Afasus 1
1
Salaam
1Buulus, gwina gwukejinu gwa Yasuuⓐ al Masiiẖ dhuŋun dhai dhina dhibupo Kalo, gi liji lina liŋir didirel lina lathije gi Afasus, lina luthi imaan di al Masiiẖ Yasuuⓐ. 2Niⓐma dagalo a audhaijiye galo di Kalo gina giro Babo gwega, a di Kweleny gwina gwan Yasuuⓐ al Masiiẖ.
Shukr di Kalo
3Alorthadha Kaloŋa a Babo gwa Kweleny gwega gwina gwan Yasuuⓐ al Masiiẖ, gina gibarikije baraka gwai peth gi digirim dega gi kidhila ga Sama al Masiiẖ gwai. 4Gwiro ŋinena uthinijina ganu di al Masiiẖ kwereny nanaŋ gidhila gati gigitinu no, dilro lina liŋir didirel a lina lati luthi lom gi je ganu juŋun no, uminyi gwai. 5Gigetije minoŋ ro kwerkwereny dilro keleŋa guŋun Yasuuⓐ al Masiiẖ gwai dugun, gwiro ŋinena iŋir dhugore gwa dhuŋun dhina dhibupuŋw. 6Dilorthadha majdh gwa niⓐma gwuŋun, gwina gwimijidhedha Ŋari ŋai ŋuŋun ŋina ŋuminyuŋw. 7Ŋeda gwai alŋa libibrinu ŋin ŋai ŋuŋun, aluthi dhudhanuŋw ganu gwa ŋidi ŋega ŋina ŋike, gwiro ŋinena niⓐma gwuŋun gwina gwuthuŋwgwai ŋelenya. 8Gwina gwidhedhije bebruŋw peth a dhuŋun dhai dhadhi liŋa; 9a gimijaŋajo dhuŋuna dhina dhigilibicinu dha bupe gwuŋun, gwiro ŋinena dhuŋun dhina dhibupuŋw dhina dhigetuŋw dugun. 10Di ma ŋwamun uthi je ganu gawureje ŋida peth liduŋw alro ŋetipo di al Masiiẖ, ŋina ŋo Sama a ŋina ŋo kwiyaŋ. 11Di al Masiiẖ ko alŋa luthinu ganu dilro ŋidi ŋa Kalo ŋina ŋigitinu gwiro ŋinena bupuŋwna, gina gathapai ŋiro peth gwiro ŋinena bupina ŋadigireny ŋuŋun, 12dilro lina lathorthadha majdh gwuŋun, alŋa lina luminyu al Masiiẖuŋw kwereny. 13Dugun nyaŋa ko manya diŋini dhuŋuna dhina dhiro titiganu, Dhuŋun dhina Dhiŋir dhiro dhina dhiro gilaŋ gwalo, a gwiro ŋinena uminyanyana dugun ko, nyaŋa limakhithimini Dhigirim dhai dhina Dhiŋir dhina dharuŋwdhai. 14Dhina dhiro ŋidi ŋina ŋidhedhuŋwulo kwerkwereny ŋa ŋidi ŋega ŋina ŋaji ŋalapai di ma Kalo bibre ŋida ŋuŋun, dilorthadha majdh gwuŋun.
Abiŋaije Kaloŋa gwan liŋa gwa Kalo
15A gi dhuŋun ibidha dina minyi diŋini ko imaan gwalo di Kweleny gwina gwan Yasuuⓐ, a uminyi gi liji peth lina liŋir didirel, 16athinyi dhunudhi lamun letipo dare shukran gwan nyaŋa no, a nyi gwathabiŋadhaijo Kaloŋa dagalo. 17Daji Kalo ga Kweleny gwega gwina gwan Yasuuⓐ al Masiiẖ, gina giro Babo gwina gwuthi majdh, dhedha dhigirima dha ŋadigireny ŋadhi bebra a dhadhi aŋiye dhina dhaji dhila manya liŋa Kaloŋa momaŋ. 18Je ja ŋadigireny ŋalo jimure ganu; danya uthi ŋoma nyaliŋa aŋ gwiro dhunijo gwina gwurniajaje al Masiiẖ, a aŋ gwiro oinyadhe gwa majdh gwa ŋidi ŋuŋun gi liji lina liŋir didirel. 19A aŋ gwiro ni gwa ŋoma ŋuŋun ŋina ŋoinyadho dega lina luminyu, gwiro ŋinena ŋiro ŋa ŋoma ŋuŋun ŋina ŋibur.
Ŋoma ŋa Kalo ŋaŋinu gi dire dai gwa al Masiiẖ
20Ŋina ŋapuŋwulo di al Masiiẖ, dina muŋwdireye dai, a ŋwugeta gi dhoi dhuŋun dhina dhiro dhiŋir gi kidhila ga Sama, 21gwina gwinunu gi liji peth lina luthi ŋelenya, a ŋoma, a bur nono, a ŋeleny peth ŋa leleny, a jiriny peth jina jidhedhinu, a gwati gwiro gi gidhila ibiga dogo no, abi gi jidhila jina jaji jila ko. 22A ŋwugeta ŋida peth ŋwora ganu ŋwuŋun, a ŋwuruje lira la ŋidi peth ŋa kaniisa, 23gina giro aŋinu yuŋun, gina giro oinyadhe gwa ŋeda gwina gwathoinyadhani ŋida peth kalo peth.
Currently Selected:
Afasus 1: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
