Aⲁmaal Ar Rusul 1
1
Dhuŋun dhina dhadhijaŋajo darnu aŋ gwiro gwina gwulinu kitham ganu ibiga
1Dhuŋun dhina dhiro kwerkwereny dhina dhuliny, Taawufiilus gwai, dhan ŋidi peth ŋina ŋapilo Yasuuⓐ a ŋina ŋathuŋwŋai alimiye, 2di gi lamun lina limuŋwlai alo, dina muŋwabiŋaijo lijo lina lukejinu lina luthinuŋwul ganu dhuŋun dhai dha Dhigirim dhina Dhiŋir. 3Lina laŋajuŋwulo ko aŋina yuŋun dina juŋw nanaŋ gwimidho dhuŋun dhai dhoinyadho dhina dhiliŋinu momaŋ dina maji muŋw umi ŋiya, ŋwulaŋinijo ŋwamun dure‐ram, a ŋwabiŋi dhuŋuna dhan gidhila ga Kalo. 4A dina jil lai galo liduŋw, ŋwulabiŋaijo darnu lati lagathani Urushaliimuŋw no, nyabi dhunijo dhuŋuna dhina dhardhai Babo, dhina dhimanya diŋini diginy. 5Ŋinena ⓐamidhiyo Yuuẖanna ŋau ŋai; abi nyaŋa laji laⓐamidhini Dhigirim dhai dhina Dhiŋir maji ma ŋwamun coŋ erna.
Alo gwa Yasuuⓐ gi Sama
6Abi ŋediŋa lina lauradho liduŋw, alothaije galo, alaicinu, Kweleny gwai, gi kaija ibiga ŋa gwaji gwawurejo Israayiiluŋw ŋelenya manaŋ a? 7Ŋwulabiŋaijo ŋwulaici, Gwati gwan nyaŋa danya liŋa kaija i ŋwamun, ŋwina ŋwigetilo Babo gi ŋeleny ŋuŋun no, 8abi nyaŋa laji lapai ŋoma, maji ma Dhigirim dhina Dhiŋir ula dagalo; a nyaŋa laro shuhuud gwiny gi Urushaliim, a gi Yahuudiiya peth, a gi Saamira, a kidhila peth. 9A dina muŋwabiŋi dhuŋuna ibidha, ŋwupini kabo, a ŋediŋa teje je a giburu giriba ŋeduŋw gi je ganu jegen athil aŋadhi no. 10Dina jil dilteje Samaŋw je a ŋeda je dalo, al loma ram dhunejo galo lina ligeno ciraŋa jina jipidho; 11allaicinu, Liji lai la Jaliil, kworaŋ nyabi dhunalaŋ nyateje Sama je? Yasuuⓐ ibigwa, gwina gwimupini dagalo ganu gi Sama, gwaji gwaura minoŋ manaŋ gwiro ŋinena aŋadhanyana dalo gi Sama.
Mattiyaas gwimarujini gweta gwina gwukejinu gwina gwiro nimra die‐a‐ram
12Kaija ibige alaurai gi Urushaliim gi len lina lan Len la Zetuun, lina lijo githo gi Urushaliim gwiro ŋinena athin liji uthi ŋoma dela gi safariiya gi lamun la Sabith. 13A dina maluni, alalo gi dunu gwina gwijo agwilaŋ gi dunu alaŋ, gwina gwijina Bu_trus ganu, a Yaⓐguub, a Yuuẖanna, a Andaraawus, a Fiilibbus, a Tuuma, a Barthuulamaawus, a Matta, a Yaⓐguub gwina gwiro ŋari ŋa H̱alfa, a Simⓐaan gwina gwan Qayuur, a Yahuudha gwina gwiro megen gwa Yaⓐguubŋa. 14Liji peth ibila lathabiŋaijo Kaloŋa dhugor dhai dhetipo athilothaije Kaloŋa galo la ŋalai, a Maryam gwina gwiro nana gwa Yasuuⓐ, a limegen ŋalai luŋun.
15A gi ŋwamun ibiŋwe a Bu_trus dhunalaŋ keligeny ganu gi calmiz, (a ⓐadad gwa jiriny ja liji lina lijo liduŋw gwiro ŋinena miiya wa ⓐishriin,) 16ŋwarnu, Liji lai lina liro limega, dhuŋun dhiŋir gi dhuŋun meajini dha kitham ibiga, dhina dhabiŋu Dhigirim dhina Dhiŋir kwereny gi ŋwinyu ŋwa Daawud dhan Yahuudha, gwina gwimaro kweleny gwa ŋediŋa lina limuthi Yasuuⓐuŋw. 17Gwina gwiro gweta dega ganu, abi gwimuthi dhuŋuna gi ŋiro ibiŋa. 18Kwiji ibigwa gwili dhiruiny ujra yai ya dhuŋun dhuŋun dhina dhike; a gwimida kwereny gi je ganu juŋun, a ŋwube kare keligeny ganu, a cu tuiya por peth. 19A dhuŋun ibidha liŋinu gi liji peth lina lathije Urushaliim; di alaici dhiruiny ibidha gi dhuŋun dhegen dhina dhathilabiŋi, H̱agaldama, gwina gwuthi maⓐna gwan Dhiruiny dha Ŋin. 20Gwiro ŋinena ulinuŋwna kitham ga Mazaamiir darnu, Abricul kaloŋa guŋun ŋwijalo buiny, a athin kwiji gweda jo no; a abrico gwiter ŋwapai ŋiro ŋuŋun. 21Gwiŋir di gweta gi liji ibila lina lathanal aicaijiye liduŋw kaija peth gina gudhigai Kweleny gwina gwan Yasuuⓐ dega ganu a ŋwutu, 22ro gi lamun la maⓐmuudiiya gwa Yuuẖanna, di gi lamun lina limuŋwulai upini dega, duŋwuro shaahid anaŋa lai di dire gwuŋun dai. 23Allidhuneje ram, Yuusuf gwina gwathilaici Baarsaaba, gwina gwuthi jiriny jiter jan Yuustus, a Mattiyaas. 24Alabiŋaijo Kaloŋa, alarnu, Kweleny gwai, gwina gwiliŋidhi dugore da liji peth, aŋajije ŋa gweta gi liji ibila ram gwina gwibupaŋa, 25duŋw apai gura ga ŋiro ibiŋa ŋa liji lina lukejinu, ŋina ŋiman Yahuudha ide ŋwulgathani ŋwela kalo guŋun. 26Algatho gura gegen; a gura ida di Mattiyaas; a ŋeda dhuredhini liji lai lina lukejinu lina liro die‐a‐gwetipo.
Currently Selected:
Aⲁmaal Ar Rusul 1: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
