PSALMEN Bindu 15
Bindu 15
Ise do na Boi Dohor bani Naibata?
1Psalm ni si Daud.
Ham Jahowa, ise do na boi tondok bani lampolampo-Mu?
Ise do na malo marianan bani dolog-Mu na pansing in? (Ps. 23:6; 24:3; 27:5; 31:21; 61:5; 84:5; Ep. 2:19; Pangk. 21:3)
2Ai ma halak na so panurakon bani parlahouni,
sidalankon hapintoron, halak siluarhon na pintor ibagas uhurni; (Ps. 84:12; Jos. 24:14; Sak. 7:9, 10; 8:16, 17; Jes. 33:15)
3na so manrisai marhitei dilahni,
na so mangkorjahon na jahat dompak hasomanni,
anjaha na so parohkon habadoron bani sinkutani; (2 Sam 19:28; Sak. 8:16, 17)
4na mangkagigihon halak na pinabali,
tapi na pasangapkon halak na mangkabiari Jahowa,
na so mosei ia humbani bijani age rugi ia marhitei ai; (3 Mus 27:10, 33; 2 Raj 3:14)
5na so ra paanakkon duitni laho mangonsop,
na so ra manjalo sisip laho mangimbang na so marsalah.
Halak na mangkorjahon na sonai ai, seng anjai targompang sadokah ni dokahni. (2 Mus. 22:24; 23:8; 3 Mus 25:37; 5 Mus 16:19; 23:20; 27:25; Neh. 5:7, 8; Pod. 17:23; Hos. 18:8; Mat 5:42; Luk 6:36)
Currently Selected:
PSALMEN Bindu 15: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.