Matthaiga 14
14
1Shejanagaja Herodes tetrarxra Jesus hornaxguna.
2Egi ware warninera wawagena: De‐e John Niwawaxunga herena, e d’arnagra eja kikawa‐a kirina, esge wore rokanaxji unjena.
3Herodes Johnga harukossana egi rusgijanaga egi jhihornassena, Herodias wauna e Herodes khinubra Philip hijawina herena.
4Johnga Herodes wagege: Woehieja roxiagshana rakhinubra hijawina rakanagra.
5Egi d’ehina‐nunige, eshi worohanka wanakewena, prophet‐hisha hereshe higirananke esge.
6Egi jaja Herodes hamb‐hojuinera hiragigi worujxete uinena, Herodias hinugra wa’shina jowehireja, egi Herodes giphina.
7Esge wihohianaga washa hokunkje mangirajshana higu‐jagura gitagi.
8Egi hinugjega, jorni hiunira gigus‐shana, wena: John Niwawaxunga nasura egi hingarnijire wasge hokanag.
9Egi hungnaka najgerategshana, eshi wihohiga hawau, egi jarnaga waruj wakishu minagka hawau, uwashina hinugjega hokuinekjege.
10Egi rewagigina, egi Johnga jhi‐wornasse hojhiejanagra para giwaxhirena.
11Egi nassu harnira wasge‐hokanag harniakirirena, egi hinugjega hokuinena, egi hinugjega hiunira hagarnigina.
12Egi wironag warnira hajirena egi rora rus‐hiranaga egi xairena, egi harairanaga egi Jesus hogiraghirena.
13Egi jaja Jesus naxgungi, wajowe mojainainja inekhi howarena. Egi jaja wankshigra she‐e naxguinegi, jhinageja herera mowe hironag harairena.
14Egi Jesus hihinabshana egi worohaxji hajarna egi naj‐wawogijana, egi howasha warninera rushjawahina.
15Egi jaja hoxjarnegi, wironag warnira hiragirena, wairena: De‐e mojaina heregaja egi hahe hikorohorna, worohangre kerewagigire, e jhinageja hagiranaga egi waruj kiruwihirekjena.
16Eshi Jesus wawagena: Inke nige‐howakarairanikjena, waruj wogawire.
17Egi wagairena: waisgab‐horok’ina saja harniajawina egi hora nupiwi,
18Egi wena: Waiganihuwire.
19Egi worohanka xawijojaija minag‐washina egi waisgab‐horok’i sajanka warussana, egi ho nuphahanka, egi wangregi horuxujshana, wa’inabshana, egi warujhe‐anaga egi wironag warnira horok’inanka wawogarna, egi wironagra worohanka eja wawogairena.
20Egi harnaj waruj‐hirena egi wainaj‐hirena, egi hoxjug hotawahirega warus‐hiregi napana kerepanaishanaga‐nup‐hashana hoixjina.
21Egi waruj‐hirega ejaxji wangra hogihixete‐sajanguni hinugra egi ninkjangnigra inke hirassa waikarabnina.
22Egi higuana Jesus wironag warnira wajeja hominag wa’shina, egi ageja joweja howakere wa’shina, worohanka kerewagigijanegi.
23Egi jaja worohanka kerewagigigi xe‐xeteisha eja hotina inekhi gikaraj. Egi jaja hoxjarnagi eja inekhi unjena.
24Eshi wajra shejananegi te‐najeja u‐ankshana, jhashja hirawanankshana, mahaxji uanke.
25Egi haheregi wirakara hijobeja, Jesus eowakerena, teja hihagra hamani.
26Egi jaja wironagnanka hajairegi teja hihageja maniankhi naxirairena, wairena: Naxirag hisha herena, egi uwainena naxirairege.
27Egi higuana Jesus wawokit’ena, wena: Wanaishguni uwine, newinena inke naxirawinine.
28Egi Peter horniharna egi wena: Hirukanara neninegi, uishire nieja hiranihikjena.
29Egi wena: Hure. Egi jaja Peter wajeja dampgi, nira hamanina, Jesus eowarena.
30Eshi jaja maintajehi xeteisha hu hajagi, naxirena, egi sawararena, uwana, wena: Hirukanara; niambwine.
31Egi higuana Jesus ara wajigre‐hianaga egi harukosshana, egi wagena: Harnaxgu xununig ranigaja, jagu‐u khibarashe.
32Egi jaja wajeja hoikawairegi maintajehira rushjana.
33Egi jarnaga waj‐ejaka hajiranaga egi gikaraj‐hirena, wairena: Hisgexjingaja Maura Hinigra ninegaja.
34Egi jaja harujairegi, Genesareth mainja hahirena.
35Egi jaja wankshig ma‐eja herera higiregi, ma‐hogigixanka worag‐howarehirena, egi jarnaga howasharakhi wagarni‐hajirena.
36Egi gitairena wai‐ug harnira eshana higikioirekjege, egi jarnaga hikiogi rushjaxji hirena.
Currently Selected:
Matthaiga 14: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
