Popular Bible Verses from DANIEL 3

Share

Shadrake, ni Meshake, ni Abedenego yakumbulula kuli mwanangana ngwo, Nabukanezore, ha kutwala ku chikuma chino, kuchatutambile kukumbulula nichimwe. Nyi chapwa chocho, Zambi yetu yoze twakulingila mahasa kutupulula ku lutengo wa kahia ka kulengenya, mba kumakatupulula ku kwoko lia yenu mwanangana nawa. Alioze nyi ka, nyingikenu mwanangana, hindu kutuchi kulingila mazambi jenu, chipwe kuwayila kaponya ka oru yono hinwamika.

Aye yamba ngwenyi, Alioze ngunamono malunga awana keshi kukasa, kanende mwe muchima lia kahia. Kevwile yikola, ni kusoloka cha wamuchiwana chapwa ngwe umwe mwana zambi.

Nabukanezore yamba ngwenyi, Zambi ya Shadrake, ni Meshake, ni Abedenego afumane, yoze hatuma mungelo wenyi, hapulula tuvumbi twenyi akwa kujikijila hali iye, waze alelesele shimbi ya mwanangana nikwecha mijimba yo, mumu kasolo kulingila umwe zambi shina Zambi yo, chipwe kumuwayila.

Kashika ngunakolesa shimbi ngwami, Nyi vungu limwe, hanji munyachi umwe, hanji limi limwe mahanjika chimwe chuma cha kulimika ni Zambi ya Shadrake, ni Meshake, ni Abedenego, makaapapulula kwoko ni kulu ni mazuwo jo maapuzula. Mumu kukushi niumwe zambi mukwo yoze mahasa kupulula chocho.