Ibrani 10

Yesus Kristus kasi diri par batul-batul tabus katong pung dosa-dosa

10:1-18

1Hukum Torat tu cuma conto sa dari hal-hal yang paleng bae yang katong nanti dapa dari Yesus. Mar, atorang agama tu seng bisa biking katong dapa samua yang bae dari Kristus tu. Tagal itu, akang seng bisa biking orang-orang yang datang somba Allah tu par jadi batul-batul barsi di muka Antua, biar kata dong datang kasi korbang tu sabang taong lai. 2Kalo memang orang-orang yang datang somba Allah tu bisa jadi barsi di muka Antua lewat korbang yang dong kasi, dong seng parlu kasi korbang par Antua lai. Barang, dong su dapa kasi ampong satu kali par tarus-tarus, jadi dong seng rasa kata dong masi bardosa lai. 3Mar dong pung korbang-korbang yang dong bawa sabang taong tu justru kasi inga dong tarus kalo dong tu manusia bardosa. 4Barang, dara sapi laki-laki deng dara kambing laki-laki seng bisa hapus manusia pung dosa.

5Tagal itu, waktu Kristus datang ka dunya, Antua bilang par Allah kata,

“Sio Bapa e! Bapa seng inging korbang ka apa sa yang manusia kasi par Bapa.

Mar, Bapa su kasi siap badang par Beta, par jadi korbang yang Beta nanti kasi par Bapa.

6Bapa seng sanang deng korbang yang dong bakar di atas tampa kasi korbang

ka korbang-korbang yang laeng par hapus dosa-dosa.

7Tarus Beta bilang, ‘Sio Allah e, ini Beta ni.

Beta datang par biking Bapa pung mau,

sama deng apa yang ada tatulis soal Beta dalang Bapa pung Tulisang.’ ”#Lagu-Lagu 40:7-9

8Di atas Kristus bilang, “Allah seng inging deng seng sanang deng korbang-korbang, korbang yang orang bakar di atas tampa kasi korbang, deng apa sa yang orang kasi par Antua biar Antua hapus dong pung dosa-dosa.” Kristus bilang bagitu, biar kata orang-orang kasi korbang-korbang tu iko Hukum Torat lai. 9La Kristus jua bilang, “Ini Beta ni. Beta datang par biking Bapa pung mau.” Jadi, Antua angka buang cara yang lama par hapus dosa la ganti akang deng cara yang baru. 10Yesus Kristus su biking Allah pung mau, par kasi Antua pung diri par jadi korbang. Deng Antua pung korbang tu, katong jadi orang-orang yang barsi dari dosa, satu kali par tarus-tarus.

11Sabang hari, orang Yahudi pung imam-imam ulang-ulang kali badiri biking dong pung karja deng kasi korbang yang sama par Allah. Mar korbang yang dong kasi tu seng parna bisa hapus manusia pung dosa.#Kaluar dari Mesir 29:38 12Mar Yesus, Antua su kasi Antua pung diri par jadi korbang par hapus manusia pung dosa, satu kali par tarus-tarus. Abis itu, Antua dudu pegang parenta tarus-tarus di Allah pung sabala kanang, tampa paleng panting. 13La mulai dari waktu itu, Yesus ada tunggu-tunggu Allah kasi kala Yesus pung musu-musu la biking dong tundu par Antua.#Lagu-Lagu 110:1 14Barang, cuma deng satu kali kasi korbang sa, Antua su biking orang-orang jadi batul di muka Allah sampe tarus-tarus. Dong tu orang-orang yang Antua su biking jadi barsi dari dosa. 15Allah pung Roh jua bilang par katong kalo itu batul:

16“Tuhan bilang, ‘Ini ni janji yang baru yang Beta mau ika deng dong eso lusa.

Beta nanti taru Beta pung atorang-atorang dalang dong pung hati

deng tulis akang dalang dong pung pikirang.

17La Beta seng inga-inga dong pung dosa

deng dong pung kajahatang lai.’ ”#Yeremia 31:33-34

18Jadi, kalo Antua su kasi ampong katong pung dosa-dosa, katong seng parlu kasi korbang tagal dosa-dosa lai.

Mari katong pegang katong pung parcaya kuat-kuat

10:19-39

19Jadi basudara e, tagal Yesus su kasi tumpa Antua pung dara par hapus katong pung dosa-dosa, katong bisa barani datang par Allah. Itu sama sa deng katong barani maso ka Ruang Paleng Kudus. 20Dolo, jalang maso ka tampa tu tatutu deng kaeng pampele basar satu. Mar Yesus su buka jalang yang baru waktu Antua kasi Antua pung diri sandiri par mati. Itu macang deng Antua su kasi tarobe kaeng pampele basar tu biar katong bisa langsung datang par Allah deng hidop tarus-tarus deng Antua. 21Yesus tu jua yang jadi katong pung Imam Basar yang jadi kapala par Antua pung orang-orang samua yang jadi Allah pung ruma. 22Tagal itu, mari datang dekat Allah deng hati antero-antero. Mari datang deng katong pung parcaya yang kuat par Antua. Barang, Yesus su kabas Antua pung dara di katong pung hati par kasi barsi katong pung hati kacil dari dosa deng su kasi barsi katong pung badang deng aer yang barsi waktu katong dapa baptis.#Yeheskel 36:25 23Mari katong pegang katong pung parcaya yang katong su mangaku di muka orang banya tu kuat-kuat. Barang, Allah salalu biking apa yang Antua su janji par katong. 24La mari katong taru kira bagemana katong bisa baku kasi samangat par baku sayang deng biking hal-hal yang bae par orang laeng. 25Jang pamalas bakumpul par ibada macang deng babarapa orang pung biasa. Mar mari bakumpul sama-sama par baku kasi kuat satu deng laeng, deng labe tamba samangat par biking akang tagal katong tau kalo waktu par Tuhan Yesus mau bale kombali tu su dekat.

26Kalo katong su tarima ajarang yang batul dari Tuhan la abis itu katong masi tetap sangaja biking dosa, seng ada korbang laeng lai yang bisa hapus katong pung dosa tu. 27Sapa yang masi hidop macang bagitu, dia cuma tinggal tunggu-tunggu deng taku Allah kasi jatu hukumang par dia deng buang dia dalang api yang manyala hebat, yang Allah kasi siap par makang orang-orang yang malawang Antua.#Yesaya 26:11 28Sapa yang malawang Hukum Torat yang Musa su tulis tu, asal ada dua ka tiga saksi yang bilang bagitu, dia pasti seng dapa kasi ampong deng pasti dapa hukum mati.#Carita Ulang 17:6, 19:15 29Kalo orang yang malawang Hukum Torat tu sa dapa hukum macang bagitu, apalai orang yang bale balakang dari Yesus Kristus? Dia tu su seng taru hormat sadiki lai par Allah pung Ana. Dia su anggap enteng Yesus pung dara yang kasi sah Allah pung janji deng yang kasi barsi dia pung dosa-dosa. Deng dia jua su hina Antua pung Roh yang kasi berkat basar par dia. Jadi, dia pasti dapa hukum labe barát lai.#Kaluar dari Mesir 24:8 30Barang, katong kanal sapa itu Allah yang bilang,

“Beta yang pung hak par balas orang yang biking kajahatang.

Beta yang nanti hukum dong.”

Antua jua bilang lai,

“Tuhan nanti putus hukumang par Antua pung orang-orang.”#Carita Ulang 32:35-36

31Bulu badang badiri paskali kalo sampe katong dapa hukum dari Allah yang hidop tu.

32Basudara e! Kamong inga apa yang jadi dolo abis kamong tarima Kabar Bae yang kasi tarang kamong pung hati tu ka seng? Waktu itu, kamong paleng susa deng sangsara tagal kamong pung parcaya, mar kamong tetap pegang kamong pung parcaya tu kuat-kuat. 33Ada dari kamong yang dapa biking malu deng dapa siksa di muka orang banya. Ada dari kamong jua yang tolong kamong pung sudara yang dapa biking macang bagitu sampe kamong sandiri jua susa. 34Memang kamong sandiri rasa susa deng kamong pung basudara yang dapa bui tagal parcaya. La waktu kamong pung harta dapa rampas, kamong tarima samua tu deng hati sanang tagal kamong tau kalo kamong nanti tarima harta yang labe bagus deng yang batahang tarus-tarus dari Allah.

35Jadi, jang buang kamong pung parcaya yang kamong pegang kuat-kuat tu. Barang, Allah nanti balas kamong banya-banya. 36Jadi kamong musti pegang kamong pung parcaya tu kuat-kuat tarus biar kata dapa siksa lai, biar kamong bisa biking Allah pung mau. Deng bagitu, kamong nanti tarima apa yang Antua su janji par kamong.

37Barang, dalang Allah pung Tulisang ada bilang bagini,

“Tinggal sadiki tempo lai, Antua yang mau datang tu, su mau datang.

Antua seng tunggu-tunggu lai.

38Antua pung orang yang batul di muka Antua tagal dia parcaya Antua,

dia nanti hidop tarus-tarus deng Antua.

Mar kalo dia bale balakang dari dia pung parcaya,

Beta nanti seng sanang deng dia.”#Habakuk 2:3-4

39Katong ni bukang orang-orang yang bale balakang dari katong pung parcaya la dapa kasi binasa. Mar, katong ni orang-orang yang parcaya deng yang nanti dapa kasi salamat.

Currently Selected:

Ibrani 10: ABMA

Highlight

Copy

Compare