I Kuurinthuus 4
4
Dhuŋun dhina dhiro daruri dha liji lina lukejinu di Kalo
1Minoŋ abricul kwijo jidhura, liro ŋinena jadham ja al Masiiẖ, a wukala gwa dhuŋun dhina dhigilibicinu dha Kalo. 2Gi dhuŋun ibidha ŋidi ŋina ŋibupinu di wukala ŋiro di kwiji bujini gwiŋir. 3Abi diginy dhuŋun dhina dhitinyunu dhiro dhathiny upijo idhejuŋw gwalo, i gwa kwiji; abi nyi gwati gwathidheje gwidom gwiny no. 4A nyi gwati gwiliŋidhi dhuŋuna dhetipo gi gwidom gwiny no; abi nyi gwati gwimutu no, abi Kweleny gwiro gwina gwathinyidheje. 5A minoŋ athathanya akimiyo kwereny nanaŋ lamun la Kweleny lati lidhi no, nyabi dhuna di ma Kweleny ila, gwina gwaji gwuriye ŋida ganu ŋina ŋigilibicinu ŋa girim, a ŋwaŋiye bupuŋw gwa dugor; a Kalo gaji gorthadha kwijo gweta gweta.
6Abi dhuŋun ibidha, limega lai, dhurliny galo duŋwuro ŋinena dhiny a dha Abulluus gwan nyaŋa; danya alimini daguri athathanya ireye je galo gwoinyadhanu gi dhuŋun dhina dhulinu, dathathi gweta dagalo aldhijo kwijo ganu gwiter no. 7Gwiro ŋinena ei gwaŋa geta gwiŋiranu gi kwiji gwiter? a kwoŋ gwuŋa gwiraŋ gwina gwati gwimaŋa apai no? Abi ada gwimaŋa apai, kworaŋ ŋabi are ŋamilai, gwiro ŋinena gwati gwimaŋa apai no? 8Ŋinena nyaŋa limapa a nyaŋa lati libupo manaŋ no, nyaŋa limuthi ŋida ŋoinyadho, a nyaŋa limaro leleny cucun; a nyi titiganu gwibupo danyaro leleny, danaro leleny nyaŋa lai. 9Nyi gwaŋudhi darnu Kalo gimiji obaja ter gidon anaŋa lina lukejinu, liro ŋinena anaŋa lukiminu ai gwai; ŋinena manaro aŋini di gidhila, a malaayka, a liji. 10Anaŋa liro jirila gwan al Masiiẖ, abi nyaŋa liro liji lina libebra gi al Masiiẖ; anaŋa limulo nono, abi nyaŋa libur nono; nyaŋa luthi nejuŋw, a anaŋa lati luthi nejuŋw no. 11Di saaⓐa ibija jamu jathijeny, a odha yathijeny, a anaŋa lijalo ŋwumirinya, a anaŋa lathipini, a anaŋa lati luthi kaloŋa gadhije no; 12anaŋa lathapai ŋiro gwuleny doi dai duri; athijil lo, anabi barikiye; athijil irini, anabi mutha dugore; 13athijina abiŋadhe ganu, athanalbi othaije galo gwuligwuleny diliŋir dugore; anaŋa limaro ŋinena ŋirle ŋa gidhila; a ŋirle ŋa ŋidi peth di ŋinena.
Dhuŋun dhiro ŋinena dhina dhathidhai babo abiŋaijo ŋare ŋuŋun dhina dhiŋir dhan ŋeda dhadhapai a ola
14Nyi gwati gwulo dhuŋuna ibidha dajapie dhara no, abi daji ola gwiro ŋinena keleŋa gina guminyilo. 15Ada nyaŋa limuthi lijo lina lathalimiye di al Masiiẖ ⓐashara alaaf, abi nyaŋa lati luthi baboŋaije loinyadho no; gi al Masiiẖ Yasuuⓐ nyi gwiliŋidhaje Dhuŋun dhai dhina Dhiŋir. 16A minoŋ nyi gwathajothaije galo danya ro ŋinena nyi. 17Gi dhuŋun ibidha nyi gwukejo Tiimuuthaawusuŋw dagalo gwina gwiro ŋari ŋina ŋuminyiny a ŋina ŋiŋir di Kweleny, gwina gwaji aŋidhaniye dai da midhe gwiny di al Masiiẖ, gwiro ŋinena athinyin alimiye gi kalo peth gi kanaayis peth. 18A liji coŋ alo alaŋ, gwiro ŋinena nyi gwati gwila dagalo no. 19Abi nyi gwaji gwila dagalo, ada Kweleny gwimuminyi, a nyi gwati gwaji gwaliŋa dhuŋuna dha liji lina ludhi alaŋ no, abi nyi gwaliŋa ŋoma. 20Abi gidhila ga Kalo gati giro gi dhuŋun no, ŋwubiro gi ŋoma. 21Nyaŋa libupo aŋa? Nyila dagalo lura lai, i gi uminyi, a gi Dhigirim dha gwina gwirujinu gwitiny?
Currently Selected:
I Kuurinthuus 4: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
