Boharni ad Johanes 11
11
Gelman le sor lao marmou ad Jehova.
1Boen i gin hengen me ndro io ndes, i dege ndes ber dohongeni longu i vong me ndro io i bai: Edne, e dohongeni um ad Jehova, ma logna dohor i do dari, dagara su, su da dohor. 2Mbue dohongeni marbohonum, i gsou, aga logna asu Haiden ge. Su gmeher le lundiegor helian, su gob momen le ndro i, su gob bahun le vara mahangul e ruo. 3Io ghengen le ndro sor lao dandendegei ordo marmou sor ndremda harni, sor bohernou le ndro su le rang masobu e runged e nonungul. Salo ber dang i da le mandrsu. 4Sor marmou ogo, aga sor gei ordo, aga logna sul, sor da le bormarn ad Jehova ge. 5Ar homo beg hosi sor, beg bo momen le ndro sor, moan i meher le bohosor, i dilmui su ndremda rah asor. Ar homo beg bo momen le ndro sor, i ga med, i glos gle momen ge. 6Sor marmou, ndoui ber lang i da biri madulsal ber lang le gelben, i basirsir biri, i ndro sor, dansor vadi babi ber lang, debosan heb lengen i ndrud, su bohernou le ndro su ndramed, su garbelueni bern asu. Su ndoa le ndran masi ber boan, dansu belueni ndran gle ndrai dansu rii gor boan le longu hendre e hendre momen, dege sor ha lengi. 7Be rang asor gina boen, i ge, i da momen manden, i meher le gor ndrogmoan, i beg bo bahun le ndro sor, ir ndounen sor, i rii sor. 8Numbuen asor i da le sal le gor manden. Gor ogo aga i vonei Sodom, dagara vonei Egipten aga lognan, su gin dadhe Ndorlaben le gei. 9Su ndramed ber gor boan masigane, su ber hai, su ber rai, su ber ndolou, ma su ber gub, su gilndri numbuen asor le rang madolo sehendr, su sendraini su, debosan homo i doni numbuen asor le ngad. 10Su ndramed ber gor boan su ha mugmug le asoro, sor da ginmad, su bo gan, su bo gous. Sor Provet marmou sor da ginmad sor gin bo ngendian manden le ndro su ndramed ber boan. 11Bing madolo sehendr boen, meluasor gin mul, Jehova gin hingeni sor. Sor edne, sor dogi ge, meluasu ndramed i ieb manden, be su ilndri sor. 12Su hirong ngasen ndoun ber lang, i vong le ndro sor i bai: Am, gobad le belengan! Sor gobad le gor lundielang le ndoulang si, su ndramda rah asor, su lele sor be sor gineao. 13Heb eluen bui muren boan i nunueie mandromai masongul, sal ber gor gin los, ma su ndramed manondrdilbou su ginmad. Su ndramed ber boan su ha noh manden le longu ogoro, su mugueni Jehova ber lang. 14Aga longu momen hendre lie i gina boen. Longu momen hendre ge i dandon, i gmeher heb eluen bui muren.
Gelman le ndah ber muren.
15Malabo Angelo, ndah i da le nemen, i bo ndah: Io hirong ngasen asu mabosanged ndoun ndoun, i da le gor lundielang. Ngasen asu i vong, i bai: Ndorlaben Kristo i gin ibdi gor masi ber boan gle aden ge, I King ber gor masigane, bing si e rang si sidegesi. 16Malabo su labenen marungul e hamou, su da le bormarn ad Jehova le logna asu, su godurhu ngondrnegesu, su bo lodu le ndro Jehova, 17su vong, su bai: Iou bamugueni uo Ndorlaben Jehova, uo da ndoa le longu masigane, uo ber nandugian, uo do da malabo, iou bamugueni uo, uo gin ibdi gor masigane gle adem. Uo Ndorlaben asu masi. 18Su Haiden ndrnesu i mah manden, malabo gus adem gin meher, rang adem ber gord, be uo beg surien longu asu su da ginmad, be uo beg hengen le ndro su lao dandendegei adem, le ndro su Provet, ma le ndro su lao adem helian masigane, voasuiso ngarm, su molhege ma su labenen, malabo rang momen gin meher le ndro su, su da gin bo momen le gor boan. 19Um ad Jehova i da le gor lundielang i deh malabo. Boges ad Jehova i da le lundieum ad Ndorlaben gin mbsig. Malabo ndremla e ngasen e barr mandromai gin me. Boan i nunueie, ma lengen ber ais gin ndrud.
Currently Selected:
Boharni ad Johanes 11: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
