Ⲁibraaniyiin 3
3
Al Masiiẖ gwinunu di Muusa
1A minoŋ, limega lai lina liŋir didirel, lina luthi aicaijiyuŋw gi urnie gwa Sama, ireyul Yasuuⓐ al Masiiẖuŋw je nono, gwina gwiro gweta gwina gwukejinu a gwina gwiro kweleny gwa gusus gwina gwimanagwai teje galo; 2ŋeda gwiŋir dugun gwina gwigeto ŋeduŋw ŋiro duŋwuro gweta gwina gwukejinu a kweleny gwa gusus, gwiro ŋinena iŋirina Muusa ko gi dunu gwuŋun peth. 3Ŋinena ma kwiji ibigwa dhuredhini darnu gwiŋiradho duŋwapai majdh gwoinyadhanu di Muusa, ŋinena athi kwiji gwina gwaico duna uthi nuŋw gwoinyadhanu gi dunu. 4(Dunu peth gwuthi kwijo gwina gwigeto; abi gwina gwigeto ŋida peth gwan Kalo.) 5Titiganu Muusa gwiŋir gi dunu gwuŋun peth, ŋwuro ŋinena gadham ga shahaada gwa ŋidi ibiŋa ŋina ŋaji ŋuŋwai abiŋi; 6abi al Masiiẖ gwiŋir gwiro ŋinena ŋari gi dunu gwa Kalo. Abi anaŋa liro dunu gwuŋun, ada anaŋa limamuthedha uminyuŋw gwuri momaŋ a are ŋamilai gwa dhunijo di gi lamun lina limirudhi. 7A minoŋ gwiro ŋinena arna Dhigirim dhina Dhiŋir, Ŋinenaŋina, ada nyaŋa limadiŋini gwula gwuŋun, 8athanya biriyo dugore dalo, gwiro ŋinena kiyina liji Kaloŋa dhugore gi lamun ladhi idhejini gi leba no; 9gi lamun lina lidhejinlai baboŋa lalo lidhejiny, alaŋa ŋiro ŋiny jidhileo dure‐ram. 10Gi dhuŋun ibidha nyike dhugore gi liji lina lijo gi lamun ibile, nyarnu, Ŋediŋa ŋwamun peth lathapai ŋida ŋina ŋike gi dugor ganu degen; athil liŋidhi dai diny no. 11Di nyi ẖalifiye gi kadhugore gwiny, nyarnu, Ŋediŋa lati luni gi gatho uwa gwiny no. 12Ethadhinul galo, limega lai, dathi kwiji gweda dagalo ganu uthi dhugore dhina dhike, dhina dhati dhuthi imaan no, gi dhuŋun dhadhi gathani dhuŋuna dha Kalo gina gimidho.
Daruri alŋa lapai dhuŋuna dhina dhiŋir di gi lamun lina limirudhi
13Abi gathajiyul uwa gweta gweta dagalo ganu ŋwamun peth, ŋinena ro lamun ladhi urnini ŋinenaŋina; dathi kwiji gweda dagalo ganu biriyo dhugore dhuŋun ŋwujimi ŋai ŋa ŋidi ŋina ŋike no. 14Ŋinena anaŋa limaro limedhigen la al Masiiẖ, ada anaŋa limamuthedha uminyuŋw gwina gwuthana kwerkwereny gwina gwimuthinu galo di gi lamun lina lamira; 15ŋinena dharnu, Ŋinenaŋina, ada nyaŋa limadiŋini gwula gwuŋun, athanya biriyo dugore dalo, gwiro ŋinena kiyina liji Kaloŋa dhugore no. 16Abi eiŋa liro lina lidiŋinu albi kiye Kaloŋa dhugore? Lati liro peth lina litui gi Mas̱r Muusa gwai na? 17A eiŋa liro lina likiyo Kaloŋa dhugore jidhileo dure‐ram? Liji lati liro lina lapo ŋida ŋina ŋike, lina luthi aŋina yegen ina idigiro ina ido gi leba na? 18A eiŋa liro lina lalifijilo Kalo darnu lati luni gi gatho uwa gwuŋun no, abi lina lati luthejo nyuni na? 19Abi anaŋa limaŋa darnu ŋediŋa lati luthi ŋoma diluni no ŋinena athil uthi imaan no.
Currently Selected:
Ⲁibraaniyiin 3: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
