2 Korintus 3

Jamaat Korintus sama deng surat yang Kristus tulis par puji-puji Paulus dong pung karja

3:1-6

1Basudara e! Jang sangka kata waktu beta bilang bagitu, katong su mulai bicara makang puji diri sandiri lai. Ka, jang sampe katong musti kasi unju surat satu yang orang laeng ka kamong tulis par puji-puji katong, macang apa yang orang biasa biking? Seng parlu! 2Barang, kamong tu macang deng surat yang puji-puji katong, yang tasimpang dalang katong pung hati, deng yang samua orang bisa baca akang. Barang, dari kamong pung hidop yang bae tu, samua orang bisa tau katong pung hasil karja. 3Su kantara kalo kamong tu macang deng surat dari Kristus, yang Antua tulis lewat katong pung karja par kamong. Antua tulis akang bukang deng tinta, mar deng Allah yang hidop tu pung Roh, bukang di atas batu,#3:3 Di atas batu: Yang Paulus maksud tu batu dua bala yang tulis Allah pung parenta-parenta yang Allah kasi par Musa di gunung Sinai (Kaluar dari Mesir 24:12, 31:18). mar dalang manusia pung hati.

4Katong barani bilang bagitu tagal katong batul-batul parcaya par Allah tagal apa yang Kristus biking. 5Beta pung maksud bukang kata katong bisa biking katong pung karja tu deng bae deng katong pung kuat sandiri. Allah sandiri yang tolong katong sampe katong bisa biking samua tu. 6Antua tu yang tolong katong sampe katong jua bisa jadi Antua pung orang-orang karja yang kasi tau Antua pung janji yang baru yang Antua ika deng manusia. Dasar dari janji yang baru tu bukang atorang-atorang yang tatulis, mar Allah pung Roh. Barang, kalo katong coba biking atorang-atorang yang tatulis tu par jadi batul di muka Allah, katong pasti mati. Mar Allah pung Roh biking katong hidop tarus-tarus.

Janji yang baru yang Allah ika deng manusia

3:7-18

7Memang, janji yang lama yang tatulis di batu tu biking orang yang seng bisa iko akang nanti mati. Mar biar kata bagitu, Allah pung kuasa biking sampe Musa pung muka kasi kaluar sinar tarang waktu dia tarima akang. Sinar tarang dari Musa pung muka tu memang tamba hari tamba ilang. Mar sinar tu paleng tarang paskali sampe orang-orang Israel seng kuat nganga Musa.#Kaluar dari Mesir 34:29-35 Kalo hukum yang tatulis di batu tu sa datang deng Allah pung kuasa yang hebat macang bagitu, 8bagemana lai deng janji yang baru dari Allah yang karja lewat Antua pung Roh? Akang pasti datang deng Allah pung kuasa yang labe hebat lai. 9Beta pung maksud, kalo janji yang lama yang biking orang par mati tu sa datang deng Allah pung kuasa yang hebat macang bagitu, apalai deng janji yang baru yang biking Allah anggap katong pung hidop batul di muka Antua tu? Akang pasti datang deng Allah pung kuasa yang labe hebat dari itu lai. 10Jadi, janji yang lama yang datang deng Allah pung kuasa yang hebat tu, sakarang seng ada pung arti apapa lai kalo katong banding akang deng janji yang baru yang jau labe hebat deng luar biasa ni. 11Barang, kalo janji yang lama yang ada par sadiki tempo tu sa kasi unju Allah pung kuasa yang hebat, pasti janji yang baru yang batahang tarus-tarus tu kasi unju Antua pung kuasa yang labe hebat lai.

12Tagal katong taru harap par janji yang baru tu, katong barani par kasi tau akang par orang-orang. 13Katong seng tutu akang, sama deng Musa yang tutu dia pung muka deng kaeng biar orang Israel seng lia sinar tarang dari dia pung muka tu waktu akang tamba hari tamba ilang. 14Orang Israel tu pung pikirang tatutu. Sampe sakarang jua, kalo dong baca janji yang lama tu, macang kata ada kaeng satu yang tutu dong pung pikirang, sampe dong seng bisa mangarti akang. Seng ada satu orang lai yang bisa kasi lapas kaeng tu dari dong pung pikirang biar dong bisa mangarti, cuma Kristus sa. 15Mala sampe sakarang ni, sabang kali dong baca Kitab Torat yang Musa tulis tu, macang kata ada kaeng satu yang tutu dong pung pikirang. 16Mar kalo ada satu orang yang mau kasi tinggal dia pung dosa la bale iko Tuhan, kaeng yang tutu dia pung pikirang tu talapas. 17Tuhan tu Roh, jadi kalo Tuhan pung Roh tinggal dalang katong pung hati, katong seng jadi jongos par atorang-atorang tu lai par jadi salamat. 18Katong samua yang parcaya Tuhan ni pung pikirang seng tatutu lai. Katong samua macang deng kaca, tagal orang laeng bisa lia Tuhan pung kuasa yang hebat karja dalang katong pung hidop. Tuhan tu Roh. Antua salalu roba katong pung hidop par jadi sama deng Antua pung tabiat, biar labe hari katong labe tamba sama deng Antua yang pung kuasa hebat.

Currently Selected:

2 Korintus 3: ABMA

Highlight

Copy

Compare