Matthaiga 23
23
1Egi Jesus worohanka egi hironag warnira wokit’ena,
2Wena: Wowagaxhiperesra egi Pharisera Mosesga waminag harnira haminaganankshana,
3Esge higu jagu unishirawigi she‐e uwianje, eshi wore warninera inke wiraruxe uwinianje, airanaga egi inke uninankshana.
4Wak’in sgingrexji hiuinarnaga egi k’ira wojexi hirena egi wankshigra k’in‐wagiginankshana, eshi exji nabwaisa warninera hinkisha hija hiuninankshana.
5Eshi worera jranaga unagra wankshigra hajairekjawi wagiunankshana, Seniba wowagaxra paras wakaraginankshana egi waini warninera ugra hiraijera xete wawajenankshana.
6Egi worujeja waminag‐hohankshi haminagra giphinankshana, egi wohokhu‐hojhieja waminag joweja here haminag giphinankshana.
7Egi nagueja hikaragirera egi wankshigra Rabbi, Rabbi higairawira giphinankshana.
8Egi inke Rabbi higaire khiwinianje, hisha Hirukana hashiniwira, Kristus herena egi harnaj rakhikhinub‐wina.
9Egi managre‐egi hinkisha hianjhi gikaraj‐winianje, hisha hianjrawira E wangregi‐nankshana.
10Egi inke shige hirukanara higaire khiwinianje, hisha hirukana hashiniwira, Kristus herena.
11Eshi hajanga nixetekjawigi horograwiregi ware hashinikjawina.
12Egi higu peshe hankshi khikeregi khushi kererekjanena, egi hisha khushi khikeregi hankshi kererekjanena.
13Eshi harawekjanihawina wowagax‐hiperesra egi Pharisera, hipokrit raniwina. Wankshinagre hungma wangregi herera wornaragissawina, ne inke hijora‐kawawini‐anaga egi shige jarnaga hijokewe‐naiankhi inke waragish’uwinina.
14Harawekjanihawina wowagax‐hiperesra egi Pharisera, hipokrit raniwina, hikhanagitera jhi wojhirera jebwaragigiwige egi gikaraj serej unakhiwinge, esge hawera hiraijera xete shuruiskjanihawina.
15Harawekjanihawina wowagax‐hiperesra egi Pharisera, hipokrit raniwina, tejana washurujawianaga egi mara hosh’uwianaga proselitra hisha shunana‐shiwina egi jaja hisha shesga jijega, e nupaha hiraijera pejshishigra ninkjang harni wash’uwina ne hoshurujiswina.
16Harawekjanihawina hishjarning wajogini raniwina, e wairena higu peshe wohokhu‐hojhixetera raxjashgunigi, inke washa ninana, eshi higu peshe wohokhu‐hojhixetera shurasi hiunaka raxjashgunegi washa woishana uwaunana.
17Warnai worniwankwina egi hishjarning raniwira, hajanga hiraijera xetewishe, shurasira nigeshge wohokhuhojhixetera e shurasinaka wakanjankhirena.
18Egi washawina higu peshe Altarra raxjashgunigi inke washa ninana, eshi higu peshe nab‐hiruxajra hijarnankhi raxjashgunigi, washa woishana uwaunana.
19Warnai worniwankwina, egi hishjarning raniwira, hajanga hiraijera xetewishe, nab‐hiruxajra nigeshge Altarra, e nab‐hiruxajra wakanjankhirena.
20Esge higu peshe Altarra raxjashgunigi, Altar hiungi egi washara jarnaga hijakhi wagarnana.
21Egi higu peshe wohokhu‐hojhixetera raxjashgunigi, wohokhuhojhixetera hiungi egi Hisha hija‐jhinakhi wagarnana.
22Egi hisha wangregiagre raxjashgunigi, Maura hungwaminag harnira raxjashguni hiungi egi Hisha hijaminagnanka wagarnana.
23Harawekjanihawina wowagax‐hiperesra egi Pharisera hipokrit raniwira, mintra egi anisra egi kumminra hikerepanaishara woragawina, egi woehieja washa rokana hirera warat’ambwina de‐e hererena hophira egi najwojana egi harnaxgura, washa de‐e wawau phi‐raniwingaja egi washinjahinanka hirassa wauphiraniwingaja.
24Hishjarning wajogini raniwina, ne raxoj suwura washuwusebwina egi washa huxashogra warnanahiwina.
25Harawekjanihawina wowagax‐hiperesra egi Pharisera, hipokrit raniwira, niwirajga hihagra egi wasge hihagra sge‐warawina eshi rogra washa manuinera egi waruj‐inera hoixjinakshana.
26Pharise hishjaning ranira, jorni niwirajga rogra egi wasge rogra sge‐hire, egi hihagnanka hishge sge‐hiranana.
27Harawekjanihawina wowagax‐hiperesra egi Pharisera hipokrit raniwira, wanaxi‐hoshu sga‐hire hirakisgawina, e hihagra hajara phixji hirarnaga eshi rogra wankshig husheregra hoixjinankshana egi washa shishigra harnaj.
28Hishge shenisge harajena, wankshignanka phi hihagra harnija‐nangwina, eshi rogra hipokritra hornixjiwina egi wigishanara.
29Harawekjenena wowagax‐hiperesra egi Pharisera hipokrit raniwira, prophetra wanaxi homig waragish’uwina egi wangphira wanaxi‐homigeja ini waragikerewina waphi‐shuxjiwianaga,
30Egi washawinana: Hianjwahawira hamb warnineja harnihawigi inke prophetra wai warninera xu‐wahiregi wakishu hauwininana.
31Esge ne horakikarag harajena prophetra d’ewahi hiranihera ninkjang warninera neninewira.
32Hianjwarawiga wigus harninera hoixjihiwire.
33Wakha raniwira wakha hi‐pahi wankshighii raniwira, jasgerawianaga pej‐shishig haweja rakishib‐janihawishe?
34Esge horuxujwire, prophetra egi wang‐wanaiksabra egi wowagax‐hiperesra huwanigigi‐kjanihawina, egi hota d’ewarawianaga egi nanamiheja waraisaraijanihawina egi hota wohokhuhojhi washiniwieja washa pahi wawiraipsinsh‐janihawina egi jhinagra hirakhiware wawiraishana nanash’inkjanihawina.
35Esge ne harnirus‐janihawina jarnaga wai phira manegi xuhiregi, Abel phi wai harnira epa Baraxias hinigra Saxarias wai harnieja hipa, e wohokhu‐hojhixete egi Altar hojakenainja d’erawina.
36Hisgexjina hinigawina washa de‐e harnaj wankshighoi degi hirawairekjanena.
37Jerusalemra, Jerusalemra, prophetra d’ewarana, egi ini wawiraisagshana e jiwanigigirera, hoja jarnaha ninkjang washinira sto‐wanigigiguni, bagawaxge hinugra ninginig warnira ahukhuha wakshui‐reshunura shesge wagiginaira egi inke sh’uwinina.
38Horuxujwire, jhi‐washiniwira manra wornigigirawina.
39Hinigawina howarehikjanare inke hinshjarnikjanihawina, wogishawajena Hirukanara rash harnira hiunjina hishawigi epa.
Currently Selected:
Matthaiga 23: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
