2 Kuurinthuus 8
8
Dhuŋun dhadhi wawurteje gwarush liduŋw gwan liji lina lati luthi ŋida no lina lathije gi Urushaliim
1Abi anaŋa lajiliŋidhiye, limega lai, niⓐma gwa Kalo gwina gwidhedhuŋw kanaayis ga Makiduuniya; 2akwai gi idhejini gwa dhuŋun dhina dhibur gwuleny oinyadhe gwa iŋir dugore gwegen a erna ŋida gwegen gwina gwolaŋ ganu digenyadhe gi ŋidi ŋoinyadho ŋa dhuŋun dhegen dhadhi dhedha ŋida ŋegen momaŋ dugor dai dina diŋir. 3Ŋinena dhedhilo gi dhuŋun dha ŋoma ŋegen, a nyi gwiro shaahid gi dhuŋun dhina dhuminyilo dha lidom legen; 4libupo gwuleny daguri dilapai niⓐma, a aicaijiye gwa ŋiro ŋina ŋiro ŋan liji lina liŋir didirel. 5A gwati gwaro ŋinena bupanana no, abi lidhedhi Kwelenya lidom legen kwerkwereny, a daguri dhuŋun dhai dhina dhibupo Kalo. 6A gwiro ŋinena dina bupanana di Tiiṯus, darnu gwiro ŋinena madhinuŋwna kwereny a ŋwapai ŋiro, a minoŋ gwaji meajo ŋiro ŋa niⓐma ibigwa ko. 7Abi gwiro ŋinena manyan uthi gedadhuŋw gi ŋidi peth, gi imaan, a gi dhuŋun dha dhabiŋi, a gi liŋa, a gi dhuŋun peth dhadhapai ŋiro momaŋ, a gi uminyi gwalo daguri, gwiŋir danya gedadhini ŋiro ŋa niⓐma ibigwa ko.
Dhuŋun dhina dhathi Yasuuⓐ apai dhiro dhuŋun dhina dhiŋir dana gwujani
8Nyi gwati gwabiŋaijaje amr gwai no, abi uminyi gwai gwadhapai ŋiro momaŋ gwina gwuthi liji liter, didheje dhuŋuna dhina dhapanya momaŋ gi uminyi gwalo ko. 9Ŋinena liŋidhanya niⓐma gwa Kweleny gwuri gwina gwan Yasuuⓐ al Masiiẖ, darnu gwan nyaŋa gwati gwuthi ŋida no, abi ŋeda gwuthi ŋida ŋoinyadho, danya uthi ŋida ŋoinyadho nyaŋa erna gwai ŋida ŋuŋun. 10Nyi gwajidhedha ireyuŋw je galo gi dhuŋun ibidha ko; ŋinena ro dhuŋun ibidha dhuŋun dhina dhiŋir dhan nyaŋa, nyaŋa lina limadhinu a nyapai dhuŋuna ibidha kwereny kidhila gina gimerna, gwati gwan nu danyapai dogo no, abi danya uminyi ko. 11Abi ŋinena meajul ŋiro; di gwiro ŋinena biranya nono gi dhuŋun dhina dhibupanya, a minoŋ ŋiro ŋamiejini ko gi ŋidi ŋina ŋuthanyalo. 12Ada dhuŋun dhimaje dha dhuminyi dapai ŋiro gwuleny, a dhuŋun ibidha dhuminyinu gi dhuŋun dha ŋidi ŋina ŋuthilo kwiji, a gwati gwan gi dhuŋun dha ŋidi ŋina ŋati ŋuthilo kwiji no. 13A gwati gwan nu di liji liter uthi gathuŋw uwa, nyabibuje dhuŋuna dhina dhibur no; 14abi gi dhuŋun dha dhupiye galo, di ŋidi ŋina ŋuthanyalo ŋoinyadho kaija ibiga ro ŋan amirathe gwegen, a di ŋidi ŋina ŋuthillo ŋoinyadho ko ro ŋan amirathe gwalo; di a upiye galo je. 15Gwiro ŋinena ulinuŋwna darnu, Gwina gwuwurejo ŋida ŋoinyadho liduŋw gwati gwuthi ŋida manaŋ no; a gwina gwawureje ŋida ŋitiny liduŋw gwati gwamirathiye ŋida no.
Ŋidi ŋina ŋapilo Tiiṯus a liji liter
16Abi shukr di Kalo, gina gigeto dhuŋuna ibidha dhadhapai ŋiro momaŋ dhan nyaŋa gi dhugor ganu dha Tiiṯus. 17Ŋinena uminyuŋw dhuŋuna dhina dhibupana; a gwuthi dhuŋuna dhadhapai ŋiro momaŋ dhoinyadhanu, ŋwela dagalo gi dhuŋun dha dhuminyi dha dhugor dhuŋun. 18A gwimana ukeja mega gwai gwina gwuthi shahaada gwina gwiŋir gi dhuŋun dha Dhuŋun dhina Dhiŋir gi kanaayis peth; 19a gwati gwan minoŋ dogo no, abi ŋeda gwuthinu ganu ko gi kanaayis danalai gwudhie gi ela gi niⓐma ibigwa gwina gwapanagwai ŋiro, gi majdh gwa Kweleny, a gwan dhuŋun dhalo dhadhapai ŋiro momaŋ. 20Altu ganu gi dhuŋun ibidha, dathiji kwiji gweda dhedhi dhara gi ŋidi ibiŋa ŋina ŋoinyadho ŋina ŋapanana ŋiro ganu no. 21Aldima dhuŋuna dhina dhiŋir, gwati gwan gi je ganu ja Kweleny dogo no, abi gi je ganu ja liji ko. 22Anaŋa lima ukeja maguri gwuri ŋeda ŋalai, gwina gwabiŋaijije ŋwamun ŋwoinyadho gi dhuŋun dhoinyadho darnu gwijo momaŋ dapai ŋiro momaŋ, abi ŋinena gwimanani momaŋ gwuleny dapai ŋiro gwoinyadhanu, uminyi gwai gwoinyadho gwan nyaŋa. 23Abi gi dhuŋun dha Tiiṯus, a ŋeda gwaicaijiyana gwai ŋiro a gwathana gwai apai ŋiro ŋan nyaŋa; abi limaguri, ŋediŋa liro liji lina lukejinu la kanaayis, a majdh gwa al Masiiẖ. 24A minoŋ anajilo gi je ganu ja kanaayis dhuŋuna dhina dhuthanya dha uminyi gwalo, a dha are ŋamilai gwuri gwan nyaŋa.
Currently Selected:
2 Kuurinthuus 8: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
