1 Timotius 5
5
Soal bagemana kasi nasehat basudara yang parcaya
5:1-2
1Timotius, kalo ale tagor laki-laki yang labe tua, jang tagor dong deng kasar, mar bicara bae-bae par dong macang deng ale bicara par ale pung bapa sandiri. La par laki-laki yang muda, kasi nasehat dong macang deng ale pung ade laki-laki sandiri. 2Bagitu lai deng parampuang-parampuang yang labe tua. Bicara bae-bae par dong macang deng ale pung mama sandiri. La par parampuang-parampuang yang muda, kasi nasehat dong deng hati barsi macang deng ale pung ade parampuang sandiri.
Soal bagemana tolong janda-janda
5:3-16
3Ale musti taru hormat deng tolong janda-janda yang batul-batul hidop sandiri. 4Mar kalo ada janda yang pung ana ka cucu, kasi nasehat dia pung ana ka cucu tu biar dong tolong dong pung kaluarga kamuka. Kalo dong biking bagitu, dong kasi unju kalo dong parcaya Tuhan deng balas dong pung orang tatua deng nene pung bae. Barang, Allah pung hati sanang kalo dong biking bagitu. 5Janda yang batul-batul hidop sandiri, yang seng ada yang lia deng jaga dia, dia tu cuma taru harap par Allah sa. Dia siang-malang sombayang tarus minta tolong dari Allah. 6Mar kalo janda yang suka hidop sanang-sanang iko dia pung mau sa, dia tu su tapisa jau dari Tuhan.
7Ale musti kasi tau samua ni par orang-orang parcaya biar orang seng bisa bilang kalo dong ada biking apapa yang sala. 8Mar kalo ada orang yang seng mau urus dia pung basudara, labe-labe lai dia pung kaluarga sandiri, itu dia su manyangkal apa yang katong parcaya. Dia tu labe jahat lai dari orang-orang yang seng parcaya Tuhan Yesus.
9Timotius, waktu tulis janda-janda pung nama yang kamong mau tolong, tulis janda yang pung umur anam pulu taong ka atas deng seng parna maeng serong. 10Janda tu jua, orang musti kanal dia tu suka biking apa yang bae. Conto bagini: Dia jaga deng piara anana bae-bae, mau tarima sapa sa manumpang di dia pung ruma, kalesang orang-orang parcaya,#5:10 Kalesang orang-orang parcaya: Bahasa Yunani bilang, “dia cuci orang-orang parcaya pung kaki”. Dalang orang Yahudi pung cara hidop hari-hari, jongos yang jaga cuci dia pung bos pung kaki ka orang-orang yang datang batamu pung kaki. Jadi, janda tu jua biking karja yang orang anggap paleng hina macang cuci orang pung kaki. tolong orang-orang yang ada susa, deng usaha sunggu-sunggu biking apa sa yang bae.
11Mar janda-janda yang muda, jang tulis dong pung nama. Barang, kalo dong pung napsu nai, dong cuma pikir par mau kaweng sa la lupa dong pung janji kalo dong mau hidop cuma par Kristus. 12Jadi, Allah nanti hukum dong tagal dong su langgar dong pung janji tu. 13Apalai dong jadi pamalas deng paleng suka maso-kaluar orang pung ruma. La yang paleng tarbae lai, dong suka bacarita orang deng suka bacampor deng orang laeng pung urusang, deng jaga bicara apapa yang dong seng parlu bicara. 14Tagal itu beta, Paulus, mau janda-janda yang muda kaweng sa biar dong ada pung anana deng urus ruma tangga. Kalo dong biking bagitu, orang-orang yang seng parcaya Tuhan seng ada pung alasang par biking busu katong pung nama. 15Beta bilang bagini tagal ada janda-janda muda yang su bale balakang dari Tuhan la hidop iko Setang pung Raja pung mau.
16Kalo ada parampuang yang parcaya Tuhan yang pung kaluarga ada yang janda, dia musti bantu dia pung kaluarga yang janda tu biar seng biking susa jamaat. Deng bagitu, jamaat tu bisa bantu janda-janda laeng yang batul-batul seng ada pung kaluarga.
Nasehat soal penatua-penatua
5:17-25
17Timotius, penatua-penatua jamaat yang pimping jamaat bae-bae, jamaat musti balas dong pung lala dua kali lipa, labe-labe lai par penatua-penatua jamaat yang rajing kasi tau soal Allah pung ajarang deng yang jaga kasi balajar akang par orang-orang. 18Barang, Allah pung Tulisang ada bilang bagini, “Karbou yang ada inja-inja gandum par kasi talapas akang pung kuli tu, jang kamong tutu akang pung mulu. Kasi tinggal akang makang gandum tu sadiki.”#Carita Ulang 25:4 Allah pung Tulisang ada bilang lai kata, “Orang yang karja par Tuhan tu pantas tarima dia pung ongkos lala.”#Lukas 10:7
19Timotius, kalo ada orang yang tudu penatua, jang langsung tarima akang do. Ale baru bisa tarima akang kalo ada labe dari satu orang saksi yang bilang kalo penatua tu batul-batul sala.#Carita Ulang 19:15 20Kalo ada penatua yang tinggal kong biking dosa, ale musti tagor dia di muka orang banya biar orang laeng taku la jang ada yang biking macang bagitu lai.
21Timotius e! Allah, Yesus Kristus, deng malekat-malekat yang Allah su pili, jadi saksi par apa yang beta mau bilang ni. Beta minta ale jang barát sabala waktu biking atorang-atorang yang beta su bilang ni deng jang lia-lia muka waktu urus orang pung masala. 22Jang paparipi taru tangang di atas orang par angka dia jadi Tuhan pung orang karja. Barang kalo dia biking dosa, ale iko tanggong dia pung dosa lai. La jaga hati biar barsi tarus.
23Timotius e! Tagal ale pung poro suka saki-saki, jang cuma minong aer puti sa, mar campor akang deng anggor sadiki par jadi obat par ale.
24Ada orang-orang pung dosa yang bisa dapa lia tarang-tarang, biar kata dong yang biking dosa tu balong dapa kasi sala. Mar ada orang-orang pung dosa yang tasambunyi sakarang, mar nanti lama-lama baru orang laeng tau akang. 25Bagitu lai deng apa yang bae yang orang-orang biking. Ada yang bisa dapa lia tarang-tarang, deng ada yang nanti lama-lama baru orang laeng tau akang, tagal seng ada yang bisa tasambunyi tarus.
Currently Selected:
1 Timotius 5: ABMA
Highlight
Copy
Compare
Share
Want to have your highlights saved across all your devices? Sign up or sign in
© 2022, Sinode Gereja Protestan Maluku
