KUTUHUKA 27
27
1Ukalinge chilumbilo cha mutondo wa mukesha. Usuhe wacho wa mbandu jitano. Utohe wacho wa mbandu jitano. Usuhe ni utohe wacho ukalite ndwa lume. Chizundamo cha che chilumbilo chikapwe cha mbandu jitatu. 2Mbinga jacho nawa ukajisongele ku mbango jiwana jacho. Mbinga jacho ja kusonga ku mutondo umuwika ni che chilumbilo. Ukalamikeho unengu. 3Ukafule ndeho jacho ja kuchiza najo uto wacho, ni mapá jacho, ni mbasia jacho, ni nguto ja misako jacho, ni yikombelo yacho. Yikashi yo yeswe ukayifule ni unengu. 4Ukachifulile sambu ja unengu ja kusepekenya mba ha je sambu ku mbango jiwana jajo ukafulile ngo jiwana ja unengu. 5Ukajinjise mushi lia mukomo wa chilumbilo hanga je sambu jikapwile mukachi ka chilumbilo. 6Ukasonge mikambo ya chilumbilo, mikambo ya mutondo wa mukesha. Ukalamikeho unengu. 7Ukanjise ye mikambo yacho mu ngo. Mikambo yikapwe ha malumbu ja chilumbilo ya kuchimbachila. 8Ukachisonge ni matabua, muchima wacho mwamokomoko, chizechene ngwe nakulwezele ha mulundu, chocho akachisonge.
9Ukatunge yize ya tabernakulu. Ku lumbu lia ku Sule kukapwe ku yize mahina apema atoma a kuzezeleka. Ku lumbu limuwika usuhe wako ukapwe wa kulakaji lia mbandu. 10Manguji jayo akapwe makumi aali. Yimanyino yo ya unengu makumi aali. Je ngo ja ku manguji ni mikambo yajo yikapwe ya prata. 11Chizechene nawa ku lumbu lia ku Norte kukapwe mahina a kuzezeleka. Usuhe wo wa kulakaji lia mbandu. Manguji jo te makumi aali. Yimanyino yo ya unengu makumi aali. Je ngo ja ku manguji hamwe ni mikambo yo, yeswe ya prata. 12Mba ha utohe wa ye yize ku lumbu lia kutalikisa ku Chitokelo kukapwe mahina a kuzezeleka a makumi atano a mbandu. Manguji jo kumi. Yimanyino yo kumi. 13Utohe wa ye yize ku lumbu lia kutalikisa ku Chivumbuko ukapwe wa makumi atano a mbandu. 14Mahina a kuzezeleka a ku lumbu limwe lia chikolo akapwe a kumi lia mbandu ni mbandu jitano. Manguji jo atatu. Yimanyino yo yitatu. 15Mba ku lumbu likwo kukapwe mahina a kuzezeleka a kumi lia mbandu ni mbandu jitano. Manguji jo atatu. Yimanyino yo yitatu. 16Ku chikolo cha yize kukapwe hina lia kufukako lia makumi aali a mbandu, lilauluka, ni lia ufungo, ni lia ngengu, ni lipema litoma, milimo ya mukwa kwola. Manguji jo awana. Yimanyino yo yiwana. 17Manguji eswe a yize kujingilika kweswe akapwe a kukolesa ni mikambo ya prata. Ngo jo ja prata. Yimanyino yo ya unengu. 18Usuhe wa yize ukapwe wa kulakaji lia mbandu. Utohe wayo ndusu ukapwe wa makumi atano. Chizundamo chayo cha mbandu jitano ja mahina apema atoma. Yimanyino yajo ya unengu. 19Yikashi yeswe ya tabernakulu, ni ya milimo yayo yeswe, ni mbambo jeswe jayo, ni mbambo ja yize, yeswe yikapwe ya unengu.
20Utumine A-Izalele akakunehene maji apema a kusohola a azeite a lutemo hanga ndeya yikatemuke matangwa eswe. 21Arone ni anenyi a malunga akayilulikise chize ku chingoloshi ndo ku kucha kumeso ja Yehova mu mbalaka ya chikungulwila, haze lia chikalakala cha hina chili kulutwe lia ye shindakenyo. Chikapwe shimbi ya mutolo ndusu yisemuko yeswe hali A-Izalele.
Currently Selected:
KUTUHUKA 27: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
