Josue 8

Mbongulu jiAi

1Fumu amatsingula Josue rie: Guyalaba keri, guyakambulu! Bonga bagora botsu, wendanu yetoyisanu bisi Ai. Gulu nyiwakisi kaga jiAi ombu gagu, nesi batu bandi, nesi musiengi andi nesi bulongu buandi. 2Gukavayila Ai na kaga andi dedi mosi nana gumavayila Jericho na kaga andi; dimosi buandi, jenu na bagora bagu dukakelisa abiukindu na biruitsi wandi. Rambanu murambu o nsima musiengi.

3Josue amawenda na bagora botsu uyetoyisa bisi Ai. Amasola magumarieru matosini tsibangogaga bangensa aba amasindiga mukolu, 4na amabaruma maruma memama rie: Guluanu, dukayeramba murambu o nsima musiengi, duyakakana vala na musiengi, dukakunsama, jenu botsu. 5Tumba jetu na batu basusu tukueka o musiengi ava bopalila utubengusana nana bamavayila temu ajitega mbana tubarina nana temu ajitega. 6Botubingisa te na tubaduta vala na musiengi. Bovosa rie: Urina beturini nana bamaleturinina temu ajitega! 7Mbana jenu dupisula murambu, diwendi rie; duvinga o musiengi na Fumu Nsambi enu oduwakisa uonyi. 8Dunobonga musiengi dukagunyensa, dukavaga dedi mosi nana Fumu amavosila. Dutsigulu adi nyidutsinguli?

9Josue amabasoyiga na bamayeramba murambu va gari Bethel na Ai o yiari ayi wisi ewendisini yiAi. Tumba mukolu eni Josue amasilimina na bagora basusu.

10Josue amarelama kedi jineni na amalegukiga bagora bandi mbana jogu na bivunda biIsrael bamawenda uyetoyisa bisi Ai. 11Bagora botsu abamaba nandi bamawenda o gusu ava bamatolila va nsungisini na musiengi, bamavaga milaku o yiari yibanda yiAi, yika yibususu yimabakakasana. 12Josue amasola bebeli na tosini yiranu tsibagora abamarambila murambu va gari Bethel na Ai o yiari ayi wisi ewendisini yimusiengi. 13Bagora banomana ubala milaku miogu o banda jimusiengi na murambu unorambu o yiari ayi wisi ewendisini yimusiengi vana mukolu eni Josue amakueka te na yibususu. 14Ava kaga jiAi amalabila dionyi, bisi Ai bamarelama mambangu kedi jineni, bamayebengusana baIsrael ubatoyisa. Kaga amawenda na batu bandi botsu o mbura ajimasolu o yiari yikumu. Asamajaba yiri o nsima musiengi umamurambulu murambu. 15Josue na baIsrael botsu bamavaga nderi bamabetsu na bamarina o yiari yikumu. 16Mbana batu botsu abamaba o musiengi bamagungasana ubabingisa. Bambingisa Josue te na bamabegu vala na musiengi. 17O Ai na Bethel usamaba ne dibaala dimosi adisamapala utoyisa baIsrael. Ava bamabingisila baIsrael bamasila musiengi yika nana. 18Fumu amaruma Josue rie: Samba dibaga diagu o yiari yiAi mu mbari nyirondi uguvega musiengi eni.

Mbana Josue amasamba dibaga diandi o yiari yimusiengi. 19Yika esambi dikaka diandi, bagora abamaba murambu bamasundila upala va mbura ogu; bamakota o musiengi, bamagubonga na bamagunyensa vana vana.

20Ava bisi Ai bamagengilila o nsima ogu bamalabilila nsumbili uronguga jironguyi na basamamuerungula urina nesi yiari yiotsu. BaIsrael abamarinasana o yiari yikumu bamagabuga ubenguna na abamababingisa. 21Josue na baIsrael botsu banolaba yiri bagora abamaba murambu bamanyensa musiengi bamagabusila uyitoyisa bisi Ai. 22BaIsrael bamosi bamapalila o musiengi uyebabengusana; bisi Ai bamatsiengulu na baIsrael yiari na yiari. BaIsrael bamababetsa, bamabokisa botsu, basamasila ne umosi, ne umosi asamarina; 23yika kaga jiAi, bamamubega muviga ombu Josue. 24BaIsrael bamaboka bisi Ai botsu abamarina o kumu agu bamababingisila te na botsu bamaboku na baIsrael bamagabuga o Ai, bamayemanisila ubokisa abamasialulu. 25Dutalu adumaboku muna yilumbu yieni dumaba yigumi na tosini beji; nesi babaala, nesi bagetu, diwendi rie: bisi Ai botsu. 26Josue asamasundusa gogu andi agumaba usambu na dibaga te na vana bisi Ai botsu bamaboku. 27Dimosi buandi baIsrael bamabonga dikabu diogu, diwendi rie: biruitsi na abimakindu o musiengi eni, bamadivaga na musuga agu Fumu amavega Josue. 28Josue amanyensa Ai na amagukiga abimanyensu, diguki dieni dikivu te na namunyi. 29Bamasuekiga kaga jiAi va muiri na bamamusila vana te na tsisiga. Ava tsisiga Josue amaruma yiri basundusi mfumbi, bamajibuaga va dikotulu dimusiengi na bamajidibiga na diguki dineni dimamanyi, dionyi dikivu te na namunyi.

Josue uranga erangi migaga o julu mukongu uEbal

(Mig 27.1-26)

30Avana Josue amarungila yinyensulu yipagu yiFumu Nsambi Israel va julu mukongu uEbal, 31nana Moise, musalitsi uFumu amarumina baIsrael na nana dimasonugulu mu dibuku dimigaga miMoise rie: Yimaba yinyensulu yipagu yimamanyi amasamapaku, amasamadukusu na budilu. Bamavagulila Fumu pagu tsiunyensa va yinyensulu yipagu na bamavagula pagu tsikabusulu tsimaboti. 32Avana Josue amamuesonunina migaga ami Moise amalesonina va misu mabaIsrael. 33Mbana baIsrael botsu na bivunda biogu bibagora na bansonsi bogu bamaba yiari na yiari biyigara yipangini yiFumu va gusu bisi Levi abamaba bavagulitsi bapagu, abamabeganga yigara yipangini yiFumu; nesi benyi, nesi baIsrael, botsu bamaba vana, bamosi o yiari yimukongu uGarizim na basusu o yiari yimukongu uEbal nana musuga umalevegulu Moise, musalitsi uFumu agumagabila batu baIsrael miula 34Mbana Josue amaranga migaga miotsu na miula na milogu nana mimasonugulu mu dibuku dimigaga. 35Vasamaba ne diambu dimosi adi Moise amasona adi Josue asamaranga va gusu dibuli diIsrael; nesi bagetu nesi baana nesi abamatsana nogu.

Currently Selected:

Josue 8: PUU1992

Highlight

Copy