2 Kuurinthuus 10
10
Buulus gwabiŋaijo lijo darnu ŋeleny ŋina ŋuthuŋwulo ŋidhi di Kalo
1A nyi gwajothaije galo rujini gwai gwitiny gwa al Masiiẖ a iŋir gwuŋun, nyi gwina gwan Buulus ada nyi gwimaje gwirujinu gwitiny, abi ada nyi gwati gwimaje dagalo ganu no nyuthi reuŋw ganu dagalo. 2Abi nyi gwajothaije galo dathinyi rii ganu ada nyi gwimaje dagalo ganu uminyi gwai gwina gwathinyigwai uminyi darnu nyi gware ganu gi liji ganu, lina lati lathiji irejo je galo darnu anaŋa lathilela gi dhuŋun dha aŋinu no. 3Ada anaŋa limathelila gi dhuŋun dha aŋinu, abi anaŋa lati lathapai ŋoŋora dhuŋun dhai dha aŋinu no. 4(A minoŋ ŋidi ŋa ŋoŋor ŋuri ŋati ŋa aŋinu no, abi ŋuthi ŋoma Kalo gai dil ŋai kiye duna gwina gwathin ŋidi je ŋa ŋoŋor;) 5a ŋuthi ŋoma ŋupeje ireyuŋw je galo ja ŋadigireny ŋega, a ŋidi peth ŋina ŋo kabo ŋina ŋadhare ŋamilai ŋaro dhuwan dha liŋa gwa Kalo, a ŋwodha ireyuŋw je galo peth dilro jine gi dhuŋun dha dhuthejo al Masiiẖuŋw kuni; 6albije momaŋ dilwurejo uruŋw kuni ganu dhuŋuna dhuŋun, maji manya meaje uthejuŋw nyuni gwalo. 7Nyaŋa lathi datiŋa ŋida galo ŋina ŋaŋinu gi je ganu dagalo ŋinena a? Ada kwiji gweda gwimuminyi kwidom gwuŋun darnu gwiro gwa al Masiiẖ, abrico kwijo ibigwa ko kwidom gwuŋun ŋwirijo dhuŋuna ibidha je galo manaŋ, darnu gwiro ŋinena ruŋw gwa al Masiiẖ, a minoŋ ko anaŋa liro la al Masiiẖ ko. 8Abi ada nyi gwima urijo ŋida ŋeda ŋamilai gwoinyadhanu gi ŋeleny ŋega, ŋina ŋidhedhije Kweleny ŋan ucini gwa imaan gwalo, a ŋati ŋan irniye gwalo no, a dharo dhati dhinyapai no. 9Dathinyi aŋinu darnu nyi gwidhenyiyaje jawaabaat jai no. 10Ŋinena aro liji nu, Jawaabaat juŋun jibur dhuŋuna a juthi ŋoma; abi aŋini gwa aŋinu yuŋun imulo nono, a dhuŋun dhuŋun dhiro ŋinena dhiro tur gi je ganu ja liji. 11Abrico kwijo ibigwa ŋwudhura dhuŋuna ibidha, darnu gwiro ŋinena janana gi dhuŋun ibidha jawaabaat jai ada anaŋa lati limaje no, a minoŋ anaŋa lathapai dhuŋuna ibidha ko ada anaŋa limaje. 12Ŋinena athana uthi ŋoma dana dhura lidom luri gi liji ganu lina lathigeta shahaada gi lidom legen gwina gwiŋir no, i athathana ubiyo lidom ganu luri ŋeda ŋalai no; abi ŋediŋa lathigeta miizaan gi lidom legen lidom lai legen, alubiye lidom ganu legen lidom lai legen, athathil liŋidhi no. 13Abi anaŋa lati lare ŋamilai gi ŋidi ŋina ŋati ŋigitinu gi miizaan no, abi gi dhuŋun dha miizaan gwa dhuŋun dhina dhigitinu dapai dhina dhidhedhije Kalo, dhina dhigitinu gi miizaan gwina gwuthi ŋoma gwobana dagalo ko. 14Ŋinena athathana dhiŋudhi lidom luri kwereny, gwiro ŋinena anaŋa lati luthi ŋoma dobana dagalo no; abi anaŋa limobana dagalo ko Dhuŋun dhai dhina Dhiŋir dha al Masiiẖ. 15A anaŋa lati laro ŋamilai gi ŋidi ŋina ŋati ŋijo gi miizaan no, ŋinena uthi ŋidi ibiŋa dhuŋuna ganu dhina dhibur dhina dhapo liji liter; abi anaŋa luthi dhunijuŋw ada imaan gwalo gwima biŋa, danaro liji lina lipilipa dagalo ganu gi dhuŋun dha dhuŋun dhina dhedhije Kalo dapai gwoinyadhanu, 16dana abiŋaijo lijo lina ligwujaje galo Dhuŋuna dhina Dhiŋir, athana aro ŋamilai gi dhuŋun dha ŋiro ŋina ŋapilo liji liter kwereny no. 17Abi gwina gware ŋamilai, abrico ŋware ŋamilai gi Kweleny. 18Ŋinena athi kwiji rui gwiŋir gwina gwathidhedha gwidom gwuŋun shahaada gwina gwiŋir no, abi gwina gwathi Kweleny dhedha shahaada gwina gwiŋir.
Currently Selected:
2 Kuurinthuus 10: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
