Tiiṯus 3
3
Midhe gwa Masiiẖi a dhugul dhuŋun
1Aŋidhaniyilo diluthejo lijo lina luthi ŋelenya a lina luthi s̱ulta nyuni, aluthejo nyuni, alije momaŋ gi ŋiro peth ŋina ŋiŋir. 2Athil abiŋudhi dhuŋuna dhina dhike kwiji gweda no, athiluthi kaijiyuŋw gi je no, athilbuthi ŋimira, alaŋiye dhuŋuna dha dugor dina dirujinu ditiditiny gi liji peth. 3Ŋinena rana jirila ko kwereny, athathana uthejo dhuŋuna nyuni no, athana ukinejini ganu, athana idijo ŋida ŋina ŋathijamira ŋitiŋiter a ŋidi ŋina ŋathijiŋiriye dugore ŋwurko ŋwai, athanaje dibupe ŋijigora a dhuŋun dhina dhathijidhai ŋidi amira ŋa liji liter, athiji liji irini, alirini gweta gweta dega ganu. 4Abi dina ma ŋimiri ŋa Kalo gina giro Mukhallis̱ gwega a uminyi gwuŋun aŋina gi liji, 5gwati gwiro ŋiro ŋina ŋiŋir ŋina ŋimanal apai no, abi gi dhuŋun dha ina gwuŋun gwimijigilaŋiye, uye gwai gwa liŋini manaŋ, a jarima gwai gwa Dhigirim dhina Dhiŋir; 6dhina dhimijibulejo dhoinyadhanu Yasuuⓐ al Masiiẖ gwai gwina gwiro Mukhallis̱ gwega; 7di ada alŋa limiŋirini niⓐma gwai gwuŋun, alŋa laji lapai ŋelenya gwiro ŋinena dhunijo gwa midhe gwina gwathije gwortal. 8Dhuŋun ibidha dhiro titiganu, a nyi gwuminyu daŋa wuriteje gi dhuŋun ganu ibidha, di liji muthedha momaŋ lina limuminyi Kaloŋa dathilapai ŋiro ŋina ŋiŋir. Ŋidi ibiŋa ŋiŋir a ŋuthi je ganu gi liji. 9Ŋababire gi uthe galo gwina gwiro ŋirila, a dhuŋun dhina dhuthi ligwurna la ro kwereny, a kaijiye gi je, a upejiye alaŋ gi dhuŋun dha naamuus; ŋinena athiluthi je ganu no a ŋiro tur. 10Kwiji gwina gwuthi dhuŋuna ganu ram gwina gwimal abiŋaijo lamun letipo i ŋwamun ganu ram ŋwubidoinya; 11ŋaliŋa darnu gweta gwina gwiro minoŋ gwuthi ŋadigirenya ŋina ŋimaro ŋike a ŋeda gwike, ŋwukimini gwiren.
Dhuŋun dhina dhuthi Buulus dhan liji coŋ
12Maji minyi ukeja Artiimaasuŋw duguŋa, i Tikhiikus, ŋaje momaŋ daŋa ila diginy gi Niikuubuuliis, ŋinena getiny fikr momaŋ darnu nyi gwaje mine kogai. 13Abrico Ziinaasuŋw gwina gwiro gweta gwina gwathapai ŋiro ŋa naamuus a Abulluus alije momaŋ dela gi safariiya gwegen, dathi ŋidi ŋeda amiratho degen no. 14Abrico lijo lega dilalimini ko dathilapai ŋiro ŋina ŋiŋir gi dhuŋun dhina dhiro daruri, dathil aji lerna fruuta no. 15Liji peth lina lijanalai lisalimiyaŋa. Salimiyilo lina luminyije gi imaan. Niⓐma gwaje dagalo peth. Amiin.
Currently Selected:
Tiiṯus 3: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
