1 Tisalonika 1

1Ci Pawlo kako, patilid kako aci Silas aci Timoti i tamowanan o i Tisalonikaay a kiwkay, o no Wama a Kawas ato Tapang ci Yis Kristo a mitooray a salikaka.

Nanay, malayap namo ko mikomi ato rihaday!

O 'Orip ato Piti'er no i Tisalonikaay

2Yo mitolon kami, maharateng niyam kamo, mararid kami a mikansiya i Kawas to saki tamowanan a mapolong, 3nawhani maharateng niyam i ka'ayaw no Wama a Kawas ita ko pipatalahkal namo i dmak to piti'er namo i Kawas ato nika roray namo a matayal to nano olah namo ato nika tanektek no kacifaloco'an namo to Tapang ci Yis Kristoan. 4Kaolahan no Kawas a salikaka, mafana' kami to nika o nipili'an no Kawas a tamdaw kamo. 5Nawhani o nipipatnak niyam i tamowanan to Nga'ayay Ratoh i, caay ko sowal a ccay. O nano 'icel niyam ato nano tayal no Fangcalay 'Adingo ato ci'icelay a pipaso'lin niyam konini. Mafana' kamo to nika masamaan ko dmak niyam yo itira kami i tamowanan. O sakaci^poc namo ko tayal niyam a ma^min. 6Talacowa tata'ang ko pades namo, nikawrira, mapalipahak no Fangcalay 'Adingo kamo a milayap to sowal. Mitodong kamo i tamiyanan. Mitodong kamo to Tapang. 7Orasaka, malapi'arawanto no i Makitoniyaay ato i Akayaay a polong no paso'linay ci Kristoan kamo. 8O pipalosiyang namo to sowal to pakayniay i Tapang i, caay ka i Makitoniya ato Akaya a ccay. Malosiyang i cowacowa ko pakayniay i piti'er namo i Kawas. Saka, o maanho ko sasowalen niyam? 9Nawhani cangra o nipalosiyangan namo ko paratohay to nika masamaan ko pihamham namo to piliso' niyam i tamowanan ato nika masamaan ko piliyas namo to samiyay, pasasiyor a pasayra i so'linay a ma'oripay a Kawas a mita'ong a matayal. 10O romasato, paratoh cangra to nika halamham namo a mitala to sakatayniaw no Wawa no Kawas ci Yis nai kakarayan. O nipalowadan no Kawas ci Yis a pa'orip nai patay. Cingra ko papa'orip i titaanan a paliyas to kter no Kawas.

Currently Selected:

1 Tisalonika 1: AMIS2019

Highlight

Copy