1 YOANO 4
4
1Akwetu a zango, kanda nufuliela maspiritu eswe, aiioze esekenu maspiritu, kachi mapwa maspiritu a kuli Zambi; mumu aprofeta a kwonga anji haneza hano hashi. 2Ku chino nunanyingika Spiritu ya Zambi: Spiritu mweswawo matayiza ngwo, Yesu Kristu haneza mu musunya, iye wa kuli Zambi. 3Ni Spiritu mweswawo keshi kutayiza ngwo, Yesu Kristu haneza mu musunya, hi wa kuli Zambi ko: iye Spiritu ya mukwa kulimika ni Kristu, yoze nwevwile ngwo, Kumeza; ni haliapwila hwali hano hashi kulu. 4Yenu nuli a kuli Zambi, ana akepe, hinunaakumbu; mumu yoze uli muli yenu iye munene Wahiana yoze uli hano hashi. 5O akwa hashi: kashika kakuhanjika ya hano hashi, ni akwa hashi kakwevwa. 6Yetu tuli a kuli Zambi: yoze wakunyingika Zambi kakutwivwa; yoze hi wa kuli Zambi ko keshi kutwivwa. Ku chino tunanyingika Spiritu ya umwenemwene, ni Spiritu ya kupiangula.
7Akwetu a zango, tulizangenu umwe ni mukwo ni mukwo: mumu zango lia kuli Zambi; ni mweswe mukwa kuzanga kanasemewa kuli Zambi, kananyingika Zambi. 8Yoze keshi zango, kanyingikine Zambi; mumu Zambi iye zango. 9Muno hanasolola zango lia Zambi ha kutwala kuli yetu, te Zambi hanatumu Mwanenyi wa wika hano hashi, hanga tukapwe ni mwono kuli iye. 10Muno mulili zango, kuchapwile ngwe yetu twazangile Zambi, aiioze iye watuzangile yetu, watumine Mwanenyi kupwa kuka ha milonga yetu. 11Akwetu a zango, kachi chocho Zambi watuzangile, kachi yetu nawa chatutamba kulizanga umwe ni mukwo ni, mukwo. 12Niumwe wamwene Zambi niumwe mwaka: kachi mutulizanga umwe ni mukwo ni mukwo, kachi Zambi matwama muli yetu, ni zango lienyi mulipwa lingunu muli yetu.
13Ku chino tunanyingika tuli muli iye, iye muli yetu, mumu hanatupangila Spiritu yenyi. 14Yetu hitunamono, twakushindakenya ngwetu, Mwe Tangi hanatumu mwe Mwana akapwe Chilamwina cha akwa hashi. 15Mweswawo matayiza ngwo, Yesu iye mwe Mwana Zambi, Zambi matwama muli iye, iye matwama muli Zambi. 16Ni yetu tunanyingika, hitunafuliela zango lize Zambi ali nalio hali yetu. Zambi iye zango, ni mweswe matwama ni zango, matwama muli Zambi, ni Zambi matwama muli iye. 17Muno zango linapu lingunu ni yetu, hanga tukapwe ni hamu ha tangwa lia upatwilo; mumu ngwe chize apwa iye, chizechene ni yetu nawa twapwa hano hashi. 18Woma wakuhi mu zango, niumwe: aiioze zango lingunu mulikatwisa woma, mumu woma lamba ukwete; ni yoze wakwivwa woma kanda achimupwisa mungunu mu zango. 19Yetu twakuzanga, mumu iye waliangile kutuzanga. 20Kachi umwe mamba ngwenyi, Ngunazange Zambi, hindu mapwa ni kole ni ndumbwenyi, iye mukwa mahuza; mumu yoze keshi kuzanga ndumbwenyi yoze hanamumono, ngwe kuchi mahasa kuzanga Zambi yoze kamumweneko. 21Ni shimbi yino tuli nayo ya kuli iye, ngwo, yoze wakuzanga Zambi, akazange ndumbwenyi nawa.
Currently Selected:
1 YOANO 4: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
