Yakobis 4

Jang minta apapa dari Allah iko kamong pung napsu sandiri

4:1-10

1Basudara e, kamong tau mangapa kong kamong baku bakalai deng baku malawang? Itu tagal dalang kamong pung hati, kamong satu-satu cuma mau iko kamong pung napsu jahat sandiri to? Sapa tau bagini, apa yang kamong mau tu seng sama deng apa yang Allah mau. 2Kamong baringing paskali par dapa apapa satu mar kamong seng dapa akang. Jadi kamong bunu orang yang pele kamong par dapa akang. Kamong culas deng orang tagal kamong seng bisa dapa apa yang kamong mau. Jadi kamong baku bakalai deng baku malawang. Kamong seng bisa dapa apa yang kamong mau tagal kamong seng minta dari Allah. 3Mar kalo kamong minta dari Allah jua, Antua seng kasi akang par kamong tagal kamong minta deng maksud yang seng batul. Barang, apa yang kamong minta tu cuma par biking sanang kamong pung diri sa.

4Kamong sama deng parampuang yang su kaweng mar maeng serong deng laki-laki laeng. Kamong tu su ika janji par cuma iko Allah pung mau tarus, mar sakarang kamong seng mau lai. Hoe! Kamong tau ka seng, kalo kamong tarika deng dunya ni pung mau, itu sama sa kamong su musu Allah? Jadi satu kali lai beta bilang, “Sapa yang su tarika deng dunya pung mau, dia su musu Allah.” 5Jang kamong sangka kata Allah pung Tulisang ni seng ada pung arti apapa. Akang bilang kata, “Allah pung Roh yang Antua su kasi par katong tu mau paskali kalo katong hidop iko Antua pung mau sa. Antua jalus paskali kalo katong iko dunya pung mau.”#Kaluar dari Mesir 20:5, 34:14

6Mar biar kata bagitu, Allah masi kasi Antua pung hati bae par katong deng mau paskali par tolong katong. Itu mangapa sampe dalang Allah pung Tulisang ada bilang kata,

“Allah tantang orang yang sombong,

mar tolong orang yang anggap diri seng pung arti apapa.”#Nasehat-Nasehat 3:34

7Tagal itu, katong musti tundu iko Allah pung mau la malawang Setang pung Raja. Kalo kamong malawang Setang pung Raja, dia nanti lari ilang pulu dari kamong. 8Datang dekat-dekat par Allah la Antua jua nanti datang dekat-dekat par kamong lai.

Hoe orang-orang bardosa! Kasi barsi kamong pung diri dari kamong pung dosa-dosa tu! La kasi barsi kamong pung pikirang yang sala tu, hoe kamong yang seng tau mau iko Allah pung mau ka dunya pung mau! 9Kamong musti batul-batul manyasal kamong pung dosa la manangis deng marata. Jang hati sanang deng tatawa buka gigi, mar musti hati susa deng marata tagal kamong su biking dosa. 10Kalo kamong anggap diri seng pung arti apapa di muka Tuhan Allah, Antua nanti angka kamong jadi orang yang panting di muka Antua.

Jang biking busu orang laeng pung nama

4:11-12

11Basudara samua e, jang kamong laeng biking busu laeng pung nama. Sapa yang suka biking busu dia pung basudara yang iko Yesus pung nama deng tudu kalo dia pung basudara tu sala, itu sama sa deng dia anggap enteng Allah pung atorang deng bilang kalo Antua pung atorang tu seng batul. La kalo dia bilang Allah pung atorang tu seng batul, dia pasti seng biking akang. Itu sama sa deng dia su biking diri labe hebat dari Allah pung atorang tu. 12Sapa tau bagini, cuma ada satu Orang sa yang pung hak par biking hukum par hukum manusia deng yang jadi hakim par bilang manusia tu batul ka sala. Antua tu yang pung kuasa par kasi salamat manusia deng kasi ancor manusia. Mar kamong tu sapa sampe barani jadi hakim par orang laeng?

Jang lupa Tuhan kalo mau biking apapa

4:13-17

13Hoe kamong yang bilang kata, “Hari ini ka eso bagitu, katong mau pi ka kota satu la tinggal di sana barang sataong par badagang biar dapa kepeng sadiki do!” Coba dengar apa yang beta mau bilang ni. 14Kamong seng tau apa yang nanti jadi deng kamong pung hidop eso-eso to? Kamong pung hidop tu macang deng asap yang muncul la seng rekeng satu dua tiga lai akang su ilang.#Nasehat-Nasehat 27:1 15Yang batul tu, kamong musti bilang bagini, “Kalo Tuhan sayang katong pung umur panjang, katong mau biking ini deng itu.” 16Mar sakarang, kamong seng biking bagitu. Kamong bicara mangarti soal apa yang kamong mau biking. Itu tu sala basar. 17Jadi, kalo ada orang yang tau bagemana dia musti biking apa yang bae mar seng biking akang, dia tu su biking dosa.

Currently Selected:

Yakobis 4: ABMA

Highlight

Copy

Compare