ŋuɽun ŋun ŋaŋinu 1

asa 1

ŋuɽun ŋun ŋar ŋijaŋijo gworo gwun gwila na ḏisalɩmia

1ḏəŋinio ḏeḏi yecu kɩrisṯo ḏun ḏiḏəḏi elo ŋwuaŋiḏi gi lɩwainy luŋun ŋan ŋuɽun ŋun ŋar ŋila. nuwəjo gwiji gwuŋun gweḏi kanyin nuaŋini kwu wainy gwuŋun gwun gwan yuwana, 2gwun gwaṯumə ga ŋuɽun ŋe ŋeḏi elo, na ŋan ḏɩṯeijo ga ḏeḏi yecu kɩrisṯo ŋɩdi ŋe wei ŋun ŋaŋəḏulo. 3ḏɩmoreḏa ḏaje lugwun gwun gwəgiri, na luŋa lun laṯɩdiŋini ŋuɽuna ŋeno ŋun ŋaŋijɩlo elo, naldɩme ŋuɽuna ŋun ŋulinu, gi gwune gaja go gɩṯo.

4nyi gwan yuwana gwo gwulijo liji leḏi kɩniso ŋun ŋiro kwoɽoṯəɽɩl geḏi asia, ḏiŋiriḏa ḏaje lagalo na ḏouwɩɽiḏa ḏeḏi ŋu gwun gwijo, na gwijo gwerre, na gwaje gwila, na ḏeḏi gwuɽɩwə gwun gwiro kwoɽoṯəɽɩl gwun gwijo gi jei ganu kɩḏoɽ geḏi ŋele ŋuŋun, 5na ḏeḏi yecu kɩrisṯo gwun gwaŋiḏi muma gwuḏuḏɩnu ga, gwun gwilɩŋinu gwerre gi liji lun laiyo, na gwun gwiro gwele gweḏi lele leḏi gɩḏilio. ḏoɽeḏa ḏaje lugwun gi gɩḏilio na ŋele gwun gwəmɩnyije na mijikədə ga ŋuɽun ŋage ŋun ŋɩki ŋuwən ŋe ŋuŋun, 6na mijiduji lele na jɩsis jeḏi elo gwun gwiro baba gwuŋun. gwerkwe. 7eʼe, gwo gwuwiḏi gijəbɩɽu; na wei gwa jei aŋu, na luŋa lun lɩḏugo, na liji leḏi əriḏo wei yeḏi gɩḏilio ləri gwula gwan ŋu. ouwɩrico ŋuɽuna ŋeno alro dino. gwerkwe.

8gwele gwun gwiro elo gwarno, nyi gwiro ŋwule ŋwun ŋwan alab na alaiya, gwun gwijo, na gwun gwijo gwerre, na gwun gwaje gwila, gwun gwəṯi ŋɩma wei.

ŋuɽun ŋun ŋaŋinu ŋeḏi ŋaɽe ŋeḏi liji

9nyi gwan yuwana gwun gwiro magalo gwalo ilɩjo kal gete gi ḏɩḏia na ŋele na ḏɩməṯo ḏugwore ḏeḏi yecu, namɩni nyi gwijo gi lɩrgwom lun lan baṯmus lun luɽeico ŋau ga ŋan ŋuɽun ŋeḏi elo na ḏɩṯeijo ga ḏeḏi yecu. 10na gi lamon leḏi gwele gwun gwiro elo nyi gwijo kwuɽɩwə gwun gwɩpiḏo pɽul, nidiŋɩni gi ḏuɽo ganu ḏinyi ŋwal ŋwɩbuḏo ŋwiro gi ŋwal ŋweḏi burujo, 11nalarno, uli ŋuɽuna ŋun ŋaŋəḏalo kɩḏam, ŋalwəje kɩniso ganu kwoɽoṯəɽɩl; kɩniso geḏi awɩsus, na geḏi simirna, na geḏi bargamus, na geḏi tayaṯira, na geḏi sardis, na geḏi bilaḏalbia, na geḏi lauḏɩkia.

12na nyi wɩrlo ga nuarno nyi gwanaŋu ŋwal ŋwun ŋwuməḏɩji, na gwune niwɩrle ga niaŋu laŋ kwoɽoṯəɽɩl lun lɩməṯəḏi ŋwambə lun liro ḏab, 13na kɩlɩgi ganu ge ŋwambə niaŋu gwete gwiro gi ŋaɽe ŋeḏi liji gwun gwukanu giria gijo uro ŋwara, na gwukanu ŋɩma ŋun ŋiro ḏab gi jabba ganu juŋun. 14na lɽa luŋun na əɽu yɩpiḏo pɽul gi jola jeḏi lrəmə lun liro kɩɽe, na gi gili, na jei juŋun jiro gi ḏiŋɩla ḏeḏi igo, 15na ŋwara ŋwuŋun ŋwiro nɩɽe gi aba yun yiro gui yun yijo kigo, na ŋwal ŋwuŋun ŋwiro gi ŋwal ŋweḏi gwəri gwun gwubuḏo, 16na gi ḏi ḏuŋun ḏun ḏiro ḏiŋir numəṯo ŋwuḏuma kwoɽoṯəɽɩl, na kɩwiḏ gun gəṯi ŋuwio ŋwuɽa berene gɩduḏi gi jɩŋaḏ ganu juŋun, na gi jei ganu juŋun nalro gi anyin yun yoɽəḏi ga anyino ganu. 17na gwune niaŋu niauci ga ŋwara ganu ŋwuŋun gi gwiji gwun gwaiyo, nuŋwingele ḏi elo ḏuŋun ḏun ḏiŋir, nuarno, ŋaḏonyɩḏa no, nyi gwiro gwun gwiro lɽa na gweḏi gɩdo, 18na gwun gwumiḏo gi gɩḏilio, na nyi gwaiyo namɩni nyi məmɩḏe gi gɩḏilio, na nyi gwəṯi lɩmubṯa le ḏaiya na leḏi ŋalo ŋun gaṯɩn lijije lun laiyo. 19na dino uli ŋuɽuna ŋun ŋaŋəḏalo na ŋun ŋijo na ŋun ŋar ŋila. 20na ŋuɽun ŋun ŋɩlɩbo ŋeḏi ŋwudum kwoɽoṯəɽɩl ŋwun ŋaŋəḏalo gi ḏi ḏinyi ḏun ḏiŋir, na ŋeḏi laŋ kwoɽoṯəɽɩl lun lɩməṯəḏi ŋwambə lun liro ḏab ŋiro dino: ŋwudum kwoɽoṯəɽɩl ŋwiro liji leḏi kanyin leḏi kɩniso kwoɽoṯəɽɩl, na laŋ kwoɽoṯəɽɩl lun lɩməṯəḏi ŋwambə liro kɩniso kwoɽoṯəɽɩl.

Currently Selected:

ŋuɽun ŋun ŋaŋinu 1: OTR1966

Highlight

Copy

Compare