A-HEPREU 5
5
1Mumu sasendote mukwa lutwe mweswe wa kusakula hakachi ka atu, mamusela hali atu ha yuma ya kutwala kuli Zambi, hanga akalambule, ni yawana, ni yitapo ha milonga: 2yoze mahasa kupwa ni uhumikizo hali akwa kwalajala ni akwa kupianguka, se iye mwene nawa mukwa kukokoloka. 3Mba ha mukunda wa chuma chino chamutamba, chizechene ngwe hali atu, chocho nawa hali iye mwene, kulambula ha milonga. 4Niumwe malianjila ulemu uno hali iye mwene, shina muze mamutambika kuli Zambi, chizechene ngwe Arone nawa.
5Chocho Kristu nawa kalichichimiekene mwene kupwa sasendote mukwa lutwe, aiioze yoze wambile kuli iye ngwenyi,
Mwanami yena,
tangwa lino hingunakuseme:
6nikulita ngwe anambe nawa mu chihanda chikwo ngwenyi,
Yena uli sasendote ndo ku miaka ya mutolo,
nikulita ni ngango ya Melekizeteke.
7Mwenawo ha matangwa ja musunya wenyi hashi, se walambwile yilemba ni kuliumba hamwe ni kuteta cha ngolo ni masoji kuli yoze te wahasa kumulamwina ku kufwa; apanjikile kuli iye mumu ha uwayilo wenyi. 8Chipwe wapwile Mwana, hindu walilongesele kwononoka ku yuma yize evwilile lamba. 9Mba se hanamupwisa mungunu iye kapwa mwe Kaputu ka ulamwino wa mutolo kuli waze eswe akumwononokena. 10Kanamutambika kuli Zambi ngwenyi, Sasendote mukwa lutwe nikulita ni ngango ya Melekizeteke.
11Ha kutwala kuli iye yikuma yinji tuli nayo ya kwamba, yikalu kuyilumbununa, se hinwapwa tujika matwi. 12Mumu muze te ha mukunda wa miaka Chanutamba kupwa alongeshi, chinatambe umwe kunulongesa uputukilo wa maliji a Zambi; hinwapwa waze chaatamba kutambula yamwa, hi kulia cha tachi ko. 13Mumu mweswe matambula yamwa, kalongolokele mu liji lia ululi; mumu iye mwana-kemba. 14Alioze kulia cha tachi kuchapwa hali waze hakola, waze mumu ha mukunda wa kulijilila, mana jo akwete a kulifumba, akase chinyingi hakachi ka chize chipema ni chipi.
Currently Selected:
A-HEPREU 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
