Yakobis 2

Jang lia-lia muka

2:1-13

1Basudara samua, kamong su parcaya Yesus Kristus, Tuhan yang katong somba yang pung kuasa hebat tu. Jadi jang lia-lia muka. 2Conto bagini: Waktu kamong bakumpul par ibada, ada orang kaya satu datang pake baju bagus deng cincing-cincing mas. La waktu itu jua, ada orang kasiang satu datang pake baju busu-busu deng badaki-badaki. 3Tarus, kamong taru hormat par orang kaya yang pake baju bagus tu. Kamong bilang par dia kata, “Bapa, mari dudu di muka jua.” Mar par orang kasiang tu kamong bilang, “Hoe! Badiri di sana sa!” Ka kamong bilang, “Hoe! Dudu di flur dekat beta pung kaki ni sa!” 4Kalo kamong biking bagitu, kamong su lia-lia muka. La deng kamong pung pikirang jahat tu, kamong su nilai orang.

5Basudara samua yang beta sayang, dengar bae-bae! Allah pili orang-orang kasiang di dunya ni biar dong jadi sunggu-sunggu parcaya Antua. Dong pung parcaya par Antua tu macang deng harta. Antua pili dong biar dong nanti jadi Antua pung orang-orang waktu Antua pegang parenta jadi Raja. Barang, Antua su janji akang par orang-orang yang sayang Antua. 6Mar kamong biking malu orang-orang kasiang tu. Sapa tau bagini, orang-orang kaya tu yang inja-inja kamong deng yang salep kamong par dapa hukum. 7Labe-labe lai, dong tu yang hojat Yesus Kristus yang orang puji deng yang su pili kamong par jadi Antua pung orang-orang.

8Dalang Allah pung Tulisang ada atorang yang paleng panting.#2:8 Ka, “Dalang Allah pung Tulisang, katong pung Raja su kasi atorang par katong.” Atorang tu bagini, “Sayang orang laeng macang deng kamong sayang kamong pung diri sandiri.”#Imam-Imam pung Atorang 19:18; Matius 22:39 Kalo kamong biking atorang tu, itu sama sa kamong su biking apa yang batul. 9Mar kalo kamong lia-lia muka, itu sama sa kamong su biking dosa tagal Allah pung atorang tu su kasi unju tarang-tarang kalo kamong su langgar akang. 10Sapa yang seng biking satu sa dari Allah pung atorang-atorang samua, biar kata dia biking samua atorang yang laeng, itu sama sa deng dia su langgar Allah pung atorang-atorang samua. 11Allah pung atorang bilang bagini, “Jang maeng serong.” Antua jua bilang, “Jang bunu orang.”#Kaluar dari Mesir 20:13-14; Carita Ulang 5:17-18 Jadi kalo kamong seng maeng serong mar bunu orang, itu sama sa deng kamong su seng iko Allah pung atorang-atorang samua.

12Basudara e, kalo kamong bicara ka biking apapa satu bagitu, kamong musti ati-ati tagal Allah nanti putus kamong pung parkara iko Antua pung atorang kalo kamong tu batul ka seng. Atorang tu yang kasi bebas katong biar katong seng dapa hukum tagal katong pung dosa-dosa. 13Barang, kalo kamong seng kasi unju kamong pung rasa kasiang par orang laeng, Allah jua nanti seng kasi unju Antua pung rasa kasiang lai par kamong waktu Antua hukum dunya. Mar orang yang pung rasa kasiang par orang laeng, dia seng usa taku apapa waktu itu.

Orang yang parcaya Yesus Kristus musti biking apa yang Antua mau

2:14-26

14Basudara samua, kalo ada orang yang bilang kata dia parcaya Yesus Kristus mar dia seng biking apa yang Antua mau dalang dia pung hidop, apa yang dia bilang tu seng ada pung guna apapa. Kalo dia parcaya Yesus Kristus deng cara macang bagitu, Allah seng kasi salamat dia. 15Conto bagini: Ada kamong pung basudara yang parcaya Yesus yang seng pung pakiang deng seng pung makanang hari-hari. 16Tarus, satu dari kamong bilang par dia kata, “Salamat ale, bajalang bae-bae! Beta harap Allah nanti kasi makanang deng pakiang par ale.” Kalo kamong cuma bilang bagitu sa mar seng biking apapa par tolong dia, samua yang kamong bilang tu seng ada pung guna apapa. 17Bagitu lai deng katong pung parcaya par Yesus Kristus. Kalo katong bilang kata katong parcaya Antua mar katong seng biking apapa par tolong orang laeng, samua yang katong bilang tu seng ada pung guna apapa.

18Mar mangkali ada orang yang bilang par beta kata, “Ada orang yang parcaya kalo Allah nanti kasi salamat dia cuma tagal dia parcaya Antua. La ada lai yang parcaya kalo Allah nanti kasi salamat dia cuma tagal dia biking apapa par tolong orang laeng.” Beta nanti jawab bagini, “Coba kamong kasi unju par beta bagemana kong kamong bisa parcaya Yesus Kristus mar kamong seng biking apapa par tolong orang laeng. Seng bisa to? Tarus, beta nanti kasi unju par kamong bagemana beta parcaya Yesus Kristus dari apa yang beta biking par tolong orang laeng.”

19Kamong parcaya kalo Allah tu cuma satu to? Bae jua. Mar setang-setang jua parcaya bagitu lai sampe dong gamatar takotang paskali. 20Hoe nau-nau e! Masa beta musti kasi unju bukti par kamong, kalo katong cuma parcaya Yesus Kristus mar seng biking apa yang Antua mau dalang katong pung hidop, akang seng ada pung guna apapa ka? 21Coba pikir bae-bae soal katong pung moyang Abraham. Allah bilang kalo dia tu orang yang pung hidop batul tagal dia kasi dia pung ana Isak par jadi korbang par Allah di atas tampa bakar korbang.#Carita Mula-Mula 22:1-14 22Jadi kamong su tau kalo Abraham pung parcaya par Allah, akang bajalang sama-sama deng apa yang dia biking to? La dari apa yang dia biking, dia pung parcaya par Allah tu jadi antero. 23Apa yang Abraham biking tu, akang sama deng apa yang su tatulis dalang Allah pung Tulisang yang bilang, “Abraham parcaya Allah, tagal itu sampe Antua bilang kalo dia tu orang yang batul di muka Antua.”#Carita Mula-Mula 15:6; Roma 4:3; Galatia 3:6 Itu tu mangapa sampe Abraham dapa panggel par Allah pung tamang bae.#2 Orang Israel pung Sejara 20:7 24Jadi kamong su tau sakarang to? Allah anggap orang tu pung hidop batul bukang cuma tagal dia parcaya Antua sa, mar tagal dia jua biking apa yang Antua mau dalang dia pung hidop. 25Bagitu lai deng Rahab. Biar kata dia tu parampuang tarbae, mar Allah cap dia par orang yang pung hidop batul. Barang, dia su tolong orang Israel pung mata-mata par sambunyi di dia pung ruma deng tolong dong par lari iko jalang laeng.#Yosua 2:1-21

26Jadi, kalo ada orang yang bilang kata dia parcaya Allah mar seng biking apapa par tolong orang laeng, apa yang dia bilang tu seng ada pung guna apapa. Akang sama deng orang mati. Ada badang mar seng ada nyawa.

Currently Selected:

Yakobis 2: ABMA

Highlight

Copy

Compare