Hebru 11
11
Nongen le su lao ad Jehova, su gin boro ndoui aden.
1I ge, i danen boro ndoui ber lang, be i ha belengeni longu hendre e hendre, be i danen i gmehere bersi muren, aga longu hendre ber lang, begmarn de danen ilndri i masou. 2Su ber goru su gin boro ndoui ad Ndorlaben dege ogoro, Jehova gin mugueni su. 3Dandu i, iou gin boro i, Ndorlaben Jehova gin mengseni gor boan ma longu masi i do dari. Longu masi dandu ilndri malabo i do da nandugian bui, Jehova gin hinen i.
4Abel gin dirhor gle ndoui ber lang le ndro Jehova, Ndorlaben gin somui dohor aden, i mbueren dohor ad Kain. Gle ndoui ad Jehova i hom lao aden monen ge, Jehova gin boharni leri, i gin ha somui dirhor aden. I ginmad, longu aden monen i boharni me ndro du range lie. 5Dagara Henog gin boro ndoui ad Ndorlaben, Jehova gin rui i le gor aden lundielang, i de ginmad bui, su de gin ilndri i le boan bugane, Jehova gin hedi i le gor aden. Be i do da le boan, Meluan Helian gin boharni, Jehova voaniso aden ge, i golnisden i. 6Ar homo i danen boro ndoui ad Jehova ge, Ndorlaben i voaniso aden, Ndorlaben i mbueren homo de danen boro ndoui aden bui. Ar homo la born ndro Jehova, i danen, Jehova i gorbo, i danen, su da gahi Jehova, Ndorlaben i hengen le ndro su, dege su gin gahi. 7Noah gin boro ndoui ad Ndorlaben, be Jehova gin vong le ndro i, i berden ndol, beg rumburdi Noah ma su ber um aden. Gle ndoui ogo i gin dieni su gor masi, i ge, i gin ibdi nongen ad Ndorlaben, i gin hinen i.
8Abraham gin boro ndoui ad Jehova, i delengan le nongen ad Jehova i bieni gor aden, i dogi le gor manan, Jehova beg hengen le ndro i. I de danen gor ogo bugane, i delengan le nongen ad Jehova ge. 9I dogi le ndoui ad Ndorlaben le gor manen, i de gin mengseni gor si bui, i dogi molhege le horo ma le horo le gor, Jehova beg hengen le ndro i, ma Isaak, dagara Jakob lie, nongen ad Jehova gina le ndro su. 10I belengeni le gor si ber belengan ge, gor ndoun ndoun ge, Jehova gin mengseni i. 11Ndoui ad Jehova ogo gina le ndro i, dagara le ndro Sara, be sor hibarmanda. Sara i gin boro ndoui le nongen ad Jehova, i danen, nongen aden i monen ge. 12Le mandrn ad homo i gina barmanda gin meher su ndurn dsoln, su dege biri ber lang, su mabosanged dege doruon ber lang, homo de danen nemeni i bui. 13Su lao ad Jehova ogo masi ginmad le ndoui ad Jehova. Su de gin ibdi longu dege bohon ad Jehova gin bai masou, su gin ilndri ber manan ge, su ha mugmug manden leri, su gin boharni, su gin bai, su ber boan ge, gor boan i gor asu ndangen bui, su ha dogi le gor si ber belengan. 14-15Ar homo i boharni dagara, dandu, i gahi gor si, i da le boan bui, be su hanguruen gor asu ber boan, su da gin bieni i goru, dansu mul le gor asu. 16Su de hanguruen gor boan bui, bergolsu gunuen hi bui le gor lundielang. Jehova bombulen i de mesi le asu bui, su ha bosoui Jehova asu, i gin mengseni le ndro su gor si hian ge. 17Abraham i da gin boro ndoui ad Jehova, i gin somui, be Jehova beg seslaini i, i gin dohor ndurn Isaak le ndro i. Ehe, i ha leng dohor le ndro Jehova ndurn homo ge, Jehova gin hengeni le ndro i, i gin boharni le ndro i, i gin bai: 18Isaak aga ndurm, io beg hengen le ndro uo, su ber um adem na ge dsoln. 19Abraham gin hanguruen le bergoln, Jehova i ndoa le hingeni nduro le ngad aden, Jehova gin hengen le ndro i Isaak bersilie. Aga longu dohongein le ndro du. 20Isaak gin hengen le ndro Jakob sor Esau le ndoui ad Jehova be i gin hanguruen longu i da beg meher muren. 21Jakob baghege na gmed, i hengen le ndro ndursor ad Josev i bo raring le ndro Jehova le bormarsor marmou be i sodun le ndes aden. 22Josev gin boro ndoui ad Jehova, be i gin hanguruen rang ber muren, be su Israel bieni gor Egipten, i gin vong le ndro su, mbue ndrun aden i gsou le gor Egipten.
23Damen sor nanen ad Mose gin gorni ndur Moses le ndoui ad Jehova su da gin boro i. Be su gin ilndri hom mbunana mamali ge su de noh gus ad Pharao bui, su gorni i vara madolo. 24Mose i gin boro ndoui ad Ndorlaben be i gin menda, i mbueren i hom ndurn ad ndurbihin Pharao. 25I ha leng ibdi ngendian asu ndern, i mbueren longu asu momen ber gor Egipten. 26I hanguruen ngendian ad Kristo aga memrad hian, i mbueren memrad ber gor Egipten, i gin hanguruen surien hian ber lang ir belengen su lao ad Jehova. 27I gin boro ndoui ad Jehova be i gin bieni gor Egipten, i de noh gus ad King bui. I gina ndoa ge i da baghege ndro Ndorlaben, begmarn de gin ilndri i bui, i gin boro ndoui aden ge. 28I gin boro ndoui ad Jehova be i gin boharni le ndro su Israel longu ber Pasah, be su sibui gei ber marbohonum, debosan Angelo i rii su Israel. 29Su Israel gin dogi le ndoui ad Jehova le sal ndas ramen, dege homo i da dogi le sal bosou. Su ber Egipten masi gin lol, su ginmad, be su ha leng dogi le sal ogoro. 30-31Su ber Israel gin boro ndoui ad Ndorlaben, be su gin irgai, su lugmuni gor Jerigo bing maberndrdolo. Gou ndoun ndoun ber gor Jerigo gin los, Ndorlaben gin ndumbue su sumburdi. Ndurbihin Rahab gin boro ndoui ad Jehova ge, i de ginmad la born ndro su Jerigo bui, i gin bogulue su holel ber Israel, su da gin meher le gor Jerigo, beg ilndri i.
32Io ha leng vong sa longu hendre e hendre lie? Rang ogo de vonei bui le bosoui longu hendre e hendre ad Gideon, ad Barag, ad Simson, ad Jevta, ad David e Samuel, ma longu hendre e hendre asu Provet. 33Su gorbo su gin boro ndoui ad Ndorlaben, su gin ndounen ndurhian asu gor, su gin surien longu asu momen gle gord asu, su gin ibdi longu hendre e hendre bohon ad Ndorlaben gin boharni le ndro su. Su gin deheda bohon asu laion. 34Su gin samedei ndoui ber moan, su gin vob le mordo borla asu marn, su da heb ndoa bui, gin ibdi ndoui, su gin ndounen su ndremda rah asu, su ber gor manan gin vob le bahun asu. 35Su bihinou gin ilndri, su da ginmad, su gin ndne lie le ngad asu. Su holel asu su gin ha somui, be su ndremda rah asu gin bo ngendian le ndro su, mbueresu gahaloseli asu, su ha lengi surien ad Ndorlaben ber lang, be i hingeni su le ngad asu. 36Su holel asu gin ha somui be su ndramed gin rodi su, be su gin rii su, su gin ha somui ri, be su gin hosi su, be su gin ilgi su le kalabus. 37Su ndremda rah ad Jehova su gin daii su holel le bad, su gin bo momen manden le ndro so holel, su gin sehi mandrsu gle marndr, su gin sindrdi golsu. Su ndramed ber boan gin bo momen manden le ndro su lao ad Jehova, gan ansu bui, salo asu bui, ndran ansu bugane. Su gin bo momen le ndro su, su hingismad asu. 38Ndangen gor boan i de vonei le asu bui, su da gin vob le marboga, su da dogi ndre bahali, su da gohoni le ngaibad, le ngai ber boan. 39Su ogo masigane Ndorlaben i mugueni su, su da gin boro ndoui aden hian ge. Su de gin ibdi gor boan ma longu ogo ber boan bui. 40Jehova ha leng hengen le ndro su memrad hian ge ber gor lundielang. I de gin hengen le ndro su masou. I ghengen le ndro su, ma me ndro du lie, memrad ber belengan bersi.
Currently Selected:
Hebru 11: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
