Matay 4

O Pilifet ci Yisan

(Maroko 1.12-13; Luka 4.1-13)

1Itiyasato, makrid no Fangcalay 'Adingo ci Yis a tayra i kohkohan a malifet no Palafoay. 2Namisaliway Cingra to spat a polo' a romi'ad ato dadaya i, macahiwto ci Yis. 3Itiya i, ira a miraod i Cingraan ko misawiay a Palafoay a somowal, <<Ano o Wawa no Kawas Kiso i, kala^pang kamo, han a somowal konini a fokloh,>> han nira.

4Paca'of sa ci Yis, << <Caay ko kakaenen a ccay ko saka'orip no tamdaw. O sowal no Kawas to kahaccaccay ko saka'orip no tamdaw,> saan ko sowal a matilid i Fangcalay Cudad,>> han ni Yis.

5Itiya sato, kriden haca noya Palafoay ci Yis a tayra i Fangcalay Niyaro', patirengen nira Cingra i 'apaponong no fadahong no Fangcalay Pita'ongan. 6Sowal sa i Cingraan, <<Ano o Wawa no Kawas Kiso i, pihitfo i la^no. Nawhani

<O papalimo'oten no Kawas ko coyocoyoh Ningra.

Saka, o cacadaen nangra to kamay Kiso to saka^caaw ka pasta' no wa'ay Iso i fokloh a cidoka',>

saan ko sowal a matilid i Fangcalay Cudad,>> han nira.

7Paca'of sa ci Yis, << <Aka pakapilifet to Tapang a Kawas iso,> saan ko sowal a matilid i Fangcalay Cudad,>> han Ningra.

8Saikorayto i, kridan no Palafoay ci Yis a tayra i satakaraway a tokos. Patiri'en nira ci Yis to polong no kitakit no hkal ato nika tadamaan nonini. 9Sowal sa koya Palafoay i Cingraan, <<Ano mipitosor Kiso a mita'ong i takowanan i, paflien ako Kiso tonini a ma^min,>> han nira.

10Saka, sowal sa ci Yis, <<Satanaw, piliyas Takowanan. <Nawhani pita'ong to Tapang a Kawas iso. Kai Cingraan a ccay a mitoor kiso,> saan ko sowal a matilid i Fangcalay Cudad,>> han Ningra.

11Saka, liyas sato koya Palafoay ci Yisan. Raod sato ko coyocoyoh a mihamham i Cingraan.

O Pisatapang ni Yis a Patnak i Kalili

(Maroko 1.14-15; Luka 4.14-15)

12Matngil ni Yis ko nika rofo ni Yohani i, liyas sato Cingra a tayra i Kalili. 13Caay ka i Nacali Cingra a maro', tayra i Kapirnaum. O i ngataay no fanaw no Kalili a pala no Cipulun ato Naftali. 14Onini i, o nika lahci no nisowalan ni Isaya o pali'ayaway to sowal no Kawas toya,

15<<Kamo o Cipulun ato Naftali a pala,

o pasayraay i riyar a pala,

o itira:way no Yortan a 'alo,

o kamaro'an no roma a finacadan, o Kalili.

16O maro'ay i to'manay a finawlan i,

paka'arawto to tadamaanay a likat.

O maro'ay i lidong no patay a tamdamdaw i,

mapa'dilto cangra,>> sanay.

17Nanitiya a misatapang ci Yis a patnak, sowal sa, <<Pipasasiyor to faloco' kamo, nawhani mangatato a talahkal ko Kitakit no Kawas!>> han Ningra.

O Pitahidang ni Yis to Saspatay a Mifotingay

(Maroko 1.16-20; Luka 5.1-11)

18Yo romakat ci Yis i lilis no fanaw no Kalili i, ma'araw Ningra ko nipitafokod no tatosaay a malikaka, ci Pitiro hananay a Simon ato safa ningra ci Antiri. O mifotingay cangra. 19Pasowal han ni Yis cangra, <<Katayni. Pitoor i Takowanan. Ta papisa'opoen Ako kamo to tamdaw a matiya o pifoting namo,>> han Ningra. 20Tangsol sa cangra a misawad to tafokod nangra a mitoor i ci Yisan.

21Tala'ayaw ci Yis to mamang i, ma'araw Ningra ko roma a malikakaay a tatosa, o wawa ni Cipitay ci Yakop aci Yohani. Pacafay cangra to mama nangra a misolimet to salil i tamina. Tahidang han ni Yis cangra i, 22tangsol sa cangra a miliyas to tamina ato mama nangra a mitoor i ci Yisan.

O Pipasifana' ato Piadah ni Yis

(Luka 6.17-19)

23Rakaten ni Yis ko Kalili a pala a ma^min, pasifana' i kasa'opoan a loma' i kasaniyaro' a patnak to Nga'ayay Ratoh to pakayniay i Kitakit no Kawas, adahen Ningra ko masamaamaanay a adada no tamdaw. 24Matnak i polong no kitakit no Siriya konini a lihaf to pakayniay ci Yisan. Saka, patayraen no tamdamdaw i ci Yisan ko polong no adadaay, o misemsemay to masamaamaanay a adada ato maaro'ay no palafoay ato mafori'akay ato ma'piay a tamdaw. Adahen ni Yis cangra a ma^min. 25Saka, mitoor ci Yisan ko nai Kaliliay, nai Tikapolisay#4.25 Tikapolisay -- Mo^tepay a Niyaro' o sanay no Krisiya., nai Yirusalimay, nai Yutayaay ato itira:way no Yortan a 'alo a 'alomanay a finawlan.

Currently Selected:

Matay 4: AMIS2019

Highlight

Copy