'Olic 78
78
O Kawas ato Finawlan Ningra
O 'olic ni Asaf, o sapasifana' a 'olic.
1Kamo o finawlan Ako, pitngil to pipasifana' Ako,
pina'on a mitngil kamo to sowal Ako.
2Pakaynien Ako i tinako ko pitadtad a somowal,
pakaynien Ako i pakakawakawasay a sowal ko pikadkad to kakmoday a rayray,
3oya matngilay, kafana'an ita a dmak to nano nisowalan no tato'asan ita a dmak.
4Caay ko sasimeden ita konini a dmak i wawawawa ita,
o papasowalen ita cangra to pakayniay i fangcal ato tadamaanay a 'icel no Tapang ato kafahka'an a dmak Ningra.
5Paflien Ningra to rikec ko finawlan no Israil,
paflien Ningra to rikec ko tloc ni Yakop.
Palimo'oten Ningra ko tato'asan ita a papipasifana' to rikec Ningra i wawawawa nangra.
6Ta mafana' ko tlotloc a paratoh i tlotloc nangra.
7Ta mafana' cangra a miti'er to Kawas a caay ka tawal nangra ko nano nidmakan Ningra,
ta mida'oc cangra a ma'imer to limo'ot no Kawas.
8Ta caay ka matiya o tato'asan ita cangra a pacoli to limo'ot,
caay ka tanektek ko piti'er nangra to Kawas,
caay ka so'lin ko pitoor nangra i Cingraan.
9Talacowa cipana' a milood ko tlotloc ni Ifraim,
nikawrira, yo piloodanto a romi'ad i, milaliw cangra.
10Caay ka 'imer cangra to katatlekan nangra ato Kawas,
caay pido^do cangra to rikec no Kawas.
11Matawalto nangra ko nano dmak no Kawas,
matawalto nangra ko nipahapinangan no Kawas i cangraan a kafahka'an a dmak.
12Pahapinangen no Kawas i ka'ayaw no tato'asan ita ko kafahka'an a dmak, itira i Icip, i Coan a pala.
13Latosaen Ningra ko riyar,
matiya sa o patih#78.13 patih -- o roma i, padal (katimol). a tomireng ko nanom.
Kriden Ningra ko tato'asan ita a pakayra a romakat.
14O romi'ad i, pakaynien no Kawas i to'em ko nipikrid i cangraan,
o dadaya i, pakaynien Ningra i likat no namal ko nipikrid i cangraan.
15I kohkohan i, pla'en Ningra ko 'ongcoy a pasadak to nai kmod a nanom.
16Papowaren Ningra ko nemnem a nanom a pasadak nai 'ongcoy,
samatiya sa o kalidkid no nanom no 'alo ko kapowar nira.
17Nikawrira, pararid cangra a ciraraw i ka'ayaw no Kawas,
pacolien nangra i kohkohan ko Isatakaraway a Kawas.
18Padteng sa cangra a milifet to Kawas a milongoc to kangalayan nangra a kakaenen.
19Sangaliwngiw sa cangra a somowal, <<Ma^deng ko Kawas a patahka i titaanan i kohkohan saw?
20So'linay sti' han Ningra ko 'ongcoy i,
powar sa ko nanom a masadak,
nikawrira, ma^deng Cingra a pafli to ^pang ato titi to malokakaenen ita o finawlan Ningra saw?>> saan.
21Mitngil ko Tapang tonini a sowal i, makter Cingra,
saka, todoh han Ningra ko Yakop a finawlan Ningra,
caayto paka'met Cingra to kter Ningra to Israil.
22Nawhani caay paso'lin cangra i Cingraan,
caay piti'er cangra to 'icel Ningra a pa'orip.
23Nikawrira, palimo'oten no Kawas ko kakarayan a papifawah to fawahan nira,
24Tfaden Ningra nai kakarayan ko kakaenen nangra,
mapa^pod ko mana a pakaen i cangraan.
25Saka, komaen ko tamdaw to kakaenen no coyoh,
pafcolen no Kawas cangra.
26Palowaden no Kawas ko fadat a fali a papifiyok,
pakaynien haca Ningra i 'icel Ningra a palowad ko safalat a fali a papifiyok.
27Ta matfad ko ma^feray a 'ayam a matiya o alafoh,
paflien Ningra cangra to malokakaenen nangra a titi,
samatiya sa o tafok no riyar ko nika adihay nanira.
28Tfaden Ningra konini a 'ayam i kamaro'an nangra i taliyok no talo'an.
29Komaen cangra a ma^min, mafcolto cangra a komaen,
do^do han no Kawas ko kangalayan nangra a pafli.
30Nikawrira, awaay ko pa^dengan nangra a komaen,
yo mipa'pa'ho cangra i,
31makter ko Kawas i cangraan,
patayen Ningra ko ci'ice'icelay nangra,
tkopen Ningra ko satadamaanay a kapah no Israil.
32Talacowa ira ko matiniay a kafahka'an a dmak no Kawas,
nikawrira, oyananto a pararid cangra a ciraraw,
talacowa ira konini a kafahka'an a dmak, oyananto a caay paso'lin cangra.
33Orasaka, talifahal han no Kawas a pahrek ko 'orip nangra,
saka, talifahal sa a mapades ko 'orip nangra.
34Yo patayen no Kawas cangra i,
pasasiyor a mifalic to faloco' ko romaroma nangra,
misa'icel cangra a milongoc to Kawas.
35Maharatengto nangra ko Kawas o midipotay i cangraan,
o pa'oripay i cangraan Cingra o Isatakaraway a Kawas saan.
36Nikawrira, sahto o misa'fitay o misamangahay ko sowal nangra to saki Cingraan.
37Caay ka so'lin ko faloco' nangra i Kawas,
caay pido^do cangra to katatlekan nangra ato Kawas.
38Nikawrira, adayay ko Kawas to finawlan Ningra,
kinapinapi:nato Cingra a mi'met to kter Ningra,
hpolen Ningra ko raraw nangra,
caay pitkop Cingra i cangraan.
39Nawhani, maharatengto no Kawas ko nika o tadancaay,
o mamapatapatay aca ko tamdaw,
matiya o nifiyokan no fali cangra, caay patiko.
40Kinapinapi:nato cangra a pacoli to Kawas a mararid a mipakararom
i Cingraan itira i kohkohan.
41Kinapinapi:nato cangra a milifet to Kawas,
pakakteren nangra Cingra o Fangcalay a Kawas no Israil.
42Caayto ka harateng nangra ko tadamaanay a 'icel Ningra,
caayto ka harateng nangra koya pipa'orip Ningra i cangraan a paliyas nai 'ada,
43matawalto nangra koya kafahka'an a dmak no Kawas i Icip,
matawalto nangra koya kafahka'an a dmak Ningra i dafdaf no Coan.
44Palarmesen Ningra ko nanom no 'alo,
ta caayto ka nga'ay a nanomen no Icip a tamdaw.
45Papiri'angen Ningra ko masafrengay a lalangaw i cangraan,
papikari'angen Ningra ko takora' to omah nangra.
46Papi^minen Ningra a papikaen ko kakloy to pinaloma nangra,
papiri'angen Ningra ko riri' to liomah nangra.
47Tfaden Ningra ko masa'ika'ikayay a so^da a mipatay to fadisoso' a kilang,
o malaso^daay a 'o'ol ko sapipatay Ningra to sokon a kilang.
48Tfaden Ningra ko masa'ika'ikayay a so^da a mipatay to masaflaway a kolong nangra,
o fitili'#78.48 Tfaden Ningra ko masa'ika'ikayay a so^da ... o fitili' -- ano ^ca i, paadadaen Ningra ... palifongen. ko sapitodoh Ningra to masaflaway a siri.
49Tata'ang ko kter no Kawas saka, ocoren Ningra ko mipatayay a coyoh a papikari'ang i cangraan,
saka, caay ka samadah ko pades nangra.
50Caayto pi'met Cingra to kter Ningra,
caayto ka limla Cingra to 'orip nangra,
saka, pakaynien Ningra i lifong ko nipipatay i cangraan.
51Patayen Ningra ko fisac a wawa no tloc ni Ham,
oya Icip a tamdaw a ma^min.
52Nanoya, samatiyaen no Kawas o pakaenay to siri ko nipikrid to finawlan Ningra,
kriden Ningra cangra a matiya o masaflaway a siri a pakayra i kohkohan.
53Manga'ay ko pikrid Ningra i cangraan,
saka, awaay ko katalawan nangra,
tahpoen no riyar ko 'ada nangra.
54Kriden Ningra cangra a patayra i fangcalay a pala Ningra,
patayraen Ningra cangra i nialaan Ningra a lotok.
55Yo micomod ko finawlan Ningra i, i 'ayawto Cingra a milaplap toya roma a finacadan,
pakilacen Ningra to sra ko kasangasangasaw no Israil a pakamaro' i cangraan i nano loma' no roma a finacadan.
56Nikawrira, pacoli cangra to Isatakaraway a Kawas a milifet i Cingraan,
caay pido^do cangra to limo'ot Ningra.
57Milcad cangra to tato'asan nangra a pacoli to Kawas a caay ka so'lin ko faloco' nangra,
matiya o mafrayay a focol no pana' cangra a caay ko tati'eren.
58Misanga' cangra to pisalisinan to kawas no roma a finacadan a pakakter to Kawas,
to^to'en nangra ko samiyay a paka'inap a pakatlii i Cingraan.
59Minengneng ko Kawas tonini i, kter sato Cingra,
saka, falah hanto Ningra ko Israil.
60Liyasen no Kawas ko talo'an Ningra i Silo,
oya kamaro'an Ningra yo mikapot i titaanan.
61Pakonira hanto Ningra ko pi'afas no 'ada toya pipahapinangan to 'icel ato 'dil Ningra a Katatlekan a Lipa.
62Makter Cingra to finawlan Ningra,
saka, pakonira hanto Ningra ko 'ada a mitatoy to fonos ato 'idoc a mipatay i cangraan.
63Mapatay i piloodan ko kapah nangra,
saka, awaayto ko malofa'inay no kaying.
64Mapatay no fonos ko citodongay to ta'ong,
caayto ka rarom ko maponengay nangra.
65Nanoya, matiya o talipa'lalay na mafoti' ko Tapang,
samatiya sa o mapalowaday no ^pah a malasangay a ci'icelay a tamdaw Cingra.
66Laplapen Ningra ko 'ada,
caayto samadahen Ningra a milowid a pakangodo cangra.
67Falahen Ningra ko tloc ni Yosif,
caay pili'en Ningra ko ngasaw no Ifraim.
68O ngasaw ni Yuta ko nipili'an Ningra,
o kaolahan Ningra ko Cion a lotok.
69Patirengen Ningra itira ko Fangcalay Pita'ongan,
matiya o nika takaraw no kakarayan ko nika takaraw nira,
matiya o nika tanektek no sra ko nika tanektek no loma' Ningra a tahada'oc.
70Pili'en Ningra ko malomatayalay Ningra ci Tafiti,
tahidangen Ningra cingra nai pipakaenan to siri.
71Caayto papipakaenen Ningra cingra to masaflaway a siri,
patirengen Ningra cingra a palahongti no Israil a papidipot to finawlan no Kawas.
72Sarocod sa ko faloco' ni Tafiti a midipot i cangraan,
citaneng cingra a mikrid i cangraan.
Currently Selected:
'Olic 78: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
