Dmak 17

O Rawraw no Finawlan i Tisalonika

1Nanoya, pakayra ca Pawlo aci Silas i Amfipolis ato Apoloniya a tayra i Tisalonika. Ira itira ko kasa'opoan a loma' no Yutaya a tamdaw. 2O pinangan ni Pawlo a micomod i kasa'opoan a loma'. Tolo a pasla'an cingra itira a malaliyaliyang ato cangra to pakayniay i Fangcalay Cudad. 3Sahcien ningra a pasowal cangra, <<Caay ka ^ca o mamisemsem ci Kristo, ta o lalomowad Cingra a ma'orip nai patay saan. Onini a niparatohan ako i tamowanan a tamdaw ci Yis i, o Kristo,>> han ningra a mipahapinang a pasowal. 4Ira ko papinapina a mala paso'linayto a tamdaw, ta malakapotto na Pawlo aci Silas cangra. O romasato, 'aloman ko mikitiraay ca Pawloan aci Silasan a mita'ongay to Kawas a Krisiya a tamdaw ato tadamaanay a fafahiyan.

5Nikawrira, ma'inap ko Yutaya a tamdaw. Saka, sa'opoen nangra ko papinapina a awaay ko ^poc a tatiihay a tamdaw a papipalowad to faloco' no finawlan a mirawraw to niyaro'. Likoten nangra ko loma' ni Yason a papipasadak ci Pawloan aci Silasan i ka'ayaw no finawlan. 6Caay ka tama nangra saka, kidkid han nangra ci Yason ato papinapina a salikaka a patayra i kakitaan no niyaro'. Cli' sa a somowal, <<Ira a tayni i tini ko parawraway to polong no kitakit a tamdaw. 7Hamhamen ni Yason cangra a papilafin i loma' ningra. O sowal nangra i, <Ira ci Yis hananay a roma a hongti,> saan cangra a ma^min a miliyang to limo'ot no hongti no Loma,>> han nangra a mipakokot. 8Mitngil tonini ko finawlan ato kakitaan no niyaro' i, satatiih sa ko faloco' nangra. 9Itiyasato, paci^ci han no kakitaan a miala ci Yasonan ato romaroma a salikaka ko tatodong no sakanga'ay nangra a masadak. Ta tdal hanto cangra.

O Pipatnak i Piriya

10Dadaya sato i, tangsol han no salikaka a patayra i Piriya ca Pawlo aci Silas. Tahira koya tatosaay i, tayra i kasa'opoan a loma' no Yutaya a tamdaw. 11O i tiraay a Yutaya a tamdaw i, ikaka no i Tisalonikaay a tamdaw ko nika nga'ay no faloco' nangra. Tadamalalok cangra a mitngil to sowal no Kawas. So'linay hakini caay hakini saan cangra a mitiri' to Fangcalay Cudad to romi'ami'ad. 12Saka, 'aloman ko paso'linay nangra. 'Aloman ko paso'linay a Krisiya a fa'inayan ato tadamaanay a fafahiyan. 13Nikawrira, mafana' ko i Tisalonikaay a Yutaya a tamdaw to nipipatnak na Pawlo to sowal no Kawas i Piriya saka, tayra cangra a paoror to finawlan a palowad to rawraw. 14Saka, tangsol han no salikaka ci Pawlo a patayra i lawac no riyar. Nikawrira, itira saho i Piriya ca Silas aci Timoti. 15Patangasaen no mikriday ci Pawlo i Atin. Ta patolon hanto ni Pawlo cangra to sakakalamkamaw na Silas aci Timoti a tayni. Ta nokay sato cangra.

O Pipatnak i Atin

16Yo mitala ci Pawlo ci Silasan aci Timotian i Atin i, ma'araw ningra ko nika adihay no samiyay toya niyaro'. Saka, mararom ko faloco' ningra. 17Orasaka, malaliyaliyang ci Pawlo ato Yutaya a tamdaw ato mita'ongay to Kawas a roma a finacadan itira i kasa'opoan a loma' no Yutaya a tamdaw. O romasato, malaliyaliyang cingra ato malitmohay ningra a tamdaw to romi'ami'ad i pisalamaan no niyaro'. 18O romasato, malaliyaliyang ci Pawlo ato papinapina a citangalay a misaIpikorinay ato misaStoikay ko pakayraan a singsi. Sowal sa ko romaroma nangra, <<O maan ko sasowalen nonini a nimalaymayan saw?>> saan.

O sowal no roma a tamdaw i, <<Latek o patnakay cingra to pakayniay i kawakawas no roma a kitakit,>> saan. Nawhani ci Yis ato nika lomowad ni Yis a ma'orip nai patay a sowal ko nipatnakan ni Pawlo. 19Saka, krid hanto nangra ci Pawlo a tayra i Ariopakus hananay a pilaocan. Sowal sa, <<Ano o maan kora fa^lohay a nisowalan iso a pasifana' i, mamaan pasifana'en kami? 20Nawhani o kafahka'an a mitngil kora nisowalan iso. Saka, mangalay kami a mafana' to tatodong nonini a dmak,>> han nangra. 21(O Atin a tamdaw a ma^min ato maro'ay itira a roma a kitakit a tamdaw i, maolah a masaromi'ad a misacaciyaw a misatngitngil to maan a fa^lohay a dmak.)

22Saka, tireng sato ci Pawlo i Ariopakus i ka'ayaw no pilaocan a somowal, <<Kamo o Atin a tamdamdaw, ano nengnengen ako kamo i masamaamaanay a dmak i, tada o malalokay kamo to saki no kawasan. 23O sakasaan ako i, yo romakat kako i lalan a minengneng to pita'ongan namo a ma^min i, ma'araw ako ko ccay a pipacakatan. Ira a matilid ko <mipacakat i kafokilan a kawas> sanay. Orasaka, pasifana'en ako kamo i matini tora kafokilan namo a nita'ongan a kawas. 24O misanga'ay a Kawas Cingra tonini a hkal ato polong no i laloma'ay nonini a maamaan. O Tapang no kakarayan ato sra Cingra. Orasaka, caay ka maro' Cingra i nisanga'an no tamdaw a Fangcalay Pita'ongan. 25O romasato, caay ka matiya o cango'otay to maan Cingra a milongoc to nika tayal no tamdaw i Cingraan. Nawhani Cingra ko pafliay to 'orip ato sasla'an ato kalomaamaan i polong no tamdamdaw. 26Pakaynien Ningra i ccay a tamdaw ko nipisanga' to polong no kasafinacadacadan no tamdaw, ta mapaliwasak a pakamaro' i polong no hkal cangra, sanga'en Ningra ko kasapokopokoh#17.26 kasapokopokoh -- o roma i, kasapongopongo (ka'amis). no mihcaan ato kalangangangangan no kamaro'an no tamdaw a pahapinang. 27O sakapihaen Ningra i, nga'ay mikilim ko tamdaw Cingraan o Kawas. Ta latek matama nangra Cingra o sanay Ningra. So'linay caay piraay ko Kawas i titaanan o kahaccaccay. 28Nawhani

Mato 'olic no ma'olicay a tamdaw namo. Sowal sa,

<O wawa Ningra kita,> saan.

29So'linay o wawa no Kawas kita. Saka, matiya o nisanga'an no tamdaw to tada^kim ato ^kim ato fokloh a samiyay ko pinangan no Kawas, aka ka saan ko piharateng ita. 30To ha:tiniay i, satalifokil han no Kawas ko ka ^caho ka fana' no tamdaw. Nikawrira, anini sa i, papipasasiyoren Ningra ko faloco' no polong no i cowacowaay a tamdaw. 31Nawhani maktonto no Kawas ko pisawkitan a romi'ad. Mapili'to no Kawas ko ccay a tamdaw to mamisawkit to tamdamdaw i tini i hkal. O mamo^cel ko pisawkit Ningra. Pakaynien no Kawas i nipipalowad a pa'orip toya tamdaw nai patay ko nipipahapinang Ningra i tamdamdaw tonini a dmak,>> han ningra.

32Mitngil to pakayniay i nika lomowad no tamdaw a ma'orip nai patay a dmak i, katawaen no romaroma a tamdaw ci Pawlo. Sowal sa ko romaroma a tamdaw, <<Ano hacowaay, miliyawho kita a mitngil tonini,>> saan. 33Saka, liyas sato ci Pawlo to pilaocan. 34Ira itiya ko papinapina a tamdaw a mitoor ci Pawloan. Paso'lin cangra ci Yisan. Onini i, ci Tionisius aci Tamaris hananay a fafahiyan ato romaroma a tamdaw no lomaocay.

Currently Selected:

Dmak 17: AMIS2019

Highlight

Copy