Apostel 1

Jesu dogi le lundielang.

1Teovilus, gous ordo hian ge, nongen ordo le Jesu Kristo i gin meher ndro uo. Io da gin hondre longu masigane, Jesu i da gin hinen i, nongen masi i da gin henunuen su, be i do da le boan, 2mabenan le rang, be i da gin rendegien su Apostel aden le gor masi, i gin daui Meluan Helian le ndro su, boen i gina lundielang. 3I gin boharni le ndro su, be i da gin ndne lie le ngad aden, i horuan mamaren ge, i gin mbsig, gina le ndro su bersi ma bersilie le bing mahangul, be i do da le boan, gin henunen su le longu ber gor ad Jehova.

4Be su da gin me goure, Jesu i da le dogrosu, i vong le ndro su, mbue su gbieni Jerusalem, ir belengen longu ad Damen, i beg meher ndro su. I vong le ndro su, i boi: Longu na gmehere, dege Bo Domo gin bai, io da gin bosoui le ndro mu: 5Johanes gin surhi su le ndran ge, io beg surhi mu gle Meluan Helian, heb eluen bui muren. 6Su da gin me goure, su ndemani i: Ndorlaben, uo beg daui le ndro su Israel gor asu gle nemesu lie? 7I bodeie: Aga mburer ademu bui, le hanguruen rang e vara be longu ogo beg meher. Bo Domo, i da ndoa le longu masigane, i danen i, aga mburer aden ge. 8Ndoui ber belengan na gmeher ndro mu, ar Meluan Helian i gmehere ndro mu. Boen mu gobharni le ndro su longu ordo, hanu le ndro su Jerusalem, boen le ndro su Juda, ma le ndro su Samaria, boen le ndro su gor masigane ber boan.

9Nongen ogo boen, Jesu i voh le belengan, le begmarsu masigane. Ndoulang si gin me, i nhui Jesu, de dansu ilndri i bui. 10Be su dendrai le belengan beg ilndri Jesu, i da gina le lang, sor gamel marmou, sor da baghege ndro su, salo asor beren ge. 11Sor vong le ndro su: Mu gamel ber Galilea, desa mu dendrai le belengan? Jesu ogo i da gina le belengan, i da le dogromu hanu, i gmeher lie dege mu gin ilndri i da gina le belengan.

12Boen su bieni bahali, su bosoui bahali Oliva, i da baghege le gor Jerusalem, sal heb eluen bui, su mul le gor Jerusalem. 13Be su gin meher le gor, su iao le um hom le belengan. Su ogo: Petrus, sor Johanes, Jakobus sor Andreas, Philipus sor Tomas, Bartolomeus sor Mateus, Jakobus ndur Alveus e Simon ndremda mburer, ma Judas, ndur ad Jakobus. 14Su gorbo sidesi, su la geherong su da lodu, su da raring, dagara su bihin holel, homo asu Maria, nanen Jesu ma su ndern lie.

Su loh Matias le surien Judas Iskariot.

15Bersi muren Petrus i dne, be i da le dogrosu masanged e rungul su da gin me goure, i vong, i boi: 16Mu ndere hian, longu masi na gmeher, dege Meluan Helian i da gin bosoui le bohon ad David, longu masi le ad Judas, i da gin dulieni su, su da gin hosi Jesu. 17Ehe, i homo adu, Jesu gin loh i, dege i gin loh du masi, le gob mburer aden. 18I ogo, i gin semani beleng hasel le moni aden, su gin hengen le ndro i, be i gin hevani Jesu, boen i gin sindrdi goln, gin los le boan, ndren gin mbsig. 19Su ndramed ber Jerusalem masigane dansu longu ogo. Le longu ogo su bosoui beleng ogo, ngarn Akeldama, i vonei beleng ber ndrai. 20Dege su gin hondre le Buk Psalm: Um aden gina momen, gina ndumbue, hom ndramed i do da ri bui, ma dagara lie: Homo i ibdi mburer aden. 21Homo asu gamel, su da gin dogi le sal adu, la born ndro Jesu, be Ndorlaben Jesu i da le molengadu sidesi, bing si e rang si. 22Le rang, be Johanes gin surhi Jesu, mabenan le rang be i gina le gor lundielang, gin bieni du, homo asu i da gin ilndri longu ogo masigane, i la born ndro du i sobani du le mburer aden. I gobharni le ndro su, Jesu i gin ndne lie. 23Su gin loh Josev, ngarn aden Barsabas lie, su bosoui ngarn Justus, ma homo ngarn Matias. 24Boen su lodu, su soling: Uo Ndorlaben, uo da danem bergolsu masigane, bosilieni ndro du, sie uo ha lengi, i gob mburer adem. 25Judas i da gin bieni i, boen i gina le logna aden, aga i vonei le mburer aden. 26Boen su gin ilndri gelman le asoro, i gina le ndro Matias, ma su gin ibdi i, i homo asu masongul e rumou.

Currently Selected:

Apostel 1: LLENT

Highlight

Copy