechene ngwe Shalamane yonwona Mbete-Arabele ha tangwa lia jita.
Anaye te aafwenyene hamwe ni ana jo.
15Ni yenu, munyachi wa Izalele, chocho manulinga
mumu ha ungulungulu wenu unene.
Mu kangonga mwe mwanangana wa Izalele
mamutetaho ngwi.
Currently Selected:
HOZEA 10: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
