1 PETULU 3
3
1Chizechene, yenu mapwo, zeyelenu kuli akwenu-malunga; hanga chipwe kachi amwe keshi kwononoka ku lie liji, akaazuke ni lie liji liakuhi ku kwenda cha akwo-mapwo, 2ha kutala kwenda chenu cha kulinanga hamwe ni woma. 3Uhenya wenu kanda upwa uze wa haze, wa kuyinda cha kambu, ni wa kujinga cha oru, hanji wa kuzala cha mahina apema, ka; 4aiioze ukapwe mutu wa kuswama wa mbunge, ni kuzala chingunu cha Spiritu ya kushimbika ni ya kuhola, yize kumeso ja Zambi ya ndando yinene chikolo. 5Mumu chizechene ha miaka ya kunyima mapwo asandu nawa, waze ataliletalile kuli Zambi, alihenyesene, nikuzeyela kuli akwo-malunga. 6Chizechene ngwe Sara wononokene kuli Apalahama, nikumutongola ngwenyi, Mwene: haliapwila nuli anenyi, nyi munulinga yipema, kunushi kwivwa woma ku mwongo niumwe.
7Chizechene yenu malunga, twamenu hamwe no nikulita ni chinyingi, nikusela ulemu kuli pwo ngwe kuli chikwachilo chilelu, ngwe nuli maswana-ni-akwo ja vumbi lia mwono; hanga yilemba yenu kuyichi kalinjiwa.
8Ha kusula, pwenu eswe ni kunyonga chimuwika, nikulivwila vumbi umwe ni mukwo ni mukwo, akwa kulizanga ngwe mandumbu, akwa mbunge ja vumbi, akwa mbunge ja kulikehesa. 9Kanda nufwetesa yipi ni yipi, hanji kutukana ni kutukana, aiioze Shinaho ni uwape; mumu ha chino hananutambika, hanga nukahinge uwape. 10Mumu
yoze mazanga mwono,
mazanga kumona matangwa apema,
akafunge limi lienyi ku yipi,
ni mivumbo yenyi hanga kuyichi kahanjika kalimbalimba.
11Akachine yipi, akalinge yipema;
akafupe sambukila, akayikaule.
12Mumu meso ja Mwene hwali hali akwa ululi,
ni matwi jenyi kakupanjika ku kuliumba cho;
alioze meso ja Mwene kakulimika ni waze akulinga yipi.
13Iya manulinga chipi nyi munulisela ni mbunge yeswe ku yuma yipema? 14Alioze chipwe kachi munukevwa lamba mumu ha ululi, kunwawaha: kanda nukevwa woma ku woma wo, chipwe kanda nulipikala; 15aiioze Selenu Kristu ngwe mwe Mwene mu mbunge jenu: nukalulike matangwa eswe mukuhana kumbululo kuli mweswe manwita chikuma cha kutalatala chize chili muli yenu, hindu ni kushimbika ni woma. 16Pwenu ni mbunge yipema: hanga ha chize manwamba chipi ngwe akwa kulinga yipi, akevwe sonyi, waze akusaula kwenda chenu chipema muli Kristu. 17Mumu chipema, kachi upale wa Zambi, nukevwe lamba ha kulinga yipema, hi ha kulinga yipi ko. 18Mumu Kristu nawa hanevu lamba kamuwika ha milonga, mukwa ululi hali yihenge, hanga akatunehe kuli Zambi; se amushihile mu musunya, aiioze amupwishile ni mwono muli Spiritu. 19Muli iye nawa, wayile nikwambujola sango kuli maspiritu mu zuwo lia ususu; 20waze ha shakulu kononokeneko, muze uhomboloji wa Zambi washimbwile ha matangwa ja Noe, shimbu machilulika ulungu, amuze akepe, te atu nake, aalamwinyine ku meya. 21Chenacho nawa ni Chizulie cha kulita haliapwila chinanulamwina, te upapachiso, hi kusano ko majilo a musunya akatuke, aiioze kutá cha mbunge yipema kuli Zambi, ku Uhindukilo wa Yesu Kristu; 22yoze kwali ku kwoko lia chindume lia Zambi, se hanayi mwilu; angelo ni akwa kuyula ni tachi nikuzeyela kuli iye.
Currently Selected:
1 PETULU 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
