Ⲁibraaniyiin 1
1
Dhuŋun dhina dhadhijaŋajo darnu aŋ gwiro gwina gwulinu kitham ganu ibiga
1Ro gidhila Kalo gabiŋaijo baboŋaije gi nebiŋa dhuŋun dhai dhitidhiter a dai dai doinyadho; 2abi gi ŋwamun ibiŋwa ŋwina ŋwiro gidon gimijabiŋaijo gi Ŋari ŋuŋun, ŋina ŋimuŋw ruje gweta gwina gwuthi ŋelenya gi ŋidi alaŋ peth, a gidhila gitini ŋeda gwai ko. 3Ŋeda gwina gwiro fure gwa majdh gwa Kalo, a s̱uura gwina gwiro titiganu gwa dhuŋun dhina dhuthi Kalo, a gwuthi ŋida peth dhuŋun dhai dha ŋoma ŋuŋun. Dina muŋw geta juruŋw gwan ŋidi ŋega ŋina ŋike, ŋwujalo gi dhoi dhina dhiro dhiŋir dha ŋeleny ŋa ŋeda gwina gwinaŋ; 4gwina gwimaro gwinunu gwoinyadhanu gi malaayka, a gwimapai jiriny jina jiŋiranu gwuleny degen.
Ŋari ŋa Kalo ŋinunu gi malaayka
5Malaayka gwiro gwirau gwina gwabiŋaijuŋw lamun leta ŋwarnu, Ŋa gwiro Ŋari ŋiny, nyi gwima liŋa ŋinenaŋina? a ko, Nyi gwaro Babo gwuŋun, a ŋeda gwaro Ŋari ŋiny? 6A ko, maji muŋw apa Ŋare ŋuŋun ŋina ŋiro lira kidhila, ŋwarnu, Abrico malaayka peth la Kalo alorthadha. 7A gi dhuŋun dha malaayka ŋwarnu, Gwina gwigeto malaayka luŋun karun, a jadham juŋun dhiŋila dha iga. 8Abi gwan Ŋari ŋwarnu, Kalo gai, kursi guŋa gathije gwortal, a lura la dhuŋun dhina dhidhunu galo a lura la ŋeleny ŋuŋa. 9Ŋa gwuminyu dhuŋuna dhina dhiŋir, ŋabidoinya dhuŋuna dhina dhike; a minoŋ Kalo, gina giro Kalo guŋa, gimaŋa buruthe ŋela ŋai ŋadhiŋir dhugore gwoinyadhanu gi limadhigalo. 10A ŋa, Kweleny gwai, kwerkwereny ŋa gwigeto dhugul dha gidhila; a Samawaat gwiro ŋiro ŋa doi duŋa. 11A ŋaji ŋerna, abi ŋa gwaje; a peth ŋaji ŋaro ŋinena kiraŋ gina gaji garo gurun; 12a ko ŋaro ŋinena luga lina lathimirini liduŋw, a ŋaji ŋupeyini ganu. Abi ŋa gwiro ŋinena athaŋan je kwereny, a jidhila juŋa jati jerna no. 13Abi malaayka gwiro gwirau gwina gwabiŋaijuŋw lamun leta ŋwaicinu, Jalo gi dhoi dhiny dhina dhiro dhiŋir, di minyi ruje lijo gidhur ga ŋwora ŋwuŋa lina likiyanyalai? 14Ŋediŋa peth lati liro digirim, lina lathapai ŋiro lina lukejinu dilapai ŋiro ŋan ŋediŋa lina laji luthi ŋelenya ŋadhi gilaŋ na?
Currently Selected:
Ⲁibraaniyiin 1: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
