DANIEL 3
3
1Mwanangana Nabukanezore walingile umwe kaponya wa oru, Chizundamo chenyi makumi asambano a mbandu, ni utohe wenyi mbandu jisambano. Yamumika ha chana cha Dura mu provincia ya Babilonia. 2Mba mwanangana Nabukanezore yatuma kukungulula yilolo, ni tupitau, ni anguvulu, ni tuliamanga, ni akwa kufunga mbongo, ni sopi, ni ngaji, ni akwa kuyula eswe a mu provincia eze ku tangwa lia kutumbikila kaponya, yoze mwanangana Nabukanezore hamika. 3Mba yilolo, ni tupitau, ni anguvulu, ni tuliamanga, ni akwa kufunga mbongo, ni sopi, ni ngaji, ni akwa kuyula eswe a mu provincia yeza ku tangwa lia kutumbikila kaponya yoze mwanangana Nabukanezore hamika. Yamana kumeso ja kaponya yoze Nabukanezore hamika. 4Mukwa mutambi yamba ni liji linene ngwenyi, Enu mavungu, ni minyachi, ni malimi, kananwehe shimbi ngwo, 5Muze munwivwa liji lia chitavwi, ni lundembo, ni kalialia, ni chisaji cha kusa, ni ngaita, ni milali yeswe ya yisaji munufulamana ni kuwayila kaponya ka oru yono mwanangana Nabukanezore hamika. 6Mweswawo kafulamanyine ni kuwayila, mamunyasa haze hene mu lutengo wa kahia ka kulengenya. 7Kashika muze mavungu eswe evwile liji lia chitavwi, ni lundembo, ni kalialia, ni chisaji cha kusa, ni ngaita, ni milali yeswe ya yisaji, mavungu eswe, ni minyachi yeswe, ni malimi eswe afulamanyine ni kuwayila kaponya ka oru yoze mwanangana Nabukanezore hamika.
8Kashika ha mwaka uze amwe A-Kaletea yaya ni kusuma A-Yunda ni kole. 9Yamba kuli mwanangana Nabukanezore ngwo, Vulie, mwanangana. 10Yenu mwanangana hinwakolesa shimbi ngwenu, Mutu mweswe ha kwivwa liji lia chitavwi, ni lundembo, ni kalialia, ni chisaji cha kusa, ni ngaita, ni milali yeswe ya yisaji mafulamana ni kuwayila kaponya ka oru; 11hi mweswawo kafulamanyine ni kuwayila mamunyasa mu lutengo wa kahia ka kulengenya. 12Kwali amwe A-Yunda enu hinwaasela helu lia yiyulo ya provincia ya Babilonia: Shadrake, ni Meshake, ni Abedenego. Mwanangana, wano malunga kanusele mbunge; kalingilile mazambi jenu, kawayilile kaponya ka oru yoze hinwamika.
13Kashika Nabukanezore yatenuka ni ufwatulo wahiana. Yatuma kusaka Shadrake, ni Meshake, ni Abedenego. Yaneha malunga wano kumeso ja mwanangana. 14Nabukanezore yamba kuli ayo ngwenyi, Enu Shadrake, ni Meshake, ni Abedenego, chamwenemwene enu kunushi kulingila mazambi jami, chipwe kuwayila kaponya ka oru yono hinamika? 15Nyi numutá, muze munwivwa liji Iia chitavwi, ni lundembo, ni kalialia, ni chisaji cha kusa, ni ngaita, ni milali yeswe ya yisaji, nukafulamane nukawayile kaponya yono hinalinga, chipema. Alioze nyi kunusolo kuwayila, manunyasa haliapwila mu lutengo wa kahia ka kulengenya, mba mwe zambi yoze mahasa kunulamwina ku moko jami iya?
16Shadrake, ni Meshake, ni Abedenego yakumbulula kuli mwanangana ngwo, Nabukanezore, ha kutwala ku chikuma chino, kuchatutambile kukumbulula nichimwe. 17Nyi chapwa chocho, Zambi yetu yoze twakulingila mahasa kutupulula ku lutengo wa kahia ka kulengenya, mba kumakatupulula ku kwoko lia yenu mwanangana nawa. 18Alioze nyi ka, nyingikenu mwanangana, hindu kutuchi kulingila mazambi jenu, chipwe kuwayila kaponya ka oru yono hinwamika.
19Henaho Nabukanezore yafuluka ni ufwatulo, ni meso jenyi alumukine kulimika ni Shadrake, ni Meshake, ni Abedenego. Yatuma kuweza kahia yisuho shimbiali helu lia kahia ka matangwa akwo. 20Yatuma amwe akwa ndundo hakachi ka maswalale jenyi akase Shadrake, ni Meshake, ni Abedenego, akaanyase mu lutengo wa kahia ka kulengenya. 21Mba yakasa e malunga mu mahina jo, ni yikuto yo, ni matepa jo, ni mazalo jo akwo, yaanyasa mu lutengo wa kahia ka kulengenya. 22Mumu ha kukola cha shimbi ya mwanangana lutengo wasasaminyine kuhiana, kashika mulengi wa kahia washihile akwa kunyasa Shadrake, ni Meshake, ni Abedenego. 23Wano malunga atatu, Shadrake, ni Meshake, ni Abedenego aholokelele a kukasa muchima lia lutengo wa kahia ka kulengenya.
24Henaho mwanangana Nabukanezore yakomoka, yakatuka kapupushi. Yamba kuli tuliamanga twenyi ngwenyi, Kutwambilile malunga atatu a kukasa mu kahia? O yakumbulula kuli mwanangana ngwo, Chamwenemwene, mwanangana. 25Aye yamba ngwenyi, Alioze ngunamono malunga awana keshi kukasa, kanende mwe muchima lia kahia. Kevwile yikola, ni kusoloka cha wamuchiwana chapwa ngwe umwe mwana zambi.
26Nabukanezore yakundama ku chikolo cha lutengo wa kahia ka kulengenya, yamba ngwenyi, Shadrake, ni Meshake, ni Abedenego, tuvumbi twa Zambi Chitunda, tuhukenu, nwize kuno! Mba Shadrake, ni Meshake, ni Abedenego yatuhuka mu kahia. 27E yilolo, ni tupitau, ni anguvulu, ni tuliamanga ja mwanangana yakunguluka, yamona chize kahia kukapwile ni tachi nijimwe ha mijimba ya malunga wano. Kambu ja ha mitwe yo kujapapiwile; mahina jo kapihile, chipwe vumba lia kahia kuliapwile hali ayo ni he hakehe. 28Nabukanezore yamba ngwenyi, Zambi ya Shadrake, ni Meshake, ni Abedenego afumane, yoze hatuma mungelo wenyi, hapulula tuvumbi twenyi akwa kujikijila hali iye, waze alelesele shimbi ya mwanangana nikwecha mijimba yo, mumu kasolo kulingila umwe zambi shina Zambi yo, chipwe kumuwayila. 29Kashika ngunakolesa shimbi ngwami, Nyi vungu limwe, hanji munyachi umwe, hanji limi limwe mahanjika chimwe chuma cha kulimika ni Zambi ya Shadrake, ni Meshake, ni Abedenego, makaapapulula kwoko ni kulu ni mazuwo jo maapuzula. Mumu kukushi niumwe zambi mukwo yoze mahasa kupulula chocho. 30Mba mwanangana yasenyesa kulutwe nawa Shadrake, ni Meshake, ni Abedenego, mu chiyulo cho mu provincia ya Babilonia.
Currently Selected:
DANIEL 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
