Korint II 11
11
1Ha somui, be io leng bai le ndro mu heb nongen gouge mandehege. Ha somui ri, be io leng vong heb nongen dege ogoro. 2Io da bo mburer, mburer ad Jehova ge. Io gin daui le um ad hom gamel, mu dege ndurbihin rosan monen ge. Nambulen ademu aga Mesias, Kristo. 3Io ha noh longu hendre: Moad i da gin seslaini Eva gle momen, i gin hinen le ndro mu dagara lie. Hanguruen ademu i de heb monen, i de heb rosan le ndro Kristo bui. 4Ar homo, de homo i gmeher ndro mu i bohernou le ndro mu longu le ad Kristo, iou da gin bohernou leri bui, i da heb monen bugane, de ar mu ibdi Meluan gle bergolmu, i Meluan Helian bugane, ar delengamu le nongen ber lang danmu leri masou, be iou gin bohernou le ndro mu longu ber lang, sidesi mu ha somui ri. 5Io hanguruen, io dege su Apostel ber Jerusalem lie. 6Be io de dono bohernou hian bui, io dono Kristo hian monen ge. Danmu leri, io gin henunuen mu leri. 7Io gin hinen longu hendre momen, be io de gin hanguruen longu ordo bui, io gin hanguruen mu ge, io gin bohernou le ndro mu longu ber lang, longu ad Jehova gle molhe, io de gin hanguruen heb surian le mburer ordo bui. 8Su ber gor horo, io gin ibdi surien asu, su gin hengen me ndro io, io da gin bo mburer le ndro mu. 9Io de gin hanguruen heb longu ademu bugane, su ndern ber Masedonia su gin hengen me ndro io le memrad asu, ndangen io de gin hanguruen heb gan anmu bugane, ma io beg hinen i bersi muren dagara lie. 10Aga ndangen, Kristo i da le bergolo, i danen i: Io mbuere su ber Greg su behena mugueni ordo dege ogoro. 11Desa io vong nongen dege ogoro ie? Goloisden mu bui? Aga Jehova i danen i. 12Io beg hinen longu hendre bersi muren lie. Io ha lengi, be su mugueni longu asu, su ghinen i dege io gin hinen i. 13Su ndramed holel su da gin hanguruen momen me ndro io, su Apostel bahilou ge, mburer asu heb monen bui. Su gorni longu asu momen le bergolsu, mandrsu ge i hian. 14Meluo i de ieb leri bui, Satan lie i garbelueni mandrn, i ibdi mandrn ad hom Angelo ber engerang ad Jehova. 15Ma su lao aden su hinen i dagara lie, su ibdi longu hendre e hendre asu lao ad Jesu, be su gamed Jehova i surien longu asu gmonen.
16Io vong bersilie: Mbue hanguruen, io hom ndramed gouge. Ha somui ge, be io beg bosoui le ndro mu heb nongen mandehe gouge. Io ha leng mugueni malabo heb longu ordo. 17Malabo io vong dege Ndorlaben i ha lengi i bui, io ha leng vong heb nongen gouge. Voamuiso ar homo i mugueni bern aden. 18Su mabosanged su mugueni longu hendre e hendre asu, io beg hinen i malabo lie. 19Voamuiso su ndramed gouge, mu ndramed mu da hanguruen, mu danmu longu masi hian. 20Mu ha somui ri, be su ndounen mu, be su behena longu ademu, be su hosi mu gle bahilou asu, mu ha somui ri be su rii bormarmu. 21Io gobharni le ndro mu, dandu hinen longu ogoro masou. Io ha leng vong heb nongen gouge. Ar homo i danen mugueni longu hendre e hendre aden, io dono hinen i lie. 22Su Hebru? Io lie. Su ber Israel? Io lie. Su ndur Abraham? Io lie. 23Su lao dandendegei ad Kristo? Io vong nongen gouge: Io hanu le asu. Io gin bo mburer dsoln, su gin hosi io mabersanged, io da le kalabus, su gin rii io mabosanged, dsoln ge baghege io ginmad. 24Su Juda su gi rii io maberlima, su gin rii io le vosu maberdilingul ondrsi. 25Su gin rii io maberdolo ndoun ndoun, su beg daii io le bad bersi maberdolo baghege io gin lol, bersi io da le ndas lobing e lorang, noui ber ndas gin rui io le horo ma le horo. 26Io gin dogi le sal momen eluen. Longu momen gin meher ndro io le ndran, su daindramed gin bo momen ndro io, su ndere ber gor ordo gin bo momen ndro io, su Haiden gin bo momen me ndro io, io gina momen le gor asu manden, longu momen gin rii io le marboga, le ndas, dagara su ndere momen, su ndere bahilou gin bo momen me ndro io. 27Mabersehe io gina momen le longu hendre e hendre i da gin meher ndro io, be io mamed lobing, dono medir bui, be io gin mundrul, be golo gin mar gle ndran, be heb gan ono bui, be io gin rerr, salo ordo bui. 28Longu hendre gleri, bing si e rang si su gin hilou me ndro io, io gin hanguruen su lao ad Jesu ber gor asu masi, gin bogulue su. 29Ndramed homo i da oho, be longu momen hendre beg rui gle momen ndrnen i de ngendian bui? 30Malabo io beg mugueni ge, io beg mugueni heb longu ogo: Io heb ndoa bui. 31Jehova i Damen ad Jesu Kristo. I danen longu masi, i danen io de bahilou bui, io gabmugueni i ge. Bing si e rang si sidegesi. 32-33Be io da le gor Damaskus, ndorlaben ad King Aretas i gin bogulue gor Damaskus, le su polisboi aden, su beg hosi io. Su gin gorni io le ndob manden, su gin lulueni ndob gle boan, boen io gin vob, gina manan.
Currently Selected:
Korint II 11: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
