Apostel 8

Su masumbue su Kristen ber Jerusalem.

1Malabo su Juda su hingismad su lao ad Jesu, su do da le gor ad Jerusalem su gin vob, su masumbue su le gor manan ber Judea ma ber Samaria. Su Apostel ge su dandon. 2Su lao ad Jesu, su doni Stevanus le ngad, su ha reng, su ha dang le aden. 3Saulus i da bo iil manden le ndro su ber lodu ad Jesu. I iao le um asu lao ad Jesu, i hosi su gamel ma su bihin, i daui su le kalabus. 4Su da gina le gor manan, su gin bohernou longu ber lang le ndro su gor masi.

Mburer ad Philipus ma Petrus le gor Samaria

5Philipus gin meher le gor manden ber Samaria, i bohernou le ndro su ndramed longu le Kristo. 6Su ndramed ber gor, su mabosanged somui le nongen ad Philipus, be su gin hirong i, be su gin ilndri gelman, i da gin hinen i. 7Ngongong mabosanged gin bieni su ndramed, su da gin hosi su, su loholo ndoun, su gina lendi su mabosanged degesu momen, su horuan lie. 8Su masi ber gor, su mugmug manden leri.

9Hom gamel i da le gor, ngarn Simon, i ndremda beld, meluasu ndramed le gor gin ieb le longu aden. I vong le ndro su, i boi: I hom manden. 10Su masi ber gor mugueni i, su vong, su boi: Ndoui ad Jehova i da manden ge i da ndro i. 11Su gin hanguruen dagara le bergolsu, su gin ilndri mburer aden, ma gelman aden i da gin hinen i gle ndoui asu beld. 12Malabo Philipus gin me, i gin boharni le ndro su nongen hian ber lang, longu le Jesu Kristo, su boro ndoui ad Ndorlaben Jesu. Philipus i surhi su qamel ma su bihin. 13Simon lie la born ndro su. Philipus gin surhi i, i ndrobon Philipus, meluan i ieb manden, be i gin ilndri gelman manden, longu ndoun, Philipus gin hinen i.

14Su Apostel ber Jerusalem gin hirong i, su ber Samaria gin ibdi nongen ad Jesu lie. Su rendegien Petrus sor Johanes le ndro su. 15Be sor marmou gin meher ndro su, su soling le ndro Ndorlaben, i rendegien Meluan Helian le ndro su. 16I de gin meher le bergolsu Samaria masou. Philipus gin surhi su le ngarn ad Ndorlaben Jesu ge. 17Sor marmou daui nemesu gle borbalsu Samaria, Meluan Helian gin meher le bergolsu. 18Be Simon gin ilndri longu ogo, Meluan Helian gin meher le bergolsu ndramed, be su Apostel gin daui nemesu gle borbalsu, i beg hengen moni le ndro su. 19I vong le ndro su, i boi: Hian hengen me ndro io ndoui ademu lie, ar io daui nemo gle ndro su, Meluan Helian i la bergolsu. 20Petrus i vong, i bodeie: Uo, e moni adem na glos le moan manden ge, uo da gin hanguruen uo danem semani ndoui ad Jehova gle moni? 21Bergolm i de monen hebsa bugane le bormarn ad Jehova. Memrad ber lang heb adem bui. 22E belueni hanguruen adem, soling le ndro Ndorlaben, i esbui longu adem momen giao. 23Io ilndri, hanguruen adem momen gane, beld Satan gin hosi uo. 24Simon i bodeie: Hian soling le ndro Ndorlaben debosan longu hendre e hendre bohomu gin bosoui leri, i meher ndro io. 25Sor Apostel marmou sor bohernou le ndro su nongen ad Ndorlaben, boen sor bieni gor, sor mul le gor Jerusalem, sor bosoui le ndro su ndramed ber Samaria nongen ber lang, be sor da le sal.

Philipus ma labenen ber Afrika.

26Hom Angelo ad Ndorlaben i vong le ndro Philipus: Edne, al dogi le sal, i la gor Jerusalem le Gasa. Su mbosanged de dogi le sal ogo bui. 27Philipus i dne, i dogi. E lele, homo asu ad Afrika, i hom labenen ad ndurhian ber Kandase, aga hom bihin, labenen ogo i da bogulue memrad ad ndurhian i gin dogi le gor Jerusalem beg dirhor le ndro Jehova. 28Mburer aden le gor Jerusalem boen, i dogi mul le gor aden. I da le kar aden, i ilndri buk ad Provet Jesaia. 29Meluan Helian i vong le ndro Philipus: Al baghege ndro i. 30Philipus i hilou, i hirong, i da absoui nongen ad Provet Jesaia, be i da gin ilndri buk. Malabo i ndemani i: Uo danem nongen ogo, uo da gin ilndri le buk? 31I bodeie: Io dono nongen ogo derbe, homo de henunuen io leri bui. Boen i ndemani Philipus, i lugdo baghege ndro i le kar aden. 32I gin ilndri nongen ad Provet Jesaia ogoro: I dege meh, su da rui i, beg daii i, i dege ndurmeh su beg sindrdi lomon, i da simge de loholo bui, de lug bohon hebsa bui. 33Su gin ndounen i, Ndorlaben gin ibdi gahaloseli le ndro i, su ndurn mabosanged, boen i gobad le lundielang. 34Malabo labenen ogo i ndemani Philipus: Io ha soling ndro uo, gobharni me ndro io, Provet i da bosoui longu ogo le ad sie? Aga longu le adem, de longu le ad homo lie? 35Philipus i lug bohon i bohernou le ndro i le longu Provet i da gin bosoui i, longu le Jesu. 36Be sor da le kar le sal asor, su gin meher le mandrgos ndran haga, labenen ogo i boi: Ndran gorbo, hian surhi io. 37Philipus i bode: Io somui ri be uo da boro ndoui ad Ndorlaben hian ge. 38Sor bieni kar, sor la ndran, Philipus sor labenen ogo, i surhi i. 39Sor bieni ndran ogo, Meluan ad Ndorlaben gin hedi Philipus gineao. Labenen de gin ilndri i bersilie bui. I da dogi le sal, bergoln i mugmug manden. 40Philipus gin me le gor Asdod. I dogi le horo ma le horo, i da bosoui le ndro su gor longu ber lang. Boen i gin me le gor Sesarea.

Currently Selected:

Apostel 8: LLENT

Highlight

Copy