HABAKUKE 1
1
1Liji lia Zambi lize alimwene kuli profeta Habakuke.
2Yehova ndo mwiji muka munguteta ungukwase
mba yena kushi kwivwa?
Ndo mwiji muka munguteta ngwami, Upupilo!
alioze yena kushi kulamwina?
3Kuchi te wakungumwesa chipi?
Kuchi te meso jami akutala ku lamba wika?
Kwonwona ni upupilo yili kumeso jami;
kulitachika ni kuhamika yinasoloka.
4Chocho shimbi yakokoloka
ni upatwilo wa kulita kuushi kumoneka.
Mumu yingulungulu kanaseleka akwa ululi;
kashika kakuhengesa upatwilo.
5Tala hakachi ka mavungu umone;
komoka ni kulishimwoka.
Mumu ngunalingi milimo yimwe ha matangwa je
ena kuchi kufuliela chipwe makwambulwilayo.
6Mumu ngunavundula A-Kaletea
vungu lisasu lia kulipupula
kakwenda ndusu utohe wa hashi
akapunde mazuwo hi nijo ko.
7Kole ni mwongo, akwa kuchikimisa atu;
upatwilo wo ni ulemu wo unasoloka muli ayo ene.
8Tuvwalu two kanatambuka kuhiana yangwi;
kanatenuka kuhiana tungunga a ha chingoloshi;
akwa tuvwalu kanahange ni kulengumuka.
Ewa akwa tuvwalu kusuku anakatuka;
kanahumuka ngwe pupa kakutambuka kwenyeka.
9E eswe upupilo anejila;
mwongo wo unaatetekela.
Kakukunga funge ngwe masekeseke.
10Kakulelesa mianangana,
kakuhehesa akwa kuyula.
Yihunda yeswe ya kukolesa kakuyiseha
mumu kakutambika mavu nikuyitambula.
11Mba kakupalika ngwe fuji, kakuhiana;
akwa uhie hatenga tachi jo zambi yo.
12Yehova Zambi yami! Mwe Musandu wami!
Hi uli wa mutolo ko?
Kashika kutuchi kufwa.
Yehova hiunaatongola akapwe kastigu;
yena lwe Luliwe, hiunaakolesa atufumbe.
13Meso je apema naye, kahashile kumona yipi;
kwahashile kutala uhenge.
Kuchi te wakutala malunga a mafwefwe?
Kuchi te wakuhola muze chingulungulu mamina
mutu yoze wamuhiana ni ululi?
14Mumu wakupwisa atu ngwe yishi a mu kalunga-lwiji,
ngwe tushitu a kukalala waze keshi ni mukwa kwayula.
15Kakwalowa eswe ni kazambu,
kakwambulumunamo ni wanda wenyi.
Kakwakunga ni tambi lienyi
chocho kakuwahilila ni kulikwiza.
16Kashika kakushihila yitapo wanda wenyi,
nikwochela insensu tambi lienyi
mumu kwenako azukila yuma yipema
ni kulia chenyi chinawaha.
17Kashika azukule te wanda wenyi matangwa eswe
nikushiha mavungu ndo ku miaka ni keke ka?
Currently Selected:
HABAKUKE 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
