rumiya 2

asa 2

liju lɩki dino

1na ŋiro dino ŋa gwate gwəṯi ŋuɽuna ŋədi, ŋa gwiji gwun gwakɩmi gworo gwun gwiro kaja no. gi gwune ḏa ŋamaṯakɩmi gwun gwiro kaja ŋa gwakɩmi gwula gwuŋa dino, gi gwune ŋa gwun gwaṯakɩmiḏa ŋaṯalduji ŋeno dino. 2na liŋə lilɩŋiḏi nilarno ḏakɩmiḏa ḏeḏi elo ḏiro gwerkwe gi liji lun ŋaṯɩliduji ŋiro gi gworo kweno. 3na ŋa gwaṯuməḏɩni naŋarno, ŋa gwiji kwe gwun gwaṯakɩmi liji lun ŋaṯɩliduji ŋeno namɩni ŋaṯalduji, naŋarno ŋa gwar gwubɩḏɩni gi ḏakɩmiḏa ḏeḏi elo a? 4i ŋa gwaṯabɩlaṯe ḏɩbona ḏe ḏiŋiriḏa ḏuŋun na ḏɩməṯo ḏugwore ḏuŋun gɩtten, na ŋa gwate gwilɩŋiḏi naŋarno ḏiŋiriḏa ḏeḏi elo ḏigwuloḏeṯaŋa gi ḏuwɩrla ga ŋuɽun ŋun ŋɩki na? 5namɩni ŋuɽun ŋe ŋeḏi ḏugwor ḏuŋa ḏun ḏibɩɽe na ḏun ḏate duwɩrlo ga ŋuɽun ŋun ŋɩki no, ŋaṯawəɽeice ḏɩɽeḏa ganu ldu kwulo gwuŋa gi lamon le ḏɩɽeḏa ganu na ḏəŋinio ḏe ḏakɩmiḏa ḏeḏi elo ḏun ḏiḏuḏɩnu ga, 6gwun gwar ŋwulḏəḏə liji gwete gwete gwan ŋɩru ŋuŋun. 7lulḏəḏə ḏɩmiḏa gi gɩḏilio gi liji lun lajaḏaṯa gi ḏapa ŋɩru ŋiŋir laṯɩbunyi ḏɩbuḏia na ḏinəjio na ḏɩmiḏa ḏun ḏate ḏaṯai no. 8namɩni elo gwəḏəḏə liji ḏɩɽeḏa ganu lun laṯɩgwujane ŋuɽuna ŋeḏi ŋadɩgɩɽe ŋagin, na late ləṯeijo ŋuɽuna nəni ŋun ŋiro gwerkwe no nalɩmɩni gwujane ŋun ŋɩki, 9na ḏiḏɩmiḏɩno na ḏɩḏia ŋaro gworki gi liji wei gwete gwete lun laṯapa ŋuɽuna ŋun ŋɩki, gi liju gwerre na dino liji lun liro ga dino. 10namɩni ḏɩbuḏia na ḏɩnəjio na ḏouwɩɽiḏa ŋaro gi liji wei gwete gwete lun laṯɩduji ŋuɽuna ŋiŋir, gi liju gwerre na dino liji lun liro ga dino. 11gi gwune elo gwate gwəmɩnyeno gwiji gwete kworo no.

12gi gwune liji wei lun lɩmape ŋuɽuna ŋun ŋɩki late ləṯi ŋuɽuna ŋun ŋigelijɩlo elo musaŋ no nalai dino late ləṯi ŋuɽuna ŋeno no, na liji wei lun lɩmape ŋuɽuna ŋɩki ləṯi ŋuɽuna ŋun ŋigelijɩlo elo musaŋ na gwakɩmini ŋuɽun ŋe ŋeno. 13gi gwune liji lədu lun laṯɩdiŋɩni ŋuɽuna ŋun ŋigelijɩlo elo musaŋ lun laṯɩdujini liŋir gi jei ganu jeḏi elo no, namɩni liro lun ŋaṯɩliduji lun ladujini liŋir. 14na ḏa liji lun liro ga dino lun late lɩməṯi ŋuɽuna ŋun ŋigelijɩlo elo musaŋ no naṯɩlduji ŋuɽuna ŋiro gi gworo gwun gwugelijɩlo elo musaŋ kaja gagin, na leno late ləṯi ŋuɽuna ŋun ŋigelijɩlo elo musaŋ no nalmɩni ro ŋuɽuna gi gworo kweno gweḏi lulo lagin, 15gi gwune laṯaŋiḏi ŋɩru ŋeḏi ŋuɽun ŋun ŋigelijɩlo elo musaŋ ŋulinu gi dugwor ganu dagin, na dugwor dagin daṯɩteje ga dino, na ŋadɩgɩɽe ŋagin kaja kono ŋaṯɩliŋicɩgi i ŋaṯɩlɩŋidu, 16gi lamon lun laje lali elo akɩmiḏe ŋuɽun ŋun ŋɩlɩbo ŋeḏi liji yecu kɩrisṯo gwe, gi gwune arane ŋuɽun ŋinyi ŋun ŋiŋir ŋeḏi yecu kɩrisṯo.

17namɩni ḏa ŋa maṯeicini gwiju, na ŋamaməṯo ḏɩməṯo ŋuɽun ŋe ŋun ŋigelijɩlo elo musaŋ, na ŋa gwabupaḏe ganu elo gwe, 18na ŋallɩŋe ŋuɽuna ŋun ŋɩbunyulo na ŋɩmaliḏeije ŋun ŋiro kaja kaja ŋaliŋiri ŋun ŋiŋirano, gi gwune ŋalɩminəne ŋun ŋigelijɩlo elo musaŋ; 19na ŋa gwalɩŋene ganu kwulo gwuŋa ŋa gwino gwun gwagwuloḏa liji lun lɩrimə gi jei, na ŋa gwiro bure gweḏi liji lun lo kirɩm, 20na gwun gwəṯaŋijo liji lun liro jɩɽilo ṯaṯ, na mualɩm gweḏi nyaɽe, na ŋuɽun ganu ŋun ŋigelijɩlo elo musaŋ ŋa gwəṯi ḏilɩŋeḏa na ŋuɽun ŋun ŋiro gwerkwe ŋeḏi elo, 21ŋa gwun gwaṯalɩmi gwun gwiro kaja, ŋa gwate gwaṯalɩmi gwula gwuŋa na? ŋa gwun gwaṯumə naŋarno, aṯanyapa ŋuɽama no naṯalmɩni ape a? 22ŋa gwun gwaṯarno, aṯura no naṯamɩni ureŋa a? ŋa gwun gwaṯiɽi ŋɩdio ganu ŋun ŋɩkədɩnu di de ŋe ḏorṯeḏa naṯalmɩni apa ŋuɽama gi lɩdunu le ḏorṯeḏa a? 23ŋa gwun gwaṯabupaḏe ganu gwan ŋuɽun ŋun ŋigelijɩlo elo musaŋ, gi gwune ŋaṯalki ŋuɽun ŋeno naṯamɩni api eloŋu ḏare a? 24gi gwune jiri jeḏi elo jiḏenɩnu gwan ŋuɽun ŋalo gi liji ganu lun liro ga dino gi gwune ŋulinu.

25na ḏuɽəno ḏeŋereḏo ḏa ŋimaduji ŋuɽuna ŋun ŋigelijɩlo elo musaŋ, namɩni ḏa ŋa maro gwun gwaki ŋuɽuna ŋun ŋigelijɩlo elo musaŋ, na ḏuɽəno ḏuŋa ḏɩmaro gi ḏijaga ḏaṯe ḏuɽəno no. 26na ḏa liji lun lijəḏəṯi late luɽəno no lɩmadɩme ŋuɽuna ŋun ŋɩbunyɩlo ŋuɽun ŋun ŋigelijɩlo elo musaŋ, namɩni ḏijaḏaṯa late luɽəno no ḏate ḏaṯɩliḏuɽəḏɩjo laginŋu gi ḏuɽəno na? 27na liji lun late luɽəno gi jiŋɩno no na ḏa lɩmadɩme ŋuɽuna ŋun ŋigelijɩlo elo musaŋ, laŋakɩmi ŋa gwun gwəṯi ŋuɽuna ŋun ŋulinu na ḏuɽəno namɩni gwaṯɩki ŋuɽuna ŋun ŋigelijɩlo elo musaŋ. 28gi gwune ŋu gwate gwiro gwiju gwun gwiro gwiju ŋuɽun ŋe ŋeḏi kɩluḏo gwe no, na ḏuɽəno ḏun ḏaŋinu kaŋɩnu ḏaṯe ḏiro ḏuɽəno ḏun ḏiro gwerkwe no. 29namɩni kweno gwiro gwiju gwerkwe gwun gwiro gwiju ŋuɽun ŋe ŋeḏi ḏugwor. na ḏuɽəno ḏun ḏiro gwerkwe ḏeḏi ḏugwor ḏiro gwuɽɩwə gwe gwun gwɩpiḏo pɽul, ḏate ḏan ŋuɽun ŋun ŋulinu no, na gwiji gwiro dino gwəṯi ḏɩbuḏia ḏədu gi liji no numɩni ro ḏi elo.

Currently Selected:

rumiya 2: OTR1966

Highlight

Copy