Afasus 5
5
1A minoŋ ruiyul ŋinena Kalo, gwiro ŋinena keleŋa gina guminyuŋwulo; 2idhidhul gi uminyi, gwiro ŋinena uminyaje al Masiiẖ ko, ŋwudhedha Kaloŋa aŋina yuŋun yan nyaŋa, ŋwuro Kaŋal gadhi garini ŋwuro ŋinena gwudhurul.
3Abi ŋidhir, a ŋidi peth ŋina ŋiro ŋirle, i obadhe galo, athanyal abrico dabiŋini keligeny ganu dagalo no; dhuŋun dha dhabrico dhuŋuna ibidha dhaudhi gi liji lina liŋir didirel; 4athanya abrico dhuŋuna dhina dhiro ŋirle, i dhuŋun dha ŋirila, i dhuŋun dha dhakejuma dhina dhati dhuthi je ganu dhabiŋini dagalo ganu no; ŋidi ibiŋa ŋati ŋaudhi no; gwiŋiranu daici Kaloŋa shukran. 5Nyaŋa liliŋidhi momaŋ darnu kwiji gwina gwiro gwidhir, i kwiji gwina gwiro ŋirle, i kwiji gwina gwathobadhe galo gwina gwathidijo ŋwoboŋ ŋwurko ŋwai, gwati gwuthi ŋelenya gi kidhila ga al Masiiẖ a Kalo no. 6Athanya abrico kwijo gwetipo gwajinyimnyeje dhuŋun dhai dhina dhiro tur no; ŋinena athi ŋidi ibiŋa apa kadhugoruŋw gwa Kalo keleŋa alaŋ gina gati guthi nyuni no. 7Athanya uthi dhuŋuna liji lai ibila no. 8Abi kwereny nyaŋa liro girim, abi ŋinena di Kweleny nyaŋa limaro fure; idhidhul gwiro ŋinena keleŋa ga fure. 9(Abi fruuta gwa Dhigirim gwo gi ŋidi ganu peth ŋina ŋiŋir a gi dhuŋun ganu dhina dhiro titiganu.) 10Idhejul danya liŋa aŋ gwiro gwina gwathiŋiriye Kwelenya dhugore. 11Athanya aicaijiyo ŋiro ŋa girim ŋina ŋati ŋuthi fruuta no; nyalbi ekajo. 12Abi ŋidi peth ŋina ŋathil liji apai nyim ŋuthi dhara dilabiŋi galo. 13Abi ŋidi peth ŋina ŋekajini ŋaŋudhini fure gwai; abi ŋidi peth ŋina ŋaŋudhini ŋiro fure. 14Minoŋ ŋwarnu, Birtho, kwiji gwai gwina gwidhro, ŋa dire dai, a al Masiiẖ gwaŋa ora. 15Daŋudhul galo nyaŋa lathelila akwai, athanya idhidhi ŋirila ŋai no, nyabibebra. 16Bibrul ŋwamun ŋwalo, ŋinena rilo ŋwamun ŋwike. 17A minoŋ gi dhuŋun ibidha, athanya rui jirila no, nyabiliŋa dhuŋuna dha Kweleny dhina dhibupuŋw. 18Athanya rlulo girija gai, gina gathirlaleye kwijo gwuleny no; nyabi oinyajini Dhigirim dhai; 19nyabiŋi liji lai dagalo ganu gi mazaamiir, a gi dheliŋa dha Kalo a dheliŋa dhina dhiro dhigirim, nyeliŋa nyagitijo Kwelenya dheliŋa dhiŋir dugor dai dalo peth. 20Gi ŋidi peth aicul Kaloŋa a Babo shukran ŋwamun peth gi jiriny ja Kweleny gwega gwina gwan Yasuuⓐ al Masiiẖ. 21Deŋinaijul lijo peth gweta gweta dagalo ganu gi ŋidheny ŋa Kalo.
Midhe gwa liji la dunu gwetipo lina liro Masiiẖiyiin
22La lai, deŋinaijul loma lalo, gwiro ŋinena deŋinaijanyana Kweleny. 23Abi kwoma gwiro lira la kwa gwuŋun, gwiro ŋinena ruina al Masiiẖ ko lira la kaniisa gina giro aŋinu yuŋun a mukhallis̱ gwa aŋinu. 24Gwiro ŋinena deŋinaijina kaniisa al Masiiẖuŋw, a minoŋ la aram ladeŋinaijo loma legen gi ŋidi peth. 25Nyaŋa, loma lai, aram nyaŋa luminyi laio lalo, gwiro ŋinena uminyina al Masiiẖ ko kaniisa, ŋwudhedha gwidom gwuŋun; 26duŋwjuriye ŋwuye ŋau ŋai ŋa dhuŋun, 27duŋwapai dugun kaniisa gina goinyadho majdh, athuŋwuthi ŋirlea i arijidh i ŋidi ŋiro minoŋ no; duŋwuro giŋir didirel, athuŋw uthi dhara no. 28A minoŋ aram loma ko luminyi laio legen gwiro ŋinena uminyilo aŋina yegen. Gwina gwuminyu kwaio gwuŋun ŋwuminyi gwidom gwuŋun. 29Gwati gwetipo gwina gwidoinyo aŋina yuŋun no; yathuŋwie, ŋwudima, gwiro ŋinena athina Kweleny ko ie kaniisa, ŋwudima. 30Ŋinena alŋa liro agsaam gwa aŋinu yuŋun, a gwa ji juŋun, a gwa ŋwui ŋwuŋun. 31Gi dhuŋun ibidha kwoma gwagathani babuŋw gwuŋun a nana gwuŋun, alaiciye kwa gwai gwuŋun, a ŋediŋa ram laro aŋinu yetipo. 32Dhuŋun ibidha dhiro dhina dhigilibicinu dhina dhinaŋ; nyi gwarnu dhuŋun dha al Masiiẖ a dha kaniisa. 33Abi nyaŋa peth lina liro loma, aram gweta gweta gwuminyi kwaio gwuŋun gwiro ŋinena uminyuŋwna gwidom gwuŋun; a kwa gwuŋun ko aram gwaneye kwoma gwuŋun.
Currently Selected:
Afasus 5: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
