Ruumiya 10
10
1Limaguri lai, uminyi gwa dhugor dhiny a abiŋaije Kaloŋa gwiny gwan Israayiil gwiro dilgilaŋ. 2Abi ŋinena nyi gwiro shaahid degen lina luthi uminyuŋw gwa Kalo, abi gwati gwiro gi dhuŋun dha liŋa no. 3Ŋinena dhimithilo dhuŋuna dhina dhiŋir dha Kalo, athilbibupe dilmuthineye dhuŋuna galo dhina dhiŋir dhan lidom legen, athilbi uthejo dhuŋuna dhina dhiŋir dha Kalo nyuni no. 4Ŋinena al Masiiẖ gwiro mira gwa naamuus gi dhuŋun dhina dhiŋir gwan liji peth lina luminyu.
Dhai dhina dhiyaŋ dha dhuŋun dhina dhiŋir dhan liji peth
5Abi Muusa gwulo dhuŋuna dhan dhuŋun dhina dhiŋir naamuus gwai darnu, Kwiji gwina gwapai dhuŋuna ibidha dhaji dhuŋwdhai midhe. 6Abi dhuŋun dhina dhiŋir dha imaan dhathare minoŋ, Athaŋa aro gi dhugor ganu dhuŋa nu, Ei gwaji gwalo Sama? (gi dhuŋun ibidha, duŋwapa al Masiiẖuŋw.) 7I ei gwaji gwula kucilmi? (gi dhuŋun ibidha, duŋwdireye al Masiiẖuŋw dai.) 8Abi dhuŋun dharakwai? Dhuŋun dho githo duguŋa gi linyu luŋa, a gi dhugor ganu dhuŋa; gi dhuŋun ibidha, dhuŋun dha imaan dhina dhathildhai abiŋaijo lijo. 9Abi ada ŋa gwimateje galo linyu lai luŋa darnu Kweleny gwina gwan Yasuuⓐ, ŋuminyi gi dhugor ganu dhuŋa darnu gwima Kalo direye dai, ŋa gwimagilaŋ. 10Ŋinena dhugor dhai kwiji gwathuminyi dhuŋuna dhina dhiŋir; a gwathiteje galo linyu lai di gilaŋ. 11Abi kitham garnu, Gwina gwuminyi ŋeduŋw athi dharo apo no. 12Ŋinena gwati gwiro ter gi Yahuud a Yuunaaniyiin no; ŋinena ro Kweleny gwetipo degen alaŋ peth a gwuthi ŋelenya degen peth lina lathurniye jiriny juŋun. 13Abi peth lina lathurniye jiriny ja Kweleny limagilaŋ. 14Abi akwai gwalurniye ada gwati gwimaluminyi no? A akwai gwaluminyi gwina gwati gwimalgwai diŋini no? A akwai ladiŋini ada kwiji gwimerna gwina gwabiŋaijilo. 15A akwai lalabiŋaijo ada lati lima ukejini no? Gwiro ŋinena ulinuŋwna, Aŋ gwiŋiranu gi ŋwora ŋwa liji lina lathabiŋaijo lijo Dhuŋuna dhina Dhiŋir dha audhaijiye galo, a lina lathabiŋaijo lijo Dhuŋun dhai dhina Dhiŋir dha ŋidi ŋina ŋiŋir. 16Abi peth lati limuthejo Dhuŋuna dhina Dhiŋir nyuni no, ŋinena aro Ishaⓐya nu, Kweleny gwai, ei gwiro gwina gwimuminyi dhuŋuna dhuri? 17A minoŋ imaan gwathila diŋini gwai, a diŋini gwathila dhuŋun dhai dha Kalo. 18Abi nyi gwarnu, Ŋediŋa lati limadiŋini na? Ye, titiganu, ŋwal ŋwegen ŋwimela kidhila peth, a dhuŋun dhegen dhimela ŋwen peth ŋwa gidhila. 19Abi nyi gwarnu, Israayiil lati liliŋidhi na? Kwereny Muusa gwarnu, Linyil kiye dugore ŋiduiny ŋai liji lai lina lati liro liji no, a liumam lai lina liro jirila nyi gwajikiye dugore. 20Abi Ishaⓐya gwire ganu gwuleny, ŋwarnu, Liminyil buje lina lati libupiny no; a nyi gwimaŋini degen lina lati lathinyigwai uthe galo no. 21Abi gi Israayiil ŋwarnu, Saaⓐa peth ja aŋin nyi gwimadhiŋa doi diny gi liji lina lati luthi nyuni no a lina lara labuje dhuŋuna dhina dhike diginy.
Currently Selected:
Ruumiya 10: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
