2 A-TESALONIKA 1
1
1Yetu, Paulu, ni Selevwanu, ni Timoteu, Ku chikungulwila cha A-Tesalonika muli Zambi Tata yetu ni Mwene Yesu Kristu:
2Vumbi kuli yenu, ni sambukila ya kuli Zambi Tata yetu ni Mwene Yesu Kristu.
3Chatutamba kusakwila kuli Zambi matangwa eswe hali yenu, mandumbu, ngwe chinalite, mumu Ufulielo wenu kuwakutatuka kuhiana, ni zango umwe kuli mukwo ni mukwo hakachi ka yenu eswe kuliakuiumbama. 4Chocho yetwene twakulisamba hali yenu mu yikungulwila ya Zambi, ha utunu wenu ni Ufulielo mu yihungumiona yenu yeswe ni mu luyinda yoze nwakulihumikiza nenyi.
5Chenacho chinyingi pundu cha upatwilo wa ululi wa Zambi, hanga akanunyonge akwa kutela wanangana wa Zambi, uze nwakuvwila lamba; 6se chapwa chuma cha ululi kuli Zambi kufweta luyinda kuli waze akunupinjisa; 7ni kuli yenu, kananupinjisa, munukahwima hamwe ni yetu, ha usolwelo wa Mwene Yesu mwilu hamwe ni angelo ja tachi jenyi, 8mu kahia ka kulekwoka, akakale milonga ya waze kanyingikine Zambi, ni waze keshi kwononoka ku sango lipema lia Mwene wetu Yesu. 9Kumakaafwetesa ha milonga yo, kwenyeka cha mutolo muma mwa kuhandunuka kumeso ja Mwene, ni ku uhenya wa ngolo jenyi; 10muze meza ha tangwa lize, hanga akamuchichimieke muli asandu jenyi, hanga akamukomoke muli waze eswe akwa kufuliela, mumu nwafulielele Shindakenyo yetu kuli yenu. 11Kashika twakunulembela matangwa eswe, Zambi yetu akanumone akwa kutela kutambika chenyi, hanga akamanunune kuwaha cheswe cha upeme, ni yitanga yeswe ya Ufulielo, ni tachi; 12hanga akachichimieke jina lia Mwene wetu Yesu muli yenu, ni yenu muli iye, nikulita ni vumbi lia Zambi yetu ni lia Mwene Yesu Kristu.
Currently Selected:
2 A-TESALONIKA 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.