1 PETULU 4
4
1Kashika chizechene ngwe Kristu hanevu lamba mu musunya, lipakatenu nawa ni kunyonga chimuwika; mumu yoze hanevu lamba mu musunya hanalitwamina ku shili; 2hanga kunuchi katwama nawa mu musunya ha miaka yenu yize yinasala, mukulinga usolo wa atu, aiioze mukulinga upale wa Zambi. 3Mumu kunahu hali yenu miaka yize yapalika kulinga upale wa akwa mavungu, nikwenda mu ujila, ni usolo, ni kunwa vinyu, ni chimbangwinya, ni kunwanwa walwa, ni kukombelela cha kuzelwokesa. 4Chinaashimi ngwe kunushi kuzomboka hamwe no mu muhwiji umuwika wa kuhungumuka ni yipi, kashika anahanjika yipi hali yenu. 5Wano kumakalumbununa kuli yoze himapatwila a mwono ni afu. 6Mumu ha chino ambujolele sango lipema chipwe kuli waze hanafu, hanga chamwenemwene ukaapatwile nikulita ni atu mu musunya, aiioze akapwe ni mwono nikulita ni Zambi mu Spiritu.
7Alioze songo lia yuma yeswe hilinakundama: pwenu ni mana kashika, keyelenu, nukalitumbikile ku kulemba. 8Kuhiana yuma yeswe pwenu nikulizanga umwe ni mukwo ni mukwo ni mbunge yeswe: mumu zango kuliakufuka milonga yinji: 9nikulizumbula umwe ni mukwo, ni kulinyenyeta chakuhi. 10Mweswe nikulita ngwe hanatambula chawana cha vumbi, alinge nacho umwe kuli mukwo ni mukwo, ngwe tuselo apema a vumbi lieka ni lieka lia Zambi. 11Kachi umwe mahanjika ahanjike ngwe iye liji lia Zambi; kachi umwe mavumbika, avumbike ngwe ku ngolo jize akumwaha Zambi: hanga mu yuma yeswe achichimieke Zambi ku tachi ja Yesu Kristu, yoze uhenya ni ndundo niyenyi ndo ku miaka yeswe ya mutolo. Amene.
12Akwetu a zango, kanda nukomoka ha kutwala ku cheseko cha kahia hakachi kenu, chize chineza hali yenu mukunweseka, ngwe chuma chimwe cha kukomwesa chinanuwane. 13Alioze se nuli akwa kuhangana ni lamba lia Kristu, wahililenu; hanga ha usolwelo wa uhenya wenyi nawa nukawahilile nikulikwiza. 14Kachi manuchoka mumu ha jina lia Kristu, kunwawaha; mumu Spiritu ya uhenya, kanda ya Zambi, kanatwama hali yenu; ha kutwala kuli ayo kanamushililika, aiioze ha kutwala kuli yenu, kanamuchichimieka. 15Alioze niumwe wa kuli yenu, kanda akamona lamba ha mulonga wa ungalwe, hanji mwiji, hanji mukwa kulinga yipi, hanji mukwa kusunga ku yuma ya mbala. 16Alioze kachi umwe mamona lamba ha kupwa mukwa Kristu, kanda akevwa sonyi; aiioze akachichimieke Zambi mumu ha jina lino. 17Mumu mwaka hiuneza hanga upatwilo uputuke ku zuwo lia Zambi: nyi kachi muuputuka hatangu kuli yetu, songo lika mulikapwa lia waze keshi kwononoka ku sango lipema lia Zambi?
18Nyi
kachi muchikapwa chikalu hali mukwa ululi kulilamwina,
kulihi chitanganyanyi ni chivulumunyi makasoloka?
19Kashika nawa, waze akwivwa lamba nikulita ni upale wa Zambi akalikunjike ha kulinga yipema kuli Tangi wamwenemwene.
Currently Selected:
1 PETULU 4: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
