1 A-KORINDU 10
10
1Mumu ngunazange yenu, mandumbu, nunyingike ngwe tulamba twetu eswe apwile kushi lia lelwa, eswe apalikile ndusu mu kalunga-lwiji; 2eswe aapapachishile kuli Mose mu lelwa ni mu kalunga-lwiji. 3Eswe alile kulia chimuwika cha uspiritu; 4eswe anwine kunwa chimuwika cha uspiritu: mumu anwine ku liwe lia uspiritu lize liaakawile, ni liwe lize liapwile Kristu. 5Alioze anji ahiana a kuli ayo Zambi kawahile no: mumu aanungwine mu puya.
6Achi, yino yuma yapwile yilweza kuli yetu, hanga kutuchi kevwa usolo wa yuma yipi, ngwe ayo nawa evwile usolo. 7Chipwe kanda nukapwa akwa kukombelela mahamba ngwe amwe a kuli ayo apwile, nikulita ngwe chinasonewa ngwo, Atu atwamine mukulia, nikunwa; akatukile mukuheha. 8Chipwe kanda tulinga utanji ngwe ayo alingile, mba alimbukile ha tangwa limuwika makumi aali a tununu ni tununu atatu. 9Chipwe kanda tukeseka Kristu ngwe amwe a kuli ayo esekele, mba aonwene kuli tupela. 10Chipwe kanda nulinyenyeta ngwe amwe a kuli ayo alinyenyetene, mba aonwene kuli chenyeke. 11Achi, yino yuma yaawanyine ngwe yilweza; yasonewene mukutukanyamisa, yetu, masongo ja miaka hanatuhete. 12Kashika yoze malishinginyeka ngwe kanamana, akakanyame kuchina malimbuka. 13Nichimwe cheseko kuchanukwachile shina chize cha kulita ni chisemewa cha atu; alioze Zambi wamwenemwene, iye kechi katayiza akanweseke kuhiana chize munuhasa; alioze hamwe ni cheseko makanumwesa jila ya kutuhukamo hanga nukahase kunyongonona.
14Kashika, akwetu a zango, Chinenu ku kukombelela mahamba. 15Ngunahanjika ngwe kuli akwa kukanyama; patulenu chize ngunambe. 16Musenge wa uwape uze twakuwahisa, hi kuhangana cha manyinga ja Kristu ko, nyi? Mbolo yize twakupalula, hi kuhangana cha mujimba wa Kristu ko, nyi? 17Se kuyili mbolo yimuwika, yetu se tuli anji tuli mujimba umuwika: mumu yetu eswe twakuliangana ha mbolo yimuwika. 18Talenu A-Izalele nikulita ni musunya: waze akulia yitapo keshi kuhangana ha chilumbilo, nyi? 19Kuchi kevwe ngunambe ngwami, Chize hanachitambula chitapo ku hamba chinapu chuma chimwe, hanji hamba kanapu chuma chimwe, nyi? Ka. 20Ahoze ngunambe ngwami, Yuma yize akwa mavungu akutambula yitapo, kakuyitambuta yitapo kuli andemoniu, hi kuli Zambi ko; mba chazangile yenu nuliendele ni andemoniu. 21Kunwahashile kunwa musenge wa Mwene, ni musenge wa andemoniu. Kunwahashile kutambula chihanda cha ku mesa ya Mwene ni cha ku mesa ya andemoniu. 22Shina mutwihia Mwene ku ukwa, nyi? Tunakangana kuhiana iye, nyi?
23Kuli yami yuma yeswe yinalite ni shimbi; alioze yuma yeswe kuyishi kufumbula; yuma yeswe yinalite ni shimbi hali yami; alioze yuma yeswe kuyishi kukolesa. 24Niumwe kanda afupa kufumbuka chenyi mwene, ahoze eswe akafupe kufumbuka cha mukwo. 25Cheswacho analanjisa mu yitanda, lienu, kanda nuhula nichimwe mumu ha shimbi ya mbunge; 26mumu hashi ha mbala ha Mwene ni kulumbama chaho. 27Kachi umwe wa kuli waze keshi kufuliela manulakenya ku chiteleka, nyi munuzanga kuya; cheswacho masa kumeso jenu, lienu, kanda nuhula nichimwe mumu ha shimbi ya mbunge. 28Ahoze kachi umwe mamba kuli yenu ngwenyi, Chino hanachilambula chitapo ku hamba, kanda nukalia mumu hali yoze hachisolola, mumu ha shimbi ya mbunge: 29shimbi ya mbunge, hi ya yena mwene ko, ahoze yize ya mbala; mumu kuchi te anapatula kutusuka chami ku shimbi ya mbunge ya mbala? 30Kachi mungutambula ni kusakwila, kuchi te anahanjika yipi hali yami ha chize nakuchisakwilila?
31Chipwe kashika munulia, hanji mununwa, hanji cheswacho munulinga, lingenu yuma yeswe ha uhenya wa Zambi. 32Kanda nukapwa chitalingiso chipwe kuli A-Yunda, chipwe kuli A-Ngresia, chipwe ku chikungulwila cha Zambi, ka: 33chizechene ngwe ni yami nawa nakupemena kuli atu eswe ha yuma yeswe, kuchapwile ngwe ngunafupu kufumbuka cha yami mwene, alioze kufumbuka cha anji, hanga akaalamwine.
Currently Selected:
1 A-KORINDU 10: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
