Matay 18

Cima ko Satadamaanay?

(Maroko 9.33-37; Luka 9.46-48)

1Itiya i, tayra i ci Yisan ko nisawawaan a milicay, <<Cima hakiya ko satadamaanay i tini i Kitakit no Kawas?>> han nangra.

2Saka, tahidang han ni Yis ko ccay a ka^mangay a wawa a patireng i ka'ayaw nangra. 3Sowal sa Cingra, <<So'linen Ako a somowal kamo, ano caay pifalic kamo to faloco' a pasasiyor a matiya o ka^mangay a wawa i, caay ko mamicomod kamo i Kitakit no Kawas. 4O misapo^neray to faloco' a matiya onini a wawa ko satadamaanay i Kitakit no Kawas. 5O romasato, ano saki Takowanan ko nipihamham no nima to ccay no hatiniay a ka^mangay a wawa i, o mihamhamay ito cangra i Takowanan.

Aka Pisawi to Tamdaw a Pakaciraraw

(Maroko 9.42-48; Luka 17.1-2)

6<<Ano cima ko misawiay to ccay nonini a sasafaay a miti'eray i Takowanan a paliyas i, o nika piso'ot to li'el ningra to tata'angay a fokloh a tailangan a mafahkol i talolongay a riyar a mi'akok#18.6 mi'akok -- o no Fata'an a sowal. O roma i, ma'alol. a mapatay ko nga'ay. 7Tada o kasomadan! Ira ko pakapapiliyasay i Takowanan tonini a hkal a dmak. O airaira aca ko matiniay a dmak, nikawrira, o cacilafo koya paci^ci sanay a misawi a tamdaw!

8<<Ano sakaciraraw iso ko ccay a kamay, ano ^ca i, o ccay a wa'ay#18.8 wa'ay -- o roma i, oo' (katimol). iso i, ktonen a mifalah. O nika poton no ccay a kamay ato ccay a wa'ay iso a micomod i mida'ocay a 'orip ko nga'ay to nika tosa no kamay ato wa'ay iso a mafahkol i mida'ocay a namal. 9Ano sakaciraraw iso ko ccay a mata iso i, dicohen a mifalah. O nika ccay no mata iso a micomod i mida'ocay a 'orip ko nga'ay to nika tosa no mata iso a mafahkol i pisemseman a namal.

O Tinako to Masidayay a Siri

(Luka 15.3-7)

10<<Pina'on kamo, aka pi^pec kamo to ccaccay aca nonini a sasafaay a tamdaw. Nawhani sowalen Ako kamo, o misimaway cangraan a coyoh i kakarayan i, mararid a ira i tatihi no Wama Ako i kakarayan.#18.10 Ira ko katlangay a cudad matongal i 11 a tosir O sakatayni Ako i, o sapa'oripaw Ako to moraraway a tamdaw (tiri'en i Luka 19.10).

12<<Ano ira ko cisiriay to smo'otay i, ano masiday ko ccay nonini, caay hakiya ka siday han ningra itira i kasadafdaf no lotok koya siwa a polo' ira ko siwa a siri, ta tayra a mikilim toya ccay a masidayay#18.12 masidayay -- o sowal no pasawali i, o maraferay, o sowal no ka'amis i, o mangaferay. a siri? Masamaan ko harateng namo? 13So'linen Ako a somowal kamo, ano makilimto ningra konini a masidayay a siri i, ikaka no lipahak ningra a miharateng toya siwa a polo' ira ko siwa a caay ka masidayay a siri ko nika lipahak ningra! 14Malcad tonini, caay ko nafaloco'an no Wama namo#18.14 Wama namo o roma a tilid i katlangay a cudad i, Wama Ako. i kakarayan ko nika tkop no ccaccay aca nonini a sasafaay a tamdaw.

O Saki Ciraraway a Salikaka

15<<Ano misatatiih ko salikaka iso i tisowanan i#18.15 Ano misatatiih ko salikaka iso i tisowanan i -- ira i katlangay a cudad a matilid Ano ci raraw ko salikaka iso., katayra kiso i cingraan. Ta yo tatosa kamo i, itiya a somowal kiso to patlac ningra. Ano mitngil cingra to sowal iso i, o sakanga'ay namo a tatosa konini. 16Nikawrira, ano caay pitngil cingra i, kalahaklong to ccay ano ^ca i, tatosa a tamdaw a tayra i cingraan. Ta ira ko tatosa tatolo a tamdaw to papawacay a pahapinang to so'linay a dmak. 17Ano caay pitngil cingra to sowal nangra i, pasowalen ko kiwkay. Ano caay pitngil cingra to sowal no kiwkay i, samatiya han o mafokilay to Kawas ato milisataay ko piharateng cingraan.

O Pi'met ato Pihayda

18<<Orasaka, so'linen Ako a somowal kamo, o ni'metan namo i hkal i, o mama'metto i kakarayan. O nihaydaan namo i hkal i, o mamahaydato i kakarayan.

19<<O romasato, so'linen Ako a pasowal kamo, ano malaccay ko faloco' no tatosa namo i tini i hkal a mitolon to maan a dmak i, caay ka ^ca palahcien no Wama Ako i kakarayan ko nilongocan namo. 20Ano pakayni i pitoor namo Takowanan ko sakasa'opo no tatosa tatolo a tamdaw i cowacowa i, ira Kako a mikapot itira,>> han ni Yis.

O Tinako to Caay Pisolol to Tadah a Koli

21Itiya i, raod saan ci Pitiro i ci Yisan a milicay, <<Tapangaw, ano ciraraw ko salikaka ako i takowanan i, kinapina kako a misolol to raraw ningra? Kinapito haw?>> han ningra.

22Paca'of sa ci Yis, <<Kinapito, caay ka saan kako. Oya pito i, kinapitoen a polo'#18.22 Oya pito i, kinapitoen a polo' -- ano ^ca i, pito a polo' ira ko pito.. 23Nawhani o Kitakit no Kawas i, matiya o kongko#18.23 kongko -- o no Payrang a sowal, o tatodong i, o pitadtad to dmak. to dmak no hongti a misa'osi to nitayalan no koli ningra. 24Yo misatapang a misa'osi ko hongti i, mapatayra i cingraan ko ccay a koli to citadahay to ccay 'ofad (10,000) a talanto#18.24 talanto -- o no Krisiya a sowal konini, o ccay a talanto i, o ccay a patekan no ^kim. O roma a tatodong nonini i o taneng. i cingraan o hongti. 25Caay pakapatiko cingra toya tadah saka, palimo'oten no hongti ko tamdaw a papipacakay cingraan, halofafahi ato wawa ato polong no dafong ningra to sapatiko to tadah ningra. 26Saka, pitosor sa i ka'ayaw no hongti cingra a mingitangit, <Nayarenho ko romi'ad. Ta mapatiko ako a ma^min,> han ningra. 27Saka, sasini'ada sa ko hongti toya koli. Saka, solol han ningra cingra a mipalasawad toya tadah ningra.

28<<Nikawrira, sadak sa konini a koli i, malitmoh ningra ko ccay a kapot ningra. O citadahay cingraan to smo'ot a tinali#18.28 tinali -- o no Krisiya a sowal, o ccay a tinali i, o lifon no matayalay to ccay a romi'ad. konini a tamdaw. Rpet han ningra konini a tamdaw a mi'mec ko li'el ningra. <Patikoento i takowanan ko tadah iso,> han ningra. 29Hinokop sa koya kapot ningra a mingitangit, <Nayarenho ko romi'ad. Ta mapatiko ako a ma^min,> han ningra. 30Nikawrira, caay pihai cingra. Saka, mapatorod koya kapot i pirofoan tangasa i pipatikoan ningra toya tadah. 31Yo ma'araw no romaroma a kapot ningra konini a dmak i, rarom sa cangra. Saka, tayra sato cangra i hongti a pakafana' to nano dmak ningra a ma^min. 32Orasaka, tahidang han no hongti koya koli a somowal, <O tadatatiihay a koli kiso. Mingitangit kiso i takowanan saka, palasawad han ako koya tadah iso a ma^min kyami? 33Hatira ko sini'ada ako tisowanan i, caay ko hahaenen iso a sini'ada ko kapot iso saw?> han ningra. 34Mahaen ko nika kter no hongti saka, patorod hanto ningra i mirofoay a tamdaw koya koli tangasa i pipatikoan ningra toya tadah a ma^min.>>

35<<Orasaka, ano caay ko nai faloco'ay namo o kahaccaccay ko nipihpol namo to raraw no salikaka i, o hahaenen no Wama Ako i kakarayan kamo,>> han ni Yis.

Currently Selected:

Matay 18: AMIS2019

Highlight

Copy